অহা ২৬ ডিচেম্বৰৰ পৰা ছিকিমৰ ডজংগুৰ নামপ্ৰিকদং খেলপথাৰত জনজাতীয় সংস্কৃতি, সংগীত, নৃত্য, ক্ৰীড়া আৰু খাদ্য সম্ভাৰৰ প্ৰচাৰ তথা প্ৰসাৰৰ উদ্দেশ্যে চাৰিদিনীয়াকৈ ছিকিম জনজাতি মহোৎসৱৰ আয়োজন কৰা হৈছে।
এই বাৰ্ষিক মহোৎসৱৰ আয়োজন কৰিছে ট্ৰাইবেল ৰিচাৰ্ছ ইনষ্টিটিউট, ৰাজ্যিক সমাজ কল্যাণ বিভাগ, উত্তৰ জিলা প্ৰশাসন আৰু নামপ্ৰিকদং নামছুঙ উৎযাপন সমিতিয়ে সন্মিলিতভাৱে।
মহোৎসৱখনৰ ব্যৱস্থাপনা হৈছে ৰাজ্যৰ জনজাতি পৰিক্ৰমা বিভাগ।
শনিবাৰে গেংটকত সংবাদ মাধ্যমৰ আগত মহোৎসৱখনৰ বিষয়ে সবিশেষ প্ৰকাশ কৰি ৰাজ্যিক সমাজ কল্যাণ বিভাগৰ সচিব সৰলা ৰাইয়ে কয় যে জনজাতি মহোৎসৱখন উদ্বোধন কৰিবলৈ অহা ২৬ ডিচেম্বৰত আহি উপস্থিত হ’ব জনজাতি পৰিক্ৰমা মন্ত্ৰালয়ৰ সচিব ৰাজেশ আগৰৱালা।
ৰাজ্যখনলৈ আহিবলগীয়া জনজাতি পৰিক্ৰমা মন্ত্ৰালয়ৰ সচিব গৰাকীৰ আগত ৰাজ্যখনৰ জনজাতিসকলৰ সৈতে জড়িত বিভিন্ন সমস্যাৰ বিষয়ে অৱগত কৰা হ’ব বুলিও ৰাইয়ে কয়। ইয়াৰ ভিতৰত আছে কেন্দ্ৰীয় চৰকাৰৰ বিবেচনাধীন হৈ থকা ৰাজ্যখনৰ ১১টা জনগোষ্ঠীক জনজাতিৰ মৰ্যাদা প্ৰদান কৰা দাবীৰ বিষয়টো।
তদুপৰি, ছিকিমৰ ট্ৰাইবেল ৰিচাৰ্ছ ইনষ্টিটিউটৰ বিভিন্ন সমস্যাৰ লগতে আন সমস্যাসমূহো কেন্দ্ৰীয় সচিবগৰাকীৰ আগত উপস্থাপন কৰা হ’ব বুলি ৰাজ্যিক সমাজ কল্যাণ বিভাগৰ সচিবগৰাকীয়ে জানিবলৈ দিয়ে।
জনজাতি মহোৎসৱৰ সময়ছোৱাত ৰাজ্যখনৰ জনজাতীয় জীৱনৰ কেইবাধৰণৰো কাৰ্যকলাপ দাঙি ধৰাৰ বাবে ঠিকঠাক কৰা হৈছে।
এই মহোৎসৱতে শিক্ষা, ক্ৰীড়া, ব্যৱসায় আদি বিভিন্ন ক্ষেত্ৰত সাফল্য লাভ কৰা বিভিন্ন ব্যক্তিক আয়োজকৰ ফালৰ পৰা সম্বৰ্দ্ধনা জনোৱা হ’ব।
নামপ্ৰিকদং মহোৎসৱত অন্যান্য ৰাজ্যৰ জনজাতি সম্প্ৰদায়ৰ প্ৰতিনিধিও উপস্থিত থাকিব। বিশেষকৈ উত্তৰ পূৰ্বাঞ্চলৰ ৰাজ্য কেইখনৰ প্ৰতিনিধিৰ লগতে ছিকিমৰ জনজাতি সম্প্ৰদায়ৰ বিষয়ে কাম কৰি থকা গৱেষকসকলো মহোৎসৱত উপস্থিত থাকিব।
