বিশ্বৰ ভিতৰতে এশিঙীয়া গঁড়ৰ প্ৰধান বাসভূমি কাজিৰঙা ৰাষ্ট্ৰীয় উদ্যানত দুদিনীয়া কাৰ্যসুচীৰে আৰম্ভ কৰা ১৩সংখ্যক গঁড় পিয়লৰ আজি সামৰণি পৰে। কোনো অঘটন নোহোৱাকৈ এই পিয়ল কাৰ্য্য সামৰণি পৰে বুলি বন বিভাগৰ সূত্ৰই জনাইছে।
উল্লেখযোগ্য যে এই গঁড় পিয়লত জড়িত সকলক দক্ষ কৰি তুলিবৰ বাবে যোৱা ২৫ মাৰ্চ দেওবাৰে কাজিৰঙাৰ কঁহৰা ৰেঞ্জৰ বন বিভাগৰ শতবৰ্ষ সমাৰোহ প্ৰেক্ষাগৃহত গণনাকাৰীসকলৰ এক বিশেষ প্ৰশিক্ষণ অনুষ্ঠিত হৈছিল। ইয়াৰ পাছতে বিগত দুটা দিন ধৰি ৰাষ্ট্ৰীয় উদ্যানখনত গঁড়ৰ গণনা সম্পন্ন হয়৷ এই গণনাত ৰাজ্যৰ বিভিন্ন সংমণ্ডলৰ পৰা অহা বন বিষয়া, বেচৰকাৰী সংগঠনৰ প্ৰতিনিধি আৰু সংবাদ মাধ্যমৰ প্ৰতিনিধিয়ে অংশ গ্ৰহণ কৰে৷
কাজিৰঙাৰ এই ত্ৰয়োদশ গঁড় পিয়ল ২০১৮ত মুঠ ১০০জন বন বিষয়া আৰু প্ৰায় ৩০০ বনকৰ্মীক নিয়োগ কৰা হৈছিল বুলি জানিব পৰা গৈছে। এই কথা নৰ্থ-ইষ্ট নাওক জনায় ৰাষ্ট্ৰীয় উদ্যানখনৰ ডি এফ অ’ ৰোহিণীবল্লভ শইকীয়াই৷ তেওঁৰ মতে ২৬ মাৰ্চত কাজিৰঙাৰ ৩৬টা কম্পাৰ্টমেণ্টত আৰু ২৭ মাৰ্চত মুঠ ৩৮টা কম্পাৰ্টমেণ্টত গঁড়ৰ গণনা কৰা হয়৷
উল্লেখযোগ্য যে বিগত গণনাৰ তুলনাত এই বাৰৰ গণনাত উদ্যানখনৰ ঘাঁহনি জ্বলোৱাৰ কাম সম্পূৰ্ণ নোহোৱা বাবে গণনাত কিছু অসুবিধাই দেখা দিছিল৷
সূত্ৰটোৱে জানিবলৈ দিয়া মতে, দুয়োদিনৰ গণনাত সংগৃহীত তথ্য ইতিমধ্যে কঁহৰা ৰেঞ্জত থকা নিয়ন্ত্ৰণ কক্ষত জমা দিয়া হৈছে৷ পৰৱৰ্তী সময়ত বন বিভাগৰ শিক্ষা আৰু গৱেষণা বিভাগৰ মুখ্য বন সংৰক্ষক উৎপল বৰাক সভাপতি হিচাপে লৈ গঠিত কৰিকৰী সমিতিয়ে এই তথ্য বিশ্লেষণ কৰি গঁড় পিয়ল ২০১৮ৰ আধাৰত গঁড়ৰ সংখ্যা আৰু অন্যান্য তথ্য প্ৰকাশ কৰিব৷
উল্লেখ কৰিব পাৰি যে ১৯৬৫ চনত কাজিৰঙাত প্ৰথমবাৰৰ বাবে প্ৰণালীবদ্ধ গঁড় গণনা আৰম্ভ কৰা হৈছিল আৰু এই গণনাত ৰাষ্ট্ৰীয় উদ্যানখনত মুঠ ৩৬৬টা গঁড় পোৱা গৈছিল৷ ইয়াৰ বিপৰীতে ২০১৩ চনৰ গণনাত মুঠ ২৩২৯টা আৰু ২০১৫ চনৰ গণনাত ২৪০১টা গঁড় পোৱা গৈছিল৷
১৯৬৬ চনৰ পৰা কাজিৰঙাত কৰা গঁড় গণনাৰ তথ্য :
১ : ১৯৬৬ চন : ৩৬৬
২ : ১৯৭২ চন : ৬৫৮
৩ : ১৯৭৮ চন : ৯৩৯
৪ : ১৯৮৪ চন : ৯৪৬
৫ : ১৯৯১ চন : ১১২০
৬ : ১৯৯৩ চন : ১১৬৪
৭ : ১৯৯৯ চন : ১৫৫২
৮ : ২০০৬ চন : ১৮৫৫
৯ : ২০০৯ চন : ২০৪৮
১০ : ২০১২ চন : ২২৯০
১১ : ২০১৩ চন : ২৩২৯
১২ : ২০১৫ চন : ২৪০১
