নাগৰিকত্ব সংশোধনী বিধেয়কৰ বিৰুদ্ধে একেলগে ডিব্ৰুগড়ৰ ৰাজপথত থিয় হ’ল অগপৰ শীৰ্ষ নেতৃত্ব। ডিব্ৰুগড়ৰ পুৰণা চৰকাৰী বালক উচ্চ মাধ্যমিক বিদ্যালয়ৰ পৰা ওলিওৱা বৃহৎ প্ৰতিবাদী সমদলটোত প্ৰাক্তন মুখ্য মন্ত্ৰী প্ৰফুল্ল মহন্ত, কৃষি মন্ত্ৰী অতুল বৰা, জলসম্পদ মন্ত্ৰী কেশব মহন্ত, ফনি ভুষণ চৌধুৰী, বিৰেন্দ্ৰ প্ৰসাদ বৈশ্য, কমলা কলিতা, হিৰণ্য কোঁৱৰৰ লগতে কেইবাগৰাকী অগপ বিধায়কে অংশ গ্ৰহণ কৰে।
সমাবেশত বিজেপিক কঠোৰ সমালোচনা কৰি প্ৰফুল্ল মহন্তই কয় যে হিন্দু বাংলাদেশীক নাগৰিকত্ব প্ৰদানৰ জৰিয়তে বিজেপিয়ে অসমৰ সমাজ জীৱন ধ্বংস কৰাৰ কূট কৌশল ৰচিছে।
তেওঁ কয়, ‘বাংলাদেশত বহু হিন্দুলোকে বহু বছৰ ধৰি বাস কৰি আছে আৰু তেওঁলোকে তাত দুৰ্গা পুজাও উদযাপন কৰি আহিছে, তেনেস্থলত বিজেপিয়ে হিন্দু বাংলাদেশীক নাগৰিকত্ব দিয়াৰ কি কাৰণ আছে?’
‘অসমৰ খিলঞ্জীয়াৰ বাবে ভাবুকি স্বৰূপ এই বিধেয়কখনৰ আমি তীব্ৰ বিৰোধিতা কৰো আৰু ইয়াক শীঘ্ৰে প্ৰত্যাহাৰ কৰিবলৈ বিজেপিক দাবী জনাইছো।‘ তেওঁ কয়।
আনহাতে কৃষি মন্ত্ৰী অতুল বৰাই কয়, ‘অসম চুক্তিক উলংঘা কৰা নাগৰিকত্ব সংশোধনী বিধেয়কক আমি বিৰোধিতা কৰো। নিৰ্বাচনৰ পুৰ্বে বিধেয়কখনকলৈ বিজেপিৰ সৈতে আমাৰ বুজাবুজি আছিল কিন্তু এতিয়া তেওঁলোকে বিধেয়কখনৰ সমৰ্থন কৰিছে। আমি বিজেপিৰ মিত্ৰজোঁটত আছো যদিও জাতিধ্বংসী বিধেয়কখনৰ বিৰোধিতা কৰি যাম।‘
তেওঁ লগতে কয়, ‘অসম চুক্তি অনুসৰি ২৪ মাৰ্চ ১৯৭১ চনৰ পিছত অসমত প্ৰৱেশ কৰা যিকোনো লোককে অবৈধ বিদেশী হিচাপে গণ্য কৰা উচিত, লাগিলে তেওঁ যি ধৰ্মৰে নহওক কিয়।‘
জলসম্পদ মন্ত্ৰী কেশৱ মহন্তই বিধেয়কখনৰ বিৰোধিতা কৰি কয়, ‘বিজেপি শাসনাধিস্থ কেন্দ্ৰীয় চৰকাৰে হিন্দু বাংলাদেশীক অসমলৈ অনাৰ পৰিকল্পনা কৰি আছে যিটো অসমৰ খিলঞ্জীয়া লোকৰ বাবে এক ভাবুকি।’
প্ৰতিবাদকাৰী সকলে হাতে হাতে বিভিন্ন প্লে’কাৰ্ড আৰু বেনাৰ লৈ নগৰখনৰ মুখ্য পথসমূহৰ মাজেৰে সমদল উলিয়াই চৌকিডিঙি খেলপথাৰত সমবেত হয়। বিধেকখন প্ৰত্যাহাৰৰ দাবীত বিভিন্ন শ্ল’গানেৰে তেওঁলোকে পৰিৱেশ উত্তাল কৰি তোলে।