আগন্তুক দিনসমূহত ৰাজ্যৰ ২৬ হেজাৰখন গাঁৱৰ প্ৰতিখনতে একোখনকৈ মিনি ষ্টেডিয়াম স্থাপনৰ পৰিকল্পনা কৰিছে অসম চৰকাৰে। বৰপেটাত এই কথা উল্লেখ কৰে অসম চৰকাৰৰ জলসিঞ্চন মন্ত্ৰী ৰঞ্জিত দত্তই।মঙলবাৰে বৰপেটা জিলাৰ ভৱানীপুৰ শংকৰদেৱ শিশু নিকেতনৰ প্ৰান্তীয় ক্ৰীড়া সমাৰোহখন উদ্বোধন কৰি মন্ত্ৰীগৰাকীয়ে এই কথা উল্লেখ কৰে।
মন্ত্ৰীগৰাকীয়ে ছাত্ৰ-ছাত্ৰীসকলক উদ্দেশ্যি প্ৰদান কৰা ভাষণত কয় যে ছাত্ৰ-ছাত্ৰীৰ শাৰীৰিক আৰু মানসিক উৎকৰ্ষ সাধনৰ এক অন্যতম আহিলা হৈছে খেল-ধেমালী। খেল-ধেমালীৰ জৰিয়তে আমাৰ ছাত্ৰ-ছাত্ৰীসকলে বিশ্ব দৰবাৰত নিজৰ নাম উজলাই তোলাৰ লগতে নিজৰ মাতৃভূমিকো সমগ্ৰ বিশ্ববাসীৰ ওচৰত গৌৰৱেৰে পৰিচয় কৰি দিব পাৰে।
আনহাতে, ভৱানীপুৰস্থিত শংকৰদেৱ শিশু নিকেতনৰ ৩০সংখ্যক ৰজনীকান্ত দেৱশৰ্মা সোঁৱৰণী প্ৰান্তীয় ক্ৰীড়া সমাৰোহৰ আজিৰ এই অনুষ্ঠানত দিছপুৰ সমষ্টিৰ বিধায়ক অতুল বৰা, ‘শিশু শিক্ষা সমিতি, অসম’ৰ সভাপতি ড০ নিৰ্মল বৰুৱা, বিজেপিৰ কেন্দ্ৰীয় কাৰ্যনিৰ্বাহক সদস্য নিকুঞ্জ কুমাৰ দাস, বিজেপিৰ বৰপেটা জিলা সমিতিৰ সভাপতি ফণী পাঠক, বিজেপিৰ জিলা যুৱ মৰ্চাৰ সভাপতি ভাস্কৰ দাসকে ধৰি ভালেসংখ্যক লোক উপস্থিত থাকে।
গলিয়া মিনি ষ্টেডিয়াম প্ৰাংগণত অনুষ্ঠিত সমাৰোহখনত বৰাক উপত্যকাক বাদে ৰাজ্যৰ বাকী সকলো জিলাই অংশগ্ৰহণ কৰিছে।
