কাজিৰঙাৰ কুঠৰীৰ নজান অঞ্চলৰ এখন বইলাৰ ফাৰ্মৰ পৰা বন বিভাগ আৰু আৰক্ষীয়ে চলোৱা এক অভিযানত এটা এ কে ৪৭ ৰাইফল উদ্ধাৰ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে ৷
প্ৰাপ্ত তথ্য মতে, আজি বিয়লি গোপন সূত্ৰৰ আধাৰত চলোৱা এই অভিযানত অভিযানকাৰী দলে জগন্নাথ বাগছে নামৰ ব্যক্তিজনৰ বইলাৰ ফাৰ্মত নীলা টাৰপলিনেৰে বান্ধি লুকোৱাই থোৱা অত্যাধুনিক এ কে ৪৭ ৰাইফলটো উদ্ধাৰ কৰে।
আনহাতে এই ঘটনাৰ পিচৰে পৰা সম্প্ৰতি কুকুৰা ফাৰ্মখনৰ মালিক জগন্নাথ বাগচেক বিচাৰি অভিযানকাৰী দলে অভিযান আৰম্ভ কৰিছে। জানিব পৰা মতে জগন্নাথ বাগচে কুঠৰীৰ বাঘমাৰীৰ নিবাসী।
বন বিভাগৰ বিভাগীয় সূত্ৰৰ পৰা জানিব পৰা মতে জব্দ কৰা এ কে ৪৭ ৰাইফলটো কাজিৰঙাৰ গঁড় হত্যাৰ পৰিকল্পনাৰে চোৰাং চিকাৰীয়ে আনিছিল।
