দেওবাৰে গোলাঘাট জিলাৰ দেৰগাওঁ আৰক্ষী থানাৰ অন্তৰ্গত বাদুলীপাৰত সংঘটিত এক ভয়াবহ পথ দুৰ্ঘটনাৰ ফলত দুজনকৈ যুৱকৰ মৃত্যু হয়।
প্ৰাপ্ত তথ্য মতে দেওবাৰে এখন এল্ট’ আৰু এখন মটৰচাইকেল মুখামুখি সংঘৰ্ষত পতিত হয়। ফলত বলোৰাম পেগু (৩৮) আৰু দেবাংগ পেগু (৩৫) নামৰ মটৰচাইকেল আৰোহী দুজন গুৰুতৰভাৱে আঘাতপ্ৰাপ্ত হয়।
গুৰুতৰভাৱে আঘাতপ্ৰাপ্ত দুয়ো যুৱককে তাৎক্ষণিকভাৱে যোৰহাট চিকিৎসালয়লৈ প্ৰেৰণ কৰে যদিও চিকিৎসকে দুয়োকে মৃত ঘোষণা কৰে৷
আনহাতে মৃত বলোৰাম পেগু ৰঙামাটি মৌজাৰ দুসুঁতিমুখ আঞ্চলিকৰ মিচিং কিমাক কেবাং নামৰ সংগঠনটোৰ সভাপতি আছিল বুলি জানিব পৰা গৈছে। দুয়োজন যুৱকৰ মৃত্যুত দুসুঁতিমুখ অঞ্চলত শোকাকুল পৰিৱেশে বিৰাজ কৰিছে।
মন কৰিব লগীয়া যে বিভিন্ন সময়ত ৩৭ নং ৰাষ্ট্ৰীয় ঘাইপথত সংঘটিত দুৰ্ঘটনাৰ ফলত বহু কেইজন লোকে অকালতে প্ৰাণ হেৰুৱাব লগীয়া হৈছে। ইয়াৰ বিপৰীতে যান-বাহন শাখাৰ আৰক্ষীয়ে দুৰ্ঘটনা প্ৰতিৰোধৰ ক্ষেত্ৰত কোনো ধৰণৰ পদক্ষেপ গ্ৰহণ কৰা নাই।
