পাণবজাৰত ব্ৰহ্মপুত্ৰ নদীৰ পাৰৰ টিলাত থকা পুৰণি জিলা উপায়ুক্তৰ আৱাসগৃহটো নতুন ৰূপত আটকধুনীয়াকৈ সজাই-পৰাই তুলিছে গুৱাহাটী মহানগৰ উন্নয়ন প্ৰাধিকৰণে। পৰ্যটকক আকৰ্ষণ কৰাৰ বাবে নতুন ৰূপত আটকধুনীয়াকৈ সজাই-পৰাই তোলা পুৰণি জিলা উপায়ুক্তৰ আৱাসগৃহটোৰ নামকৰণ কৰা হৈছে বহ্নিমানঃ ব্ৰহ্মপুত্ৰ নদী ঐতিহ্য কেন্দ্ৰ হিচাপে। ‘বহ্নিমান’ মুকলি হোৱাৰ পিছতে ৰাজ্য তথা গুৱাহাটীৰ পৰ্যটন ক্ষেত্ৰত নতুনকৈ সংযোজিত হ’ব জিলা উপায়ুক্তৰ এই পুৰণি আৱাসগৃহটো।
উল্লেখযোগ্য যে ৮০ বছৰ পূৰ্বে বৃটিছসকলে পাণবজাৰৰ ব্ৰহ্মপুত্ৰ পাৰত এই আৱাসটোক নিৰ্মাণ কৰিছিল। বৃটিছ বিষয়া থকাৰ বাবে নিৰ্মাণ কৰা অসম আৰ্হিৰ এই আৱাসগৃহটো স্বাধীনতাৰ পিছত উপায়ুক্তৰ আৱাসগৃহ হিচাপে ব্যৱহাৰ কৰা হয়।
পিছত উক্ত গৃহটো ব্যৱহাৰৰ অনুপযোগী হৈ পৰাত জিলা উপায়ুক্ত থকাৰ বাবে ৰাজভৱনৰ ওচৰত ব্ৰহ্মপুত্ৰ নদীৰ পাৰত জিলা উপায়ুক্তৰ বাবে নতুন আৱাসগৃহ নিৰ্মাণ কৰা হয়। এই নতুন আৱাস গৃহটোত উপায়ুক্তই থাকিবলৈ লোৱাৰে পৰা পাণবজাৰত থকা জিলা উপায়ুক্তৰ পুৰণি আৱাস গৃহটো পৰিত্যক্ত ৰূপ পায়।
এনেদৰে কেইবাবছৰ আৱাসগৃহটো পৰিত্যক্ত অৱস্থাত থকাৰ পিছত পূৰ্বৰ কংগ্ৰেছ নেতৃত্বাধীন ৰাজ্য চৰকাৰখনে ইয়াক নতুন ৰূপত সজাই ঐতিহ্য কেন্দ্ৰ হিচাপে গঢ়ি তোলাৰ বাবে আগবাঢ়ি আহে আৰু আৱাসটোক বস্ত্ৰ-হস্ততাঁত ঐতিহ্য কেন্দ্ৰ আৰু শৈক্ষিক কেন্দ্ৰ হিচাপে গঢ়ি তোলাৰ বাবে মহানগৰ উন্নয়ন প্ৰাধিকৰণক দায়িত্ব দিয়ে, সেই মতে গুৱাহাটী উন্নয়ন বিভাগে এই কামৰ বাবে মহানগৰ উন্নয়ন প্ৰাধিকৰণক ২০১২-১৩ চনত ৭ কোটি ৪৬ লাখ টকাৰ বিত্তীয় অনুমোদন দিছিল।
কিন্তু ইয়াৰ সংৰক্ষণ আৰু সংবৰ্দ্ধনৰ কাম ২০১৪ চনৰ আৰম্ভণিৰ পৰাহে আৰম্ভ হয়। এই কাম ২০১৫ চনৰ ভিতৰত সম্পূৰ্ণ কৰাৰ সময় নিৰ্দ্ধাৰণ কৰা হৈছিল যদিও তদানীন্তন কংগ্ৰেছ চৰকাৰে কামখিনিৰ বাবদ সময় মতে ধন মোকলাই নিদিয়াৰ বাবে উপায়ুক্তৰ পুৰণি আৱাসগৃহটোৰ সংৰক্ষণ আৰু সংবৰ্দ্ধনৰ কাম স্থবিৰ হৈ পৰে।
এনেদৰে দুবছৰ কাম বন্ধ হৈ থকাৰ পিছত বিজেপি নেতৃত্বাধীন মিত্ৰজোঁট চৰকাৰখনে বন্ধ হৈ থকা উপায়ুক্তৰ পুৰণি আৱাসগৃহটোৰ কামৰ ২০১৭ চনত নতুন গতি দিয়ে।
এই সন্দৰ্ভত উন্নয়ন প্ৰাধিকৰণৰ এক সূত্ৰই জনাই যে আৱাসগৃহটো ব্ৰহ্মপুত্ৰ নদী ঐতিহ্য কেন্দ্ৰলৈ উন্নীত কৰাৰ কাম সম্পূৰ্ণ হৈছে। মাথোঁ এতিয়া কেন্দ্ৰটোত এ চি সংযোগৰ কাম কিছু বাকী আছে। এই কামখিনি সম্পূৰ্ণ হৈ উঠিলেই কেন্দ্ৰটো পৰ্যটক আৰু দৰ্শনাৰ্থীৰ বাবে মুকলি কৰা হ’ব।
উল্লেখ্য যে ৯ কোটি ৬৯ লাখ টকা ব্যয়সাপেক্ষে সংৰক্ষণ আৰু সংবৰ্দ্ধন কৰা আৱাসগৃহটোৰ ওচৰতে টিকট ঘৰ, ৰেষ্টোৰাঁ, জিৰণি ঘৰ, শৌচাগাৰ, প্ৰস্ৰাৱাগাৰ, নিৰ্মাণ কৰা হৈছে। তাৰোপৰি এখন মুকলি মঞ্চ আৰু ব্ৰহ্মপুত্ৰ নদীৰ নৈসৰ্গিক সৌন্দৰ্য চোৱাৰ বাবে তিনিটা ভিউ পইণ্টো (বহা ঠাই) নিৰ্মাণ কৰা হৈছে। ইয়াৰ উপৰি গাড়ী পাৰ্কিঙৰ বাবে থাকিব পাৰ্কিং আস্থান।
ব্ৰহ্মপুত্ৰ নদী ঐতিহ্য কেন্দ্ৰ হিচাপে গঢ়ি তোলা আৱাসটোৰ ভিতৰচ’ৰাত ব্ৰহ্মপুত্ৰৰ ইতিহাস, বৰ্তমান, উৎপত্তি আৰু ব্ৰহ্মপুত্ৰৰ সাংস্কৃতিক দিশবোৰৰ আলোকচিত্ৰ, নক্সাৰে দেখুওৱাৰ ব্যৱস্থা কৰাৰ লগতে গুৱাহাটীৰ পুৰণি ঐতিহ্য সম্বলিত আলোকচিত্ৰ, পুৰণি জিলা উপায়ুক্তৰ আৱাসটোৰ পুৰণি আলোকচিত্ৰ প্ৰদৰ্শনৰ ব্যৱস্থা তথা অসমৰ বস্ত্ৰ আৰু হস্ততাঁত শিল্পক কেন্দ্ৰটোৰ জৰিয়তে তুলি ধৰাৰ ব্যৱস্থা কৰা হৈছে।
আৱাসগৃটো সংৰক্ষণ কৰাৰ ক্ষেত্ৰত আধুনিক আচ-বাব ব্যৱহাৰ কৰা হোৱা নাই, বৰঞ্চ ইয়াৰ নিৰ্মাণৰ সময়ত ব্যৱহাৰ কৰা সামগ্ৰীবোৰেৰে গৃহটোক নতুন ধৰণেৰে সংৰক্ষণ কৰা হৈছে বুলি আৱাসগৃটোৰ সংৰক্ষণ আৰু সংবৰ্দ্ধনৰ কাম কৰা এজন কৰ্মচাৰীয়ে জানিবলৈ দিয়ে।
এই সকলোৰে লগতে ‘বহ্নিমান’ শীৰ্ষক ব্ৰহ্মপুত্ৰ নদী ঐতিহ্য কেন্দ্ৰৰ চাৰিওফালে গঢ়ি তোলা আটকধুনীয়া উদ্যানখনে জিলা উপায়ুক্তৰ পুৰণি আৱাসগৃহটোক যেন এক নতুন যৌৱন দিছে।
