নগাঁও জিলাৰ চামগুৰি আৰক্ষী থানাৰ অন্তৰ্গত মোৱামাৰি আৰক্ষী চকীৰ অন্তৰ্গত পশ্চিম মোৱামাৰি গাঁৱত এটা গঁড়ৰ খড়্গসহ দুই চোৰাংচিকাৰীক স্থানীয় লোকৰ সহযোগত আজি আৰক্ষীয়ে কৰায়ত্ত কৰিবলৈ সক্ষম হয়।
প্ৰাপ্ত তথ্য মতে কালি নিশা পশ্চিম মোৱামাৰি গাঁৱত একাংশ লোকে এগৰাকী নগা মহিলাসহ এজন মুছলিম সম্প্ৰদায়ৰ লোকক আটক কৰি জেৰা অব্যাহত কৰি উত্তপ্ত পৰিস্থিতিৰ সৃষ্টি কৰে। ফলত ঘটনাস্থলীত চামগুৰি আৰু মোৱামাৰি আৰক্ষী উপস্থিত হৈ জেৰা চলোৱা দুয়োগৰাকীক স্থানীয় লোকৰ পৰা চমজি লয়।
পৰবৰ্তী সময়ত আৰক্ষীয়ে কৰায়ত্ত কৰা চোৰাংব্যৱসায়ী আমিৰ হুছেইনৰ (২৭) স্বীকাৰোক্তিৰ ভিত্তিত পশ্চিম মোৱামাৰি গাঁৱৰ নিবাসী আব্দুল হাচিমৰ পুত্ৰ আমিৰ হুছেইনে ঘৰত লুকুৱাই থোৱা অৱস্থাত আৰক্ষীয়ে অভিযান চলাই এটা গঁড়ৰ খড়্গ জব্দ কৰিবলৈ সক্ষম হয়।
আনহাতে আটকাধীন নগা মহিলা গৰাকী হ’ল কাৰ্বি আংলং জিলাৰ বোকাজান আৰক্ষী থানাৰ অন্তৰ্গত লামা বস্তিৰ মৃত স্বামী ইন্দি চিংগটনৰ পত্নী আলিলা চিংগটন (৩১) বুলি জানিব পৰা গৈছে।
ইফালে চামগুৰি থানাত ৪৭০/১৮ নম্বৰৰ গোচৰ ৰুজু কৰি আজি দুই দুৰ্ধৰ্ষ চোৰাং খড়গ ব্যৱসায়ীক জেইল হাজোতলৈ প্ৰেৰণ কৰাৰ লগতে আৰক্ষীয়ে খড়গটো সঁচা নে নকল জানিবৰ বাব ফৰেনচিক পৰীক্ষাগাৰলৈ প্ৰেৰণ কৰিব বুলি আৰক্ষীৰ সূত্ৰৰ পৰা জানিব পৰা গৈছে।