চিপিআই-এমৰ নেতা প্ৰকাশ কাৰাটে বৃহস্পতিবাৰে কয় যে ত্ৰিপুৰাৰ ভোটাৰে অহা ১৮ ফেব্ৰুৱাৰীৰ বিধানসভাৰ নিৰ্বাচনত বিজেপিক পৰাজিত কৰি কেন্দ্ৰৰ ‘জন বিৰোধী নীতি’ৰ বিৰুদ্ধে গুৰুত্বপূৰ্ণ ভূমিকা গ্ৰহণ কৰিব।
‘’বিধানসভাৰ নিৰ্বাচনত ভাৰতীয় জনতা দলক পৰাজিত কৰি ত্ৰিপুৰাৰ জনসাধাৰণে বিজেপি নেতৃত্বাধীন কেন্দ্ৰীয় চৰকাৰৰ জন বিৰোধী নীতিৰ বিৰুদ্ধে এক মুখ্য ভূমিকা ল’ব,’’-আগৰতলাৰ পৰা ১৩৫ কিলোমিটাৰ দক্ষিণৰ সীমান্ত চহৰ ছাব্ৰুমত এখন নিৰ্বাচনী সভাত ভাষণ দি চিপিআই-এমৰ পুলিটব্যুৰো সদস্যগৰাকীয়ে এইদৰে কয়।
‘’বিজেপিয়ে সদায় দাবী কৰে যে ই ভাৰতৰ আটাইতকৈ বেছি ৰাষ্ট্ৰীয়তাবাদী দল। অৱশ্যে, ত্ৰিপুৰা বিধানসভাৰ নিৰ্বাচনত ই জনজাতি ইণ্ডিজেনিয়াছ পীপুলছ ফ্ৰন্ট অফ ত্ৰিপুৰাৰ সৈতে মিত্ৰতা কৰিছে যাৰ সন্ত্ৰাসবাদী সংগঠনৰ সৈতে সম্পৰ্ক আছে আৰু এখন শান্তিপূৰ্ণ ৰাজ্যক অস্থিৰ কৰাৰ চেষ্টা চলাই আছে।‘’
ত্ৰিপুৰাৰ ৬০ জনীয়া বিধানসভাৰ ২০ টা সমষ্টি জনজাতিৰ বাবে আৰু ১০ টা অনুসূচীত জাতিৰ বাবে সংৰক্ষিত। বিজেপিয়ে আইপিএফটিক ৯ খন জনজাতিৰ বাবে সংৰক্ষিত আসন আগবঢ়াইছে।
কাৰাটে প্ৰধানমন্ত্ৰী নৰেন্দ্ৰ মোডীৰ সাফল্যৰ দাবীৰ বিপৰীতে কয় যে যোৱা ৪ বছৰত বিভিন্ন খণ্ডত ১০ লাখতকৈয়ো কম যুৱক-যুৱতীয়ে চাকৰি লাভ কৰিছে আৰু বেছিভাগেই ব্যক্তিগত খণ্ডত।
দেশৰ বিকাশ, কৃষকৰ সমস্যা সমাধান, বৰ্দ্ধিত নিবনুৱা সমস্যা আদি ক্ষেত্ৰত বাওঁপন্থী দলৰ ‘’বিকল্প নীতি’’ৰ কথা উল্লেখ কৰি বাওঁপন্থী নেতাগৰাকীয়ে কয় যে যদি কেন্দ্ৰীয় চৰকাৰখনে ২০১৯ ৰ সাধাৰণ নিৰ্বাচনতো ক্ষমতা হস্তগত কৰে তেতিয়াহ’লে দেশখনৰ ভৱিষ্যৎ ‘বিধ্বস্ত’ হৈ পৰিব।
‘’ বিজেপিয়ে ত্ৰিপুৰাৰ ৰাজনৈতিক পৰিৱেশৰ কথা বুজিব পৰা নাই… আন ৰাজ্যত তেওঁলোকে বিধায়ক আৰু ভোটাৰক কিনিবলৈ চেষ্টা কৰে, কিন্তু ত্ৰিপুৰাত সেইটো সম্ভৱ নহয়,’’-কাৰাটে কয়।
ত্ৰিপুৰাত নিৰ্বাচনী প্ৰচাৰৰ বাবে চিপিআই-এমৰ পুলিটব্যুৰো সদস্য বৃন্দা কাৰাট, বিমান বসু, দলৰ পশ্চিমবংগৰ সাধাৰণ সম্পাদক সূৰ্যকান্ত মিশ্ৰ, দলৰ নেতা হান্নান মোল্লাৰ লগতে চিপিআই-এমৰ সাধাৰণ সম্পাদক সীতাৰাম য়েচুৰীয়ে দলৰ প্ৰাৰ্থীসকলৰ বাবে ৰাজ্যখনত ভ্ৰমণ কৰিছে।
৬০ জনীয়া ত্ৰিপুৰা বিধানসভাৰ নিৰ্বাচনৰ বাবে অহা ১৮ ফেব্ৰুৱাৰীত ভোটগ্ৰহণ আৰু অহা ৩ মাৰ্চত ভোটগণনা অনুষ্ঠিত হ’ব।
