অসমীয়া ভাষাক ভাল পোৱা সকলোৰে বাবে নিশ্চিতভাৱেই এটা দুঃখবৰ। ভাষিক বৈষম্যৰ বলি হৈ প্ৰযুক্তিৰ জগতখনত অসমীয়া ভাষাই আন এটা আঘাত মূৰ পাতি ল’ব লগীয়া হৈছে।
এই আঘাত আহিছে বিশ্বৰ তথ্য-প্ৰযুক্তি জগতৰ মহাতাৰকা সদৃশ কোম্পানি মাইক্ৰ’ছ’ফটৰ পৰা। শেহতীয়া তথ্যমতে কোম্পানিটোৱে বিশ্ব মাতৃভাষা দিৱসৰ আঁচনি হিচাপে যোৱা ২১ ফেব্ৰুৱাৰিত ঘোষণা কৰিছে যে ভাৰতীয় ব্যৱহাৰকাৰীসকলক নিজৰ ভাষাত ইমেইল ঠিকনা খোলাৰ সুবিধা প্ৰদান কৰিব। ইয়াৰ বাবে কোম্পানিটোৱে ভাৰতৰ ১৫টা ভাষাক নিৰ্বাচন কৰিছে, য’ত উত্তৰ-পূৰ্বাঞ্চলৰ বৰো, বাঙালী, মণিপুৰী, নেপালী ভাষা আছে। কিন্তু নাই অসমীয়া ভাষা।
অসমীয়া ভাষা আৰু লিপিয়ে তথ্য-প্ৰযুক্তিৰ জগতখনত ৰাষ্ট্ৰীয় আৰু আন্তঃৰাষ্ট্ৰীয় পক্ষসমূহৰ পৰা বৈষম্যৰ বলি হৈ অহাটো দুখেৰে সৈতে চাই থাকিব লগীয়া হৈছে অসমীয়া মানুহে। কাৰণ অসমীয়া মানুহৰ কোনো নিজা ভূমিকা বা ভুলৰ অবিহনেই বাৰে বাৰে এনে বঞ্চনাৰ বলি হৈছে ভাষাটো।
উল্লেখযোগ্য যে য়ুনিক’ডত অসমীয়া লিপিৰ স্বকীয়তাৰ স্বীকৃতিৰ বাবে যোৱা দীৰ্ঘদিন ধৰি অসমীয়া মানুহে ব্যক্তিগত আৰু সংঘবদ্ধ স্তৰত যুঁজ দি আহিছে। এতিয়া ভাষা হিচাপেও অসমীয়া ভাষাৰ গুৰুত্বক হেলাৰঙে সকলোৱে নুই কৰিবলৈ ধৰিছে।
উল্লেখযোগ্য যে মাইক্ৰ’ছ’ফটৰ এই আঁচনিখনৰ ফলত কোনো ব্যৱহাৰকাৰীয়ে ইংৰাজীৰ বাদেও তালিকাভুক্ত ভাষাকেইটাতো নিজৰ ইমেইল ঠিকনা খুলিব পাৰিব। তাৰ বাবে য়ুজাৰজনে নিজৰ কম্পিউটাৰত outlook.com ৰ client হিচাপে সোমাব লাগিব। ইয়াৰ মাধ্যমত নিজৰ ভাষাৰ ইমেইল ঠিকনা ব্যৱহাৰ কৰি য়ুজাৰে মেইল পঠাব বা গ্ৰহণ কৰিব পাৰিব।
এই স্থানীয় ভাষাৰ ঠিকনা ব্যৱহাৰ কৰি মাইক্ৰ’ছ’ফটৰ আৰু আন কিছুমান সহযোগী কোম্পানিৰ এপ্লিকেইশ্যনতো বাৰ্তা আদান-প্ৰদান কৰিব পাৰিব।
জানিব পৰামতে এই ভাষাবোৰ য়ুনিক’ড মান সমৰ্থিত আৰু এইবোৰৰ য়ুজাৰে থাৰ্ড-পাৰ্টি ইমেইল ছাৰ্ভিছ প্ৰভাইডাৰৰ মাজেৰে (উদাহৰণ : XgenPlus) নিজৰ একাউণ্ট পঞ্জীয়ন কৰিব পাৰিব।
অৱশ্যে মাইক্ৰ’ছ’ফটে এই বুলি কৈছে যে কোম্পানিটোৱে য়ুনিক’ড সমৰ্থিত যিকোনো লিপিৰ ইমেইল ঠিকনা গ্ৰহণ কৰিবৰ বাবে কাম কৰি আছে। তেতিয়া অসমীয়াকে ধৰি সকলো য়ুনিক’ড মানসম্পন্ন ভাষাতে ইমেইল ঠিকনা খুলিব পাৰিব।
কিন্তু অসমীয়া ভাষাটোৰ ব্যৱহাৰকাৰী যথেষ্ট সংখ্যক থকা সত্ত্বেও কিয় মাইক্ৰ’ছ’ফটে ইয়াক কিয় এতিয়াই তালিকাভুক্ত কৰা নাই সেয়া জানিব পৰা হোৱা নাই। বাৰে বাৰে অসমীয়া ভাষাই সন্মুখীন হোৱা এই বৈষম্যই স্বাভাৱিকতে আঘাত দিছে অসমীয়া ভাষাপ্ৰেমীক।
