এতিয়াৰ পৰা কিনা-বেচাৰ এখন অনলাইন মঞ্চ পাব অসমৰ ৰাইজে, যিখন মঞ্চ সাজু কৰি আগ বঢ়াইছে শ্বিভাৰষ্টীল প্ৰাইভেট লিমিটেডে। প্ৰতিষ্ঠানটোৰ গৰাকী অৰিন্দম শইকীয়াই তেওঁৰ নিজা পৰিকল্পনা আৰু পৰিশ্ৰমৰ বিনিময়ত এই অনলাইন মাৰ্কেট ছাইটটো অলপতে সাজু কৰি তুলিছে।
যোৱা ৯ মে’ত এইটো আনুষ্ঠানিকভাৱে মুকলি কৰা হয়। http://kaaaz.in লিংকটোত ক্লিক কৰি ইচ্ছুকসকলে এই প্লেটফৰ্মটোৰ বিষয়ে জানিব পাৰিব। অৰিন্দম শইকীয়াই জনোৱামতে প্ৰথম অৱস্থাত ইয়াৰ পৰীক্ষামূলক অপাৰেইশ্যন উজনি অসমৰ অঞ্চলত, বিশেষকৈ ডিব্ৰুগড় আৰু কাষৰীয়া জিলাকেইখনত চলাব বুলি জনাইছে।
এই অনলাইন প্লেটফ’ৰ্মৰ জৰিয়তে খাদ্য সামগ্ৰীৰ পৰা আৰম্ভ কৰি ইলেকট্ৰিচিয়ান, বিউটিচিয়ান, গাড়ী ভাৰা, আদি সেৱাৰো অৰ্ডাৰ দিব পাৰিব।
আনহাতে তেওঁ জনোৱামতে, কেৱল ক্ৰয় কৰা বা অৰ্ডাৰ দিয়াই নহয়, ইয়াৰ জৰিয়তে বিক্ৰীও কৰিব পাৰিব। পাচলি, ফল-মূল আদিৰ বিক্ৰেতায়ো এই প্লেটফ’ৰ্মটো ব্যৱহাৰ কৰি লাভ উঠাব পাৰিব।
“যদি কোনোবাই শাক-পাচলি, ফল-মূল, আচাৰ, চাম আদি বিক্ৰী কৰিব খোজে, তেওঁলোকে ‘কাজ’ৰ মাধ্যমত সেইটো কৰিব পাৰিব।” অৰিন্দম শইকীয়াই কয়। ব্ৰেকফাষ্টৰ পৰা স্কুলীয়া ছাত্ৰ-ছাত্ৰীৰ টিফিনো অৰ্ডাৰ দিব পাৰিব। ইয়াত অসমৰ লগতে উত্তৰ ভাৰতীয়, দক্ষিণ ভাৰতীয় খাদ্যও পাব।
উল্লেখযোগ্য যে অৰিন্দমে অষ্ট্ৰেলিয়াৰ কুইন্সলেণ্ড বিশ্ববিদ্যালয়ৰ পৰা ফুড টেকন’ল’জিত স্নাতক ডিগ্ৰী লৈছে। তেওঁ অসম কৃষি বিশ্ববিদ্যালয়ৰ উদ্যান-শস্য বিভাগৰ অধ্যাপক অনন্ত শইকীয়া আৰু লীনা শইকীয়াৰ পুত্ৰ।