অহা ফেব্ৰুৱাৰীত অনুষ্ঠিত হ’বলগীয়া ত্ৰিপুৰা বিধানসভাৰ নিৰ্বাচনত শাসনাধীষ্ঠ বাওমৰ্চা চৰকাৰক পৰাজিত কৰিবলৈ ভাৰতীয় জনতা দলে ‘লাল চৰকাৰ’ নামৰ এখন হিন্দী ৰাজনৈতিক চলচ্চিত্ৰৰ সহায় ল’বলৈ আগবাঢ়িছে। ‘দ্য প্ৰিন্ট’ত এই কথা প্ৰকাশ পাইছে।
সূত্ৰসমূহে জনোৱা মতে মানিক সৰকাৰৰ চৰকাৰখনৰ বিষয়ে এক কটু মন্তব্য থকা চলচ্চিত্ৰখনে জানুৱাৰিৰ শেহৰ পিনে মুক্তি পাব। বাওঁমৰ্চা শাসিত ত্ৰিপুৰাত অহা মাহত নিৰ্বাচন অনুষ্ঠিত হ’ব।
বিজেপিৰ সাহায্যত নিৰ্মিত চলচ্চিত্ৰখনৰ নামটো বহু আলোচনাৰ অন্তত স্থিৰ কৰা হয় বুলি সূত্ৰসমূহে জানিবলৈ দিছে। দলটোৱে এই চলচ্চিত্ৰখন চিপিআই (এম) চৰকাৰখনৰ নীতি তথা কাৰ্যসূচীসমূহক সমালোচনা কৰিবলৈ ব্যৱহাৰ কৰিব।
আনষ্ঠানিকভাৱে যদিও বিজেপিয়ে চলচ্চিত্ৰখনৰ সৈতে কোনো সম্পৰ্ক থকাৰ কথা অস্বীকাৰ কৰিছে, দলৰ আভ্যন্তৰীণ সূত্ৰই কয় যে চলচ্চিত্ৰখন ৰাজ্যৰ নিৰ্বাচনত ইয়াৰ পৰিকল্পনাৰ ক্ষেত্ৰত অতি গুৰুত্বপূৰ্ণ।
ত্ৰিপুৰাৰ মুখ্যমন্ত্ৰী মানিক সৰকাৰৰ নিকা ভাৱমূৰ্তিৰ বিপৰীতে বিজেপিয়ে প্ৰত্যাক্ৰমণৰ কোনো সুৰুঙা বিচাৰি নোপোৱাৰ পৰিপ্ৰেক্ষিতত এই চলচ্চিত্ৰখনে ত্ৰিপুৰাৰ শাসন ব্যৱস্থাৰ এটা ‘ভিন্ন ব্যাখ্যা’ দাঙি ধৰাত দলক সহায় কৰিব।
‘’চলচ্চিত্ৰ হৈছে এটি শক্তিশালী মাধ্যম আৰু ইয়াৰ জৰিয়তে বহু কথা ক’ব পাৰি। জনসাধাৰণৰ মনত ই পেলাব পৰা প্ৰভাৱ আন কোনো মাধ্যমৰে নাই। আমি এখন চলচ্চিত্ৰৰ মাজেৰে ত্ৰিপুৰাৰ পৰিস্থিতিটো দাঙি ধৰাৰ চেষ্টা কৰিছো,’’-চলচ্চিত্ৰখনৰ সৈতে জড়িত হৈ থকা এক সূত্ৰই এই কথা প্ৰকাশ কৰিছে।
লাল চৰকাৰৰ বাংলা আৰু ত্ৰিপুৰাৰ জনজাতীয় ভাষা ককবৰকত বৰ্ণনা তথা সংলাপসমূহ লিখি দিয়া হ’ব।
হাসটাগ ফিল্মে প্ৰযোজনা কৰা ১০৫ মিনিটৰ চলচ্চিত্ৰখনে দৰিদ্ৰতা, নিবনুৱা সমস্যা, মহিলাৰ সুৰক্ষা, ৰাজনৈতিক হত্যা, মানৱ সৰবৰাহ, এমএনৰেগাৰ কেলেংকাৰী আদি বিষয়বোৰৰ ওপৰত আলোকপাত কৰিব।
