নাগৰিকত্ব সংশোধন বিধেয়ক ( Citizenship Amendment Bill ) সন্দৰ্ভত মতামত লোৱাৰ বাবে গ্ৰহণ কৰা যুটীয়া সংসদীয় সমিতিৰ বিৰোধিতা নকৰিবলৈ অসমৰ ৰাইজক আহ্বান জনাইছে মুখ্য মন্ত্ৰী সৰ্বানন্দ সোণোৱালে।
বিজেপিৰ শীৰ্ষ নেতৃত্বক লগ কৰিবলৈ আজি ১৯ এপ্ৰিলত দিল্লীত উপস্থিত হোৱাৰ পিছতে সোণোৱালে কয়, ‘যুটীয়া সংসদীয় সমিতি গঠন এক গণতান্ত্ৰিক প্ৰক্ৰিয়া। সমিতিয়ে সহযোগ কৰিব, সেয়ে সকলো শ্ৰেণীৰ লোককে ইয়াৰ বিৰোধিতা নকৰিবলৈ মই আহ্বান জনালো।’
মুখ্য মন্ত্ৰীৰ ঘনিষ্ঠ সূত্ৰই জনোৱা মতে বিধেয়কখনক লৈ অসমত লগা ব্যাপক হৈ-চৈৰ পৰিপ্ৰেক্ষিতত বিধেয়কখনক লৈ সৃষ্টি হোৱা পৰিস্থিতি সম্বন্ধে সোণোৱালে দলৰ সভাপতি অমিত শ্বাহৰ লগতে শীৰ্ষ নেতৃত্বক অৱগত কৰিব।
উল্লেখযোগ্য যে যোৱা সপ্তাহত কেন্দ্ৰীয় গৃ্হ মন্ত্ৰী ৰাজনাথ সিং আৰু যুটীয়া সংসদীয় সমিতিৰ অধ্যক্ষ ৰাজেন্দ্ৰ আগৰৱালাক লগ কৰি ৰাজ্যৰ পৰিস্থিতি সম্পৰ্কে অৱগত কৰিছিল।
ধৰ্মৰ ভিত্তিত বিদেশীক ভাৰতৰ নাগৰিকত্ব প্ৰদানৰ বাবে কেন্দ্ৰৰ বিজেপি চৰকাৰে অনা নাগৰিকত্ব সংশোধন বিধেয়কক লৈ অসমত প্ৰায়ভাগ দল-সংগঠনে সৰ্বাত্মক বিৰোধিতা কৰাৰ পৰতে আজি ১৯ এপ্ৰিলত নতুন দিল্লীত মুখ্য মন্ত্ৰীগৰাকীয়ে জনোৱা এই আহ্বান তাৎপৰ্য্যপূৰ্ণ বুলি বিবেচিত হৈছে। তাৰোপৰি সমিতিৰ অধ্যক্ষ হিচাপে ৰাজেন্দ্ৰ আগৰৱালাক নিযুক্তি দিয়াটো ৰাজ্যৰ একাংশ সংগঠনে বিৰোধিতা কৰিছে।
আনহাতে অসমৰ প্ৰাক্তন মুখ্য মন্ত্ৰী তৰুণ গগৈয়েও আজি বিধেয়কখন সন্দৰ্ভত অসম চৰকাৰৰ স্থিতি ৰাজহুৱা কৰাৰ বাবে দাবী জনাইছিল।
সূত্ৰ অনুসৰি অসম মন্ত্ৰীসভাৰ সম্প্ৰসাৰণ সন্দৰ্ভটো মুখ্য মন্ত্ৰীয়ে শীৰ্ষ নেতৃত্বৰে আলোচনা কৰাৰ সম্ভাৱনা আছে। সোণোৱালে ‘আমি যদি মন্ত্ৰীসভা সম্প্ৰসাৰণ কৰো, অসমৰ ৰাইজে সংবাদ মাধ্যমৰ যোগেদি এই বিষয়ে নিশ্চিতভাৱে গম পাব।’
