অসমৰ প্ৰায় সকলো দল-সংগঠনে বিৰোধিতা কৰা বিতৰ্কিত নাগৰিকত্ব সংশোধন বিধেয়ক ২০১৬ ( Citizenship Amendment Bill )ক লৈ ৰাজ্যত উদ্ভৱ হোৱা পৰিস্থিতি সন্দৰ্ভত অৱগত কৰাৰ বাবে আজি ১৯ এপ্ৰিলত নতুন দিল্লীত বিজেপিৰ সভাপতি অমিত শ্বাহক লগ কৰিব মুখ্য মন্ত্ৰী সৰ্বানন্দ সোণোৱালে।
মুখ্য মন্ত্ৰীৰ ঘনিষ্ঠ সূত্ৰই জনোৱা মতে বিধেয়কখনক লৈ অসমত লগা ব্যাপক হৈ-চৈৰ পৰিপ্ৰেক্ষিতত বিধেয়কখনক লৈ সৃষ্টি হোৱা পৰিস্থিতি সম্বন্ধে সোণোৱালে দলৰ সভাপতিৰ লগতে শীৰ্ষ নেতৃত্বক অৱগত কৰিব।
উল্লেখযোগ্য যে যোৱা সপ্তাহত কেন্দ্ৰীয় গৃ্হ মন্ত্ৰী ৰাজনাথ সিং আৰু যুটীয়া সংসদীয় সমিতিৰ অধ্যক্ষ ৰাজেন্দ্ৰ আগৰৱালাক লগ কৰি ৰাজ্যৰ পৰিস্থিতি সম্পৰ্কে অৱগত কৰিছিল।
অসম বিজেপিৰ ভিতৰুৱা সূত্ৰ যদি সঁচা হয় তেন্তে ক’ব পাৰি যে সোণোৱালে দলৰ শীৰ্ষ নেতৃত্বৰ ওচৰত বিধেয়কজনিত সামগ্ৰিক ছবিখন দাঙি ধৰিব।
যোৱা ১৭ এপ্ৰিলত দিল্লীত হোৱা শুনানিত অসমৰ ১৬ টা খিলঞ্জীয়া সংগঠনে বিধেয়কখনৰ সৰ্বাত্মক বিৰোধিতা কৰিছিল।
দিল্লীত থকা সময়চোৱাত মুখ্য মন্ত্ৰীয়ে আন কেবাগৰাকী নেতা তথা কেন্দ্ৰীয় মন্ত্ৰীক লগ কৰাৰো সম্ভাৱনা আছে।
