অসম আন্দোলনৰ নেতা তথা ‘জাতীয় নায়ক’ সৰ্বানন্দ সোণোৱালৰ চৰকাৰৰ দিনত ঐতিহাসিক অসম আন্দোলনত প্ৰাণ আহুতি দিয়া চহিদো সাৰি নগ’ল দালাল চক্ৰৰ পৰা। মৰিগাওঁ জিলাৰ তিনিগৰাকী চহিদৰ নামত সংঘটিত হ’ল এই সাংঘাতিক দুৰ্নীতি। প্ৰকৃত চহিদৰ পৰিয়ালক বঞ্চিত কৰি ২০১৪ চনত মৃত্যু হোৱা লোকৰ নামতে পৰিয়ালে চৰকাৰত সক্ৰিয় হৈ থকা দালালৰ সহযোগত উলিয়াই নিলে অসম আন্দোলনৰ চহিদৰ বাবে দিয়া আৰ্থিক সাহায্য।
দেওবাৰে গুৱাহাটী প্ৰেছ ক্লাবত এখন সংবাদমেল অনুষ্ঠিত কৰি এই অভিযোগ কৰে সদৌ অসম চহিদ-নিৰ্যাতিত পৰিয়াল পৰিষদৰ সভাপতি লক্ষীকান্ত ৰায়ে।
উল্লেখযোগ্য যে অসম আন্দোলনত সক্ৰিয়ভাৱে জড়িত বহু নেতাৰে গঠিত চৰকাৰখনে শাসনলৈ আহিয়ে অসম আন্দোলনৰ চহিদসকলৰ পৰিয়ালৰ লোকলৈ ৫ লাখকৈ টকাৰ আৰ্থিক সাহায্য ঘোষণা কৰিছিল। কিন্তু এই আৰ্থিক সাহায্যক লৈ তেতিয়াই তৎপৰ হৈ পৰিছিল চৰকাৰৰ সৈতে সনাপোটোকা থকা কিছুমান দালাল। ফল স্বৰূপে এই সাহায্য প্ৰদানৰ ক্ষেত্ৰত সংঘটিত হ’ল এই দুৰ্ভাগ্যজনক কেলেংকাৰি। কেলেংকাৰিটোত সদৌ অসম জাতীয় চহিদ পৰিয়াল সমন্নয়ৰক্ষী পৰিষদৰ সভাপতি ৰাজেন ডেকা প্ৰত্যক্ষভাৱে জড়িত থকা বুলি আজি অভিযোগ কৰে লক্ষীকান্ত ৰায়ে।
অভিযোগ মতে দালাল চক্ৰটোৱে মুঠ তিনিজন চহিদৰ নামত ভুৱা তথ্য দি মুঠ ১৫ লাখ টকা চৰকাৰৰ পৰা উলিয়াই নিয়ে আৰু সেই দৰে তিনিটা চহিদ পৰিয়ালক বঞ্চিত কৰে।
লক্ষীকান্ত ৰায়ে এই অভিযোগ কৰে যে অসম আন্দোলনত মৰিগাঁৱত চহিদ হোৱা ৰামপদ ডেকাৰ পৰিয়ালে পাবলগীয়া ৰাজ্য চৰকাৰৰ আৰ্থিক সাহায্য লাভ কৰিলে জনৈক ৰাম ডেকা নামৰ লোকজনৰ পৰিয়ালে। তাৎপৰ্যপূৰ্ণ কথা যে অসম আন্দোলনৰ চহিদ বুলি পৰিচয় দিয়া এই ৰাম ডেকা নামৰ লোকজনৰ মৃত্যু হৈছিল ২০১৪ চনত। আশ্বৰ্যজনকভাৱে ৰাজ্য চৰকাৰে সাহায্য প্ৰদানৰ বাবে যুগুত কৰা তালিকাত চহিদ ৰামপদ ডেকাৰ নামটোও প্ৰকাশিত হ’ল ৰাম ডেকা হিচাপেহে।
দ্বিতীয়টো ঘটনাত মৰিগাওঁ জিলাৰে আন এগৰাকী চহিদ সুকোমল বৰাৰ নাম আৰু উপাধি সলাই আন এজন ব্যক্তিৰ পৰিয়ালে সাহায্য লাভ কৰে। ৰায়ে জনোৱা মতে চহিদ সুকোমল বৰাৰ নাম কোমল পাটৰ কৰি ৫ লাখ টকাৰ আৰ্থিক সাহায্য ল’লে কোমল পাটৰৰ পুত্ৰ হৰেন পাটৰে।
ইমানতো শেষ হোৱা নাই জাতীয় চহিদৰ নামত হোৱা দুৰ্নীতিৰ আখ্যান। মৰিগাঁৱৰে আন এগৰাকী চহিদ নন্দেশ্বৰ ডেকাৰ উপাধি সলনি কৰি পুত্ৰৰ পৰিচয় দি সাহায্য ল’লে চহিদগৰাকীৰ দূৰ-সম্পৰ্কীয় ভাগিন মংগল সিং কোঁৱৰে।
উল্লেখ্য যে, চহিদ নন্দেশ্বৰ ডেকাৰ কোনো উত্তৰাধিকাৰী নাছিল। কিন্তু ৰাজ্য চৰকাৰে ৫ লাখ টকাৰ আৰ্থিক সাহায্য প্ৰদান কৰাৰ বেলিকা চহিদ নন্দেশ্বৰ ডেকাৰ উপাধি সলাই নন্দেশ্বৰ কোঁৱৰ কৰি তেওঁক মংগল সিং কোঁৱৰৰ পিতৃ বুলি চিনাকি দিয়া হ’ল।
ইতিমধ্যে এই সমগ্ৰ ঘটনা সন্দৰ্ভত সদৌ অসম চহিদ-নিৰ্যাতিত পৰিয়াল পৰিষদে মুখ্য মন্ত্ৰীক তদন্তৰ দাবী কৰি স্মাৰকপত্ৰ প্ৰদান কৰা বুলিও সভাপতি লক্ষীকান্ত ৰায়ে আজি সাংবাদিকক জানিবলৈ দিয়ে।
ইয়াৰ উপৰি ৰাজ্য চৰকাৰে জাতীয় চহিদসকলৰ পৰিয়ালক ৫ লাখ টকাৰ আৰ্থিক সাহায্য দিয়াৰ সমান্তৰালকৈ নিৰ্যাতিত সকলক ২ লাখ টকাৰ আৰ্থিক সাহায্য দিয়াৰ কথা ঘোষণা কৰিছিল যদিও নিৰ্যাতিত সকলে এই সাহায্য নোপোৱাৰ অভিযোগ কৰে সদৌ অসম চহিদ-নিৰ্যাতিত পৰিয়াল পৰিষদে। তাৰ বিপৰীতে বহু চহিদৰ পৰিয়ালৰ সদস্যই চৰকাৰী চাকৰি পোৱাৰ পাছতো চৰকাৰী সাহায্য পোৱা বুলি কৈ এই প্ৰক্ৰিয়াটোৰ বিৰোধিতা কৰে লক্ষীকান্ত ৰায়ে।
