কেন্দ্ৰীয় সংৰক্ষিত আৰক্ষী বাহিনী চমুকৈ চিআৰপিএফৰ ৪৯নং বেটচৰ ১৫ গৰাকী ৰাজপত্ৰিত শিক্ষাৰ্থী বিষয়াৰে শুকুৰবাৰে ৰাজভৱনত এক মত বিনিময় অনুষ্ঠানত অংশগ্ৰহণ কৰে অসমৰ ৰাজ্যপাল অধ্যাপক জগদীশ মুখীয়ে।
ৰাজ ভৱনৰ পৰা প্ৰকাশ কৰা এক বিবৃতি অনুসৰি মত বিনিময় অনুষ্ঠানটোৰ আৰম্ভণিতে চিআৰপিএফৰ শিক্ষাৰ্থী বিষয়া সকলক স্বাগতম জনায় ৰাজ্যপাল গৰাকীয়ে তেওঁলোকক দেশৰ স্বাৰ্থত নি:স্বাৰ্থভাৱে কাম কৰি যাবলৈ আহ্বান জনায়।
ৰাজ্যপাল গৰাকীয়ে লগতে ‘মোৰ দেশ প্ৰথম’ মনোভাবক জীৱনৰ ব্ৰত হিচাপে ল’বলৈ আহ্বান জনায় কঠিন শ্ৰমৰ জৰিয়তে তেওঁলোকৰ পেছাদাৰিত্ব বৃদ্ধিৰ বাবে পৰামৰ্শ দিয়ে।
উল্লেখ্য যে মত বিনিময় অনুষ্ঠানটোৰ জৰিয়তে অসমৰ ৰাজ্যপাল গৰাকীয়ে শিক্ষাৰ্থী বিষয়া সকলক তেওঁলোকৰ জ্ঞান আৰু কৌশল বৃদ্ধি কৰিবলৈ কৈ উজ্জ্বল ভৱিষ্যতৰ বাবে শুভকামনা যাচে।
চিআৰপিএফৰ শিক্ষামূলক ভ্ৰমণৰ অংশ হিচাপে ১৫ শিক্ষাৰ্থী বিষয়া কেইগৰাকীয়ে ৰাজ্যপাল মুখীক সাক্ষাৎ কৰে।
এনে ধৰণৰ মত বিনিময় অনুষ্ঠানে সামৰিক ক্ষেত্ৰৰ লগত জড়িত ব্যক্তি সকলৰ মনোবল বৃদ্ধি কৰি তেওঁলোকক দেশৰ সেৱাত ব্ৰতী হ’বলৈ উৎসাহিত কৰিব বুলি আশা কৰা হৈছে।