এন ডি এ চৰকাৰে দেশত সংকীৰ্ণতাক উৎসাহ দি আহিছে। লগতে এই চৰকাৰখনে দুমুখীয়া নীতি গ্ৰহণ কৰে। বিজেপিয়ে মেঘালয়ত সকলোৰে বাবে হৃদয় খুলি দিছে। কিন্তু দিল্লীত বিজেপি চৰকাৰে গাৰো পাহাৰত অলপতে খ্ৰীষ্টান ধৰ্ম প্ৰতিষ্ঠাৰ ১৫০ বছৰ উপলক্ষে উদযাপিত অনুষ্ঠানত উপস্থিত থাকিবলৈ আহিব খোজা পাষ্টৰক ভিছা অস্বীকাৰ কৰে।
এই সমস্ত অভিযোগ আনে আজি মেঘালয়ত কংগ্ৰেছ দলৰ হৈ নিৰ্বাচনী প্ৰচাৰ চলোৱা প্ৰাক্তন কেন্দ্ৰীয় মন্ত্ৰী তথা দলটোৰ এজন গুৰুত্বপূৰ্ণ নেতা শশী থাৰুৰে। তেওঁ মেঘালয়ৰ ভোটাৰসকলক বিজেপিৰ বিৰুদ্ধে ভোট দিবলৈ আহ্বান জনায়।
আজি শ্বিলঙত কেইটামান সমষ্টিত প্ৰচাৰ চলোৱাৰ পূৰ্বে থাৰুৰে সংবাদ মাধ্যমৰ সৈতে মত বিনিময় কৰে।
‘এইখন এনেকুৱা এখন চৰকাৰ, যাৰ কোনো চকুত পৰা সফলতা নাই। এই চৰকাৰখনে কৰি থকাৰ ভিতৰত ভাৰতৰ ছবিখন সলনি কৰাৰ চেষ্টা কৰি আছে। ৭০ বছৰ ধৰি আমি ভাৰত নিৰ্মাণ কৰিবলৈ চেষ্টা কৰি আছো। আনকি প্ৰথমখন এন ডি এ চৰকাৰেও ‘সকলো স্তৰৰ মানুহৰ ভাৰতখন’ বিকৃত কৰিবলৈ সাহস কৰা নাছিল।’ এইদৰে কয় থাৰুৰে।
তেওঁ লগতে কয় যে বিজেপিয়ে মেঘালয়লৈ আহি বিজেপি শাসিত ৰাজ্যবোৰত খ্ৰীষ্টানসকলৰ প্ৰতি সদয় হোৱাৰ কথা কয়। কিন্তু খ্ৰীষ্টানসকলে বহুতো অপঘটনাৰ মাজেৰে সময় পাৰ কৰিছে।
আনহাতে তেওঁ বিজেপিৰ মিত্ৰ দল এন পি পিকে ধৰি আন আন আঞ্চলিক দলবোৰকো আক্ৰমণৰ লক্ষ্য কৰি লয়। তেওঁ কয় যে এই দলবোৰে মেঘালয়ৰ মানুহক নিজাকৈ নিৰ্বাচন খেলা বুলি কৈ আছে। কিন্তু এইবোৰে প্ৰকৃততে ভিতৰি ভিতৰি বিজেপিৰ মিত্ৰ হিচাপে নিজকে সংলগ্ন কৰি ৰাখিছে।
বিজেপি আৰু মিত্ৰ দলবোৰক সমালোচনা কৰাৰ বিপৰীতে নেতাজনে মেঘালয়ত মুকুল চাংমা নেতৃত্বাধী কংগ্ৰেছ চৰকাৰখনৰ প্ৰশংসা কৰে। বিশেষকৈ শিক্ষা আৰু স্বাস্থ্যখণ্ডত উল্লেখযোগ্য অগ্ৰগতি হোৱা বুলি দাবী কৰে।
শিক্ষা খণ্ডত মেঘালয়ে কেৰালাক অতিক্ৰম কৰা কথাটো উল্লেখ কৰে। লগতে তেওঁ স্বাস্থ্যখণ্ডৰ প্ৰসংগত কেন্দ্ৰীয় চৰকাৰে মেঘালয়ৰ পৰা স্বাস্থ্য বীমাৰ ধাৰণাটো ধাৰ কৰা বুলি কয়।
