গুৱাহাটীবাসীয়ে খোৱাপানীৰ সমস্যাৰ লগতে অন্যান্য ব্যৱহাৰ্য্য পানীৰ অভাৱত দীৰ্ঘদিন ধৰি নানান সমস্যাৰ সন্মুখীন হোৱাৰ বাবে তথা খোৱাপানী যোগান আঁচনিৰ নামত ব্যাপক বিত্তীয় কেলেংকাৰিৰ অনতিপলমে তদন্ত কৰাৰ দাবীত আজি মহানগৰ উন্নয়ন সমিতিয়ে ভঙাগড় উৰণীয়া সেঁতুৰ তলৰ পৰা এক প্ৰতিবাদী সমদল বাহিৰ কৰে।
প্ৰতিবাদকাৰীসকলে গুৱাহাটী মহানগৰ উন্নয়ন প্ৰাধিকৰণৰ ভঙাগড়স্থিত মুখ্য কাৰ্য্যালয়লৈকে সমদল কৰি গৈ কাৰ্য্যালয়ৰ গেইটৰ সন্মুখত প্ৰায় আধাঘণ্টা ধৰি প্ৰতিবাদী কাৰ্য্যসূচী ৰূপায়ণ কৰে।
ইয়াৰোপৰি তেওঁলোকে গুৱাহাটী মহানগৰ উন্নয়ন প্ৰাধিকৰণৰ মুখ্য কাৰ্য্যবাহী বিষয়াক সাক্ষাৎ কৰি তেওঁৰ জৰিয়তে ৬টা দাবী সম্বলিত এখন স্মাৰক পত্ৰ মুখ্য মন্ত্ৰীলৈ প্ৰেৰণ কৰে।
মহানগৰ উন্নয়ন সমিতিৰ দাবীসমূহ ক্ৰমে, ‘’জি এম ডি এ-ৰ অধীনৰ আঁচনিসমূহৰ বিত্তীয় কেলেংকাৰিৰ তদন্ত কৰা, গুৱাহাটী মহানগৰৰ নাগৰিকৰ খোৱাপানী সংকট আঁতৰ কৰাৰ বাবে জি এম ডি এ-ৰ অন্তৰ্গত চাৰিওটা বৃহৎ পানীযোগান আঁচনিৰ কাম শীঘ্ৰে সম্পূৰ্ণ কৰা, আঁচনিসমূহ সম্পূৰ্ণ নোহোৱা পৰ্য্যন্ত বৰ্তমানে চলি থকা বিভিন্ন পানী যোগান আঁচনিসমূহ কাৰ্য্যক্ষম কৰি ৰখা, মহানগৰৰ ভিতৰত বৰ্তমানে চলি থকা জনস্বাস্থ্য কাৰিকৰী বিভাগৰ ক্ষুদ্ৰ আঁচনিসমূহ কাৰ্য্যক্ষম কৰি তোলা আৰু কৰ্মচাৰীৰ মজুৰি বিভাগীয়ভাৱে আদায় দিয়া ইত্যাদি।
শুকুৰবাৰে পুৱা ১১ বজাৰ পৰা আৰম্ভ হোৱা এই প্ৰতিবাদী কাৰ্য্যসূচীত অংশগ্ৰহণ কৰা সমিতিৰ সাধাৰণ সম্পাদক বীৰেন শৰ্মাই নৰ্থ-ইষ্ট নাওক জনায় যে গুৱাহাটীৰ দক্ষিণ-পশ্চিম অঞ্চলৰ ১০৭ এমএলডি আঁচনিখন JNNURM অৰ্থ্যাৎ জৱাহৰলাল নেহৰু ৰাষ্ট্ৰীয় নগৰ পুনঃনবীকৰণ মিছনৰ অৰ্থ সাহায্যত ২০০৯ চনতে আৰম্ভ হৈছিল। কিন্তু আঁচনিখনৰ কাম আজি পৰ্য্যন্ত সম্পূৰ্ণ কৰি ৰাইজক পানী যোগান ধৰিব নোৱাৰিলে।
আনহাতে, কংগ্ৰেছ চৰকাৰৰ লেখীয়াকৈ বৰ্তমানৰ বিজেপি চৰকাৰৰ দিনতো পানী যোগানৰ কামত নিয়োজিত বিষয়াসকলৰ দ্বাৰা ধন আত্মসাৎ কৰাৰ গুৰুতৰ অভিযোগ তোলে উন্নয়ন সমিতিৰ সাধাৰণ সম্পাদকগৰাকীয়ে।
তেওঁ লগতে কয়, “দক্ষিণ গুৱাহাটীৰ ১৯১ এম এল ডি আঁচনিখন আৰু উত্তৰ গুৱাহাটীৰ ৩৭ এম এল ডি আঁচনি দুখন ‘জাইকা বেংকৰ’ ঋণ সাহায্যত একেলগে ২০১১ চনৰ মাৰ্চৰ পৰা কাম আৰম্ভ কৰিছিল যদিও এতিয়াও প্ৰকল্পটোৰ মাত্ৰ ৫০ শতাংশ কামহে সম্পূৰ্ণ হ’ল।”
আনহাতে, ২০১৬ চনত গুৱাহাটী-দক্ষিণ-পূব অঞ্চলক সামৰি আৰম্ভ হোৱা ১৪৭ এম এল ডি আঁচনিখনৰ প্ৰসংগ উল্লেখ কৰি তেওঁ লগতে কয় “সেই আঁচনিৰ কামৰ অগ্ৰগতি দুখ লগা। কেতিয়া শেষ হ’ব কোনেও নিশ্চিতভাৱে ক’ব পৰা নাই।”
তদুপৰি সমিতিৰ সাধাৰণ সম্পাদকগৰাকীয়ে কৰা অভিযোগ অনুসৰি মহানগৰীৰ বেছিভাগ অঞ্চলতে দিনে মাত্ৰ এঘণ্টা বা দুঘণ্টা সময়হে পানী যোগান ধৰে।
তেওঁৰ মতে, “চৰকাৰে এহাতে নতুন বৃহৎ পানী যোগান আঁচনিৰ দ্বাৰা ২৪x৭ খোৱাপানী যোগান ধৰাৰ প্ৰতিশ্ৰুতি ৰক্ষা কৰিব পৰা নাই, আনহাতে পুৰণি আঁচনিকেইটাৰ পৰা যি অলপ-অচৰপ পানী ৰাইজে পাই আছিল সেই আঁচনিকেইখনকো ভালকৈ পৰিচালনা কৰিব পৰা নাই।”
আনহাতে, চৰকাৰে ‘স্মাৰ্ট চিটিৰ’ প্ৰকল্পৰ অধীনত ‘ৱাটাৰ এ টি এম’ স্থাপন কৰা কাৰ্য্যৰ বিৰোধিতা কৰাৰ লগতে প্ৰতিবাদকাৰীসকলে এই প্ৰকল্পই চৰকাৰী পৃষ্ঠপোষকতাত খোৱাপানীক বিক্ৰয়যোগ্য পণ্যত পৰিণত কৰিব বিচৰা হৈছে বুলিও মত পোষণ কৰে।
প্ৰতিবাদকাৰীসকলৰ মতে “এই আঁচনিখন ৰূপায়ণ কৰিলে খোৱাপানীৰ সমস্যাত জৰ্জৰিত মহানগৰৰ বাসিন্দাসকলে প্ৰতি লিটাৰত ৫ টকাকৈ খোৱাপানী ক্ৰয় কৰিব লাগিব।”
তেওঁলোকে লগতে দাবী কৰে যে, মহানগৰৰ যিবোৰ অঞ্চলত বৰ্তমান খোৱাপানী যোগানৰ কোনো ধৰণৰ ৰাজহুৱা ব্যৱস্থা নাই সেই অঞ্চলসমূহত ‘ৱাটাৰ এ টি এম’ৰ দ্বাৰা ন্যূনতম প্ৰয়োজনীয় খোৱা পানী বিনামূলীয়াকৈ বিতৰণ কৰিব লাগে।
প্ৰায় অৰ্ধ শতাধিক প্ৰতিবাদকাৰীয়ে অংশগ্ৰহণ কৰা আজিৰ এই প্ৰতিবাদী কাৰ্য্যসূচীত প্ৰতিবাদকাৰীসকলে সোণোৱাল চৰকাৰ হায়-হায়, ‘পানী যোগান আঁচনিত হোৱা কেলেংকাৰিৰ উচিত তদন্ত কৰক’ ইত্যাদি শ্ল’গান দিয়ে।
