ৰাষ্ট্ৰীয় নাগৰিকপঞ্জীৰ চূড়ান্ত খচৰা প্ৰকাশ পোৱাৰ পাছত খচৰাৰ পৰা ৪০ লাখতকৈও অধিক লোকৰ নাম বাদ পৰাক কেন্দ্ৰ কৰি অসমৰ লগতে সমগ্ৰ ভাৰততে প্ৰতিক্ৰিয়া অব্যাহত আছে।
খচৰাৰ পৰা বহু প্ৰকৃত ভাৰতীয়ৰ নাম বাদ পৰা বুলি বিভিন্ন মহলে দাবী কৰি থকাৰ সময়তে এই ক্ষেত্ৰত ভাৰত চৰকাৰ, ভাৰতৰ মহাপঞ্জীয়ক আৰু এন আৰ চিৰ বিষয়ববীয়াসকলক দোষাৰোপ কৰিছে অসম বিধান সভাৰ বিৰোধী দলপতি দেৱব্ৰত শইকীয়াই।
মঙলবাৰে গুৱাহাটীৰ এখন হোটেলত সংবাদমেল সম্বোধন কৰি শইকীয়াই আজি উচ্চতম ন্যায়ালয়ৰ স্পষ্ট নিৰ্দেশনা থকাৰ পাছতো ১৯৭১ চনৰ বহু পূৰ্বৰে পৰা ভাৰতত থকাৰ প্ৰমাণ থকা বহু লোকৰ নাম খচৰাৰ পৰা বাদ পৰা ঘটনাত আশ্চৰ্য প্ৰকাশ কৰে।
তেওঁ কয়, “উচ্চতম ন্যায়ালয়ৰ মহামান্য ন্যায়াধীশ দুগৰাকীয়ে যোৱা ২০১৮ চনৰ ২৭ মাৰ্চত ৰাজ্যিক সমন্বয়ক আৰু ভাৰত চৰকাৰক এটা নিৰ্দেশ দিছিল যে ২০১৮-ৰ মে’ মাহৰ প্ৰথম সপ্তাহৰ ভিতৰত যদি আন ৰাজ্য বা বিভিন্ন ৰাজহুৱা খণ্ডৰ অধীনস্থ বেংক, বীমা কোম্পানী অথবা ৰাজ্যৰে বিভিন্ন জিলালৈ পৰীক্ষণৰ বাবে পঠোৱা নথিসমূহ ঘূৰি নাহে তেতিয়া হ’লে জিলা দণ্ডাধীশৰ এটা দল ঘৰে ঘৰে পঠিয়াই যিসকলৰ নথি অহা নাই তেওঁলোকৰ পৰীক্ষণৰ কাম সম্পন্ন কৰিব লাগে। আৰু ৩১ মেৰ ভিতৰত এই কামটো সম্পূৰ্ণ কৰিব লাগে।”
শইকীয়াই কয় যে উচ্চতম ন্যায়ালয়ৰ এনে নিৰ্দেশনা থকাৰ পাছতো এন আৰ চিৰ চূড়ান্ত খচৰা প্ৰকাশৰ পাছত ভাৰতৰ মহাপঞ্জীয়ক ড০ শৈলেশে আন ৰাজ্যৰ পৰা বহু নথি ঘূৰাই পঠোৱা নাই বুলি বিভিন্ন ৰাজ্যৰ চৰকাৰক দোষাৰোপ কৰিছে।
উল্লেখ্য যে, এন আৰ চিৰ ৰাজ্যিক সমন্বয়কৰ ফালৰ পৰা উচ্চতম ন্যায়ালয়ক জনোৱা হৈছিল যে ১০ লাখ ৬৭ হাজাৰ নথি বিভিন্ন ৰাজ্য, বিভিন্ন ৰাজহুৱা খণ্ডৰ অধীনস্থ বেংক, বীমা কোম্পানি অথবা আমাৰ ৰাজ্যৰে বিভিন্ন জিলালৈ সত্যাসত্য পৰীক্ষণৰ বাবে পঠোৱা হৈছে আৰু তাৰ মাত্ৰ ৩৭ শতাংশহে ঘূৰি আহিছে। যথেষ্ট সংখ্যক নথি ঘূৰি নহা বাবে পৰীক্ষণ প্ৰক্ৰিয়া আৰু অন্তৰ্ভূক্তিকৰণত পলম হৈছে।
এই সন্দৰ্ভত শইকীয়াই কয়, “উচ্চতম ন্যায়ালয়ে যিহেতু আন ৰাজ্যৰ পৰা নথি নাহিলেও এন আৰ চি কৰ্তৃপক্ষক কামখিনি সম্পূৰ্ণ কৰাৰ কৰ্তৃত্ব দিছিল, তাৰ পাছতো যিসকল লোক ১৯৪৮, ১৯৫৬, ১৯৬৪ চন আদিত পূব পাকিস্তানৰ পৰা বিভিন্ন কাৰণত ভাৰতলৈ আহিছিল বা যিসকলৰ তেতিয়াৰ নাগৰিকত্ব পঞ্জীয়কৰ পৰা লোৱা প্ৰমাণপত্ৰ আছে তেনে বহু লোকৰ নাম খচৰাৰ পৰা বাদ পৰিব নালাগিছিল।”
গতিকে এই ক্ষেত্ৰত তেওঁ ভাৰত চৰকাৰৰ লগতে, মহাপঞ্জীয়ক আৰু এন আৰ চি কৰ্তৃপক্ষক সম্পূৰ্ণৰূপে জগৰীয়া বুলি কয়।
তেওঁ লগতে ৰাজ্য আৰু কেন্দ্ৰীয় চৰকাৰক এন আৰ চিৰ ক্ষেত্ৰত থকা নিৰ্দেশনাসমূহ কিমান পূৰণ কৰিলে সেয়া এন আৰ চি কৰ্তৃপক্ষৰ যোগেদি উচ্চতম ন্যায়ালয়ত দাখিল কৰাৰো দাবী জনায়।
