উচ্চতম ন্যায়ালয়ে যোৱা ৩০ নৱেম্বৰত এটা গুৰুত্বপূৰ্ণ ৰায়ৰ জৰিয়তে এন আৰ চিৰ প্ৰথম পৰ্যায়ৰ খচৰা প্ৰকাশৰ সময়সীমা ৩১ ডিচেম্বৰ ধৰি দিয়াৰ পাছত খচৰা প্ৰকাশৰ ফলত সৃষ্টি হ’ব পৰা যিকোনো অপ্ৰীতিকৰ পৰিস্থিতিৰ মোকাবিলা কৰিবৰ বাবে প্ৰশাসন অতিৰিক্ত বাহিনীৰ সৈতে সাজু হৈ আছে। এই কথা আজি এখন সংবাদমেলৰ জৰিয়তে জানিবলৈ দিয়ে বিশেষ আৰক্ষী সঞ্চালক প্ৰধান কুলধৰ শইকীয়াই। তেওঁ লগতে সংবাদ মাধ্যমক জানিবলৈ দিয়া মতে সমগ্ৰ অসম জুৰি ৮০০ টা স্পৰ্শকাতৰ অঞ্চল চিনাক্ত কৰা হৈছে। সঞ্চালক প্ৰধানজনে আৰু জানিবলৈ দিয়ে যে স্পৰ্শকাতৰ অঞ্চলবিলাকৰ বেছি ভাগেই নামনি অসমৰ। উক্ত সংবাদমেলত শইকীয়াই আৰু জনাই যে স্পৰ্শকাতৰ অঞ্চলসমূহক তিনিটা মূল বিষয়-স্থান, এন আৰ চি সেৱা কেন্দ্ৰ আৰু পৰিয়ালসূহৰ বংশ সূত্ৰৰ ভিত্তিত চিনাক্ত কৰা হৈছে।
ইয়াৰ উপৰি কামৰূপ মহানগৰৰ উপায়ুক্ত এম অংগমথুয়ে জনাই যে এন আৰ চি সম্পৰ্কীয় নথি-পত্ৰৰ যথাৰ্থতা পৰীক্ষণ অহা ১৪ ডিচেম্বৰৰ ভিতৰত সম্পূৰ্ণ হৈ উঠিব। তেওঁ আৰু কয় যে মুঠ ২৮৩ গৰাকী জিলা দণ্ডাধীশক অহা ৩০ দিনৰ ভিতৰত অসমৰ সকলো জিলাৰ বাসগৃহ পৰিদৰ্শন কৰিবলৈ নিৰ্দেশ দিয়া হৈছে। ‘অহা ২৭-২৮ ডিচেম্বৰৰ ভিতৰত এন আৰ চি খচৰা সম্পৰ্ণভাৱে প্ৰস্তুত হ’ব বুলি আমি সম্পূৰ্ণ আশাবাদী’ বুলি অংগমথুয়ে জনায়।
