মুখ্যমন্ত্ৰীৰ গৃহ চহৰ চাবুৱাত শুকুৰবাৰে নাগৰিকত্ব সংশোধনী বিধেয়কৰ বিৰুদ্ধে হাজাৰ হাজাৰ লোকে প্ৰতিবাদ সাৱ্যস্ত কৰে। ৰাজ্যখনৰ ৫৮ টা জনগোষ্ঠীৰ যৌথ উদ্যোগত আয়োজিত এই বিশাল প্ৰতিবাদী সমাৱেশত জাতিধ্বংসী বিধেয়কখনৰ বিৰুদ্ধে সৰৱ হৈ পৰে নেতসকল।
চাবুৱাৰ ডি ডি আৰ মহাবিদ্যালয়ৰ সমীপৰ ইয়ং ব্লু ক্লাৱ খেলপথাৰত অনুষ্ঠিত বিশাল গণ সমাৱেশত উপস্থিত সকলো শ্ৰেণীৰ ৰাইজে নাগৰিকত্ব বিধয়েকখন বাতিল নকৰা পৰ্যন্ত সংগ্ৰাম অব্যাহত ৰখাৰ সংকল্প গ্ৰহণ কৰে।
সদৌ মৰাণ ছাত্ৰ সন্থা, মটক যুৱ ছাত্ৰ সন্মিলন, কৃষক মুক্তি সংগ্ৰাম সমিতি, অসম জাতীয়তাবাদী যুৱ-ছাত্ৰ পৰিষদ, টাই আহোম ছাত্ৰ সন্থা, সদৌ চাহ জনজাতি ছাত্ৰ সন্থা, টাই আহোম যুৱ পৰিষদ, চুতীয়া জাতি ছাত্ৰ সন্থাকে ধৰি প্ৰায় ৫৮ টা জাতীয় জনগোষ্ঠীয় সংগঠনে সন্মিলিতভাৱে এই বিধেয়ক বিৰোধী কাৰ্যসূচী গ্ৰহণ কৰে।
সমাৱেশখনত ভাষণ দিয়ে বিশিষ্ট বুদ্ধিজীৱী ড০ অপূৰ্ব কুমাৰ বৰুৱা, বিশিষ্ট সাংবাদিক হাইদৰ হুছেইন, কৃষক নেতা অখিল গগৈ, মৰাণ ছাত্ৰ সন্থাৰ সভাপতি অৰুণ মৰাণ, মটক যুৱ ছাত্ৰ সন্মিলনৰ সভাপতি ডেভিদ চেতিয়া, মটক সন্মিলনৰ সম্পাদক কাজল শইকীয়া আদি ব্যক্তিসকলে।
বিশিষ্ট বুদ্ধিজীৱী ড০ অপূৰ্ব কুমাৰ বৰুৱাই কয় যে নাগৰিকত্ব সংশোধনী বিধেয়কৰ জৰিয়তে অসমীয়া জাতিৰ সৰ্বকালৰ বৃহৎ ক্ষতি কৰিব বিচাৰিছে কেন্দ্ৰ বিজেপি চৰকাৰে। ঐক্যবদ্ধভাৱে আমি সংগ্ৰাম গঢ়ি তুলি অসমীয়া জাতিৰ অস্তিত্ব ৰক্ষা কৰিবই লাগিব।
সাংবাদিক হাইদৰ হুছেইনে ধৰ্ম নিৰ্বিশেষে বিদেশী বহিস্কাৰ কৰাৰ কথা উত্থাপন কৰি নাগৰিকত্ব সংশোধনী বিধেয়কৰ জৰিয়তে কেন্দ্ৰীয় চৰকাৰে অসমক ভাগ বাগ কৰিব খুজিছে বুলি কয়।
সমাৱেশত ভাষণ দি কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে কয় যে ভাৰতীয় ৰাষ্ট্ৰীয়তাবাদ থকাৰ পিছতে অসমীয়া জাতীয়তাবাদ হ’ল অসমীয়া জাতিৰ কাৰণে অধিক প্ৰাসংগিক। প্ৰব্ৰজনেৰে ভাৰাক্ৰান্ত অসমীয়া জাতিৰ ওপৰত নতুনকৈ বিদেশীৰ বোজা জাপি দিলে সেয়া মানি ল’বলৈ অসমীয়া জাতি কোনোপধ্যে মান্তি নহয়।
চাবুৱাৰ এই গণ সমাৱেশত ১৫,২৩১ খন স্মাৰক পত্ৰ যুটীয়া সংসদীয় সমিতিলৈ প্ৰেৰণ কৰাৰ সিদ্ধান্তও ঘোষণা কৰা হয়।
