বোকাখাত মহকুমাৰ নুমলীগড়ত ধনশিৰি নদীৰ বাঢ়নী পানীয়ে সংহাৰী ৰূপ ধাৰণ কৰিছে ৷ এই বানত ইতিমধ্যে এজন লোকে প্ৰাণ হেৰুৱাৰ লগতে এজন লোকক পানীয়ে উটুৱাই নিয়ে ৷
আজি বিয়লিলৈকে ধনশিৰিৰ বানে নুমলীগড় অঞ্চলৰ মুঠ ১৮ খন গাওঁ প্লাৱিত কৰাৰ লগতে প্ৰায় ১৮ হেজাৰ লোক এই বানত ক্ষতিগ্ৰস্ত হৈছে। এই বানত নুমলীগড় অঞ্চলৰ প্ৰায় ২,২০৬ হেক্টৰ কৃষি ভূমিৰ ক্ষতি সাধন কৰাৰ বিপৰীতে ২,৮০০ পশুধনৰ বাবে সমস্যাৰ সৃষ্টি কৰিছে বুলি বোকাখাতৰ ৰাজহ বিভাগে জনাইছে ৷
ইপিনে বন্যাৰ্ত ৰাইজৰ উদ্ধাৰৰ বাবে মহকুমা প্ৰশাসনে এছ ডি আৰ এফক নিয়োজিত কৰিছে ৷ বাঢ়নী পানীয়ে ঠাই বিশেষে ৩৭ নং ৰাষ্ট্ৰীয় পথ বুৰাই পেলোৱাৰ বাবে পুৱাৰে পৰাই ৩৭ ৰাষ্ট্ৰীয় পথ যাতায়তৰ বাবে বন্ধ কৰি দিয়া হয় ৷
আনহাতে, নুমলীগড়ৰ পশ্চিম ধোদাঙৰ কৃষি বান্ধ ধনশিৰিৰ প্ৰৱল সোঁতে চিঙি নিয়ে। ইয়াৰ ফলত বহুকেইটা পৰিয়ালক ক্ষতিগ্ৰস্ত হোৱাৰ আশংকা কৰা হৈছে ৷ ঘটনাস্থলীত প্ৰৱল সোঁতৰ বাবে উদ্ধাৰকাৰী দল বৰ্তমানো উপস্থিত হ’ব পৰা নাই।
গোলাঘাট জিলাত সৃষ্টি হোৱা এই জলপ্ৰলয়ৰ বাবে নীপকোক জগৰীয়া কৰিছে মন্ত্ৰী অতুল বৰাই ৷ শীঘ্ৰে পানী বন্ধৰ বাবে দাবীও জনাইছে মন্ত্ৰী গৰাকীয়ে ৷ ধনশিৰি নদীৰ বানত এজন লোকৰ মৃত্যু হোৱাৰ উপৰিও পোনা বাউৰী নামৰ আন এজন ব্যক্তি পানীৰ সোঁতত উটি যোৱাৰ পিছত এতিয়ালৈকে সন্ধানহীন হৈ আছে।
নীপকোয়ে দৈয়াং ৰিজাৰভাৰৰ পানী মুকলি কৰি দিয়াৰ বাবেই এই জল প্ৰলয় হোৱা বুলি কোৱা হৈছে যদিও নাগালেণ্ডৰ চাকাবামা নামৰ স্থানত চিডজু নদীত ভূমি স্খলনৰ ফলত পানী আবদ্ধ হৈ পৰা বাবে শীঘ্ৰেই নদী খনৰ নামনি অঞ্চলৰ উপৰিও যোৰহাট আৰু গোলাঘাটৰ বিভিন্ন স্থানত জল প্ৰলয় হ’ব পাৰে বুলি ৩০ জুলাইতে সমুহ জিলা উপায়ুক্ত আৰু আৰক্ষী অধীক্ষকক লিখিতভাৱে অৱগত কৰিছিল নাগালেণ্ড চৰকাৰৰ সচিব ৰভিলাটো মৰেই ৷ চিডজু নদীৰ পানীও এই জলপ্ৰলয়ৰ অন্যতম কাৰণ হ’ব পাৰে বুলি জনাইছে বিভাগীয় সুত্ৰই ৷