নাগৰিকত্ব সংশোধনী বিধেয়ক ২০১৬ বাতিলৰ দাবীত ৰাজ্যজুৰি প্ৰতিবাদ- বিক্ষোভ অব্যাহত থকাৰ মাজতে আজি তিনিচুকীয়াত অৱস্থান ধৰ্মঘট কাৰ্যসূচী পালন কৰে টাই আহোম যুৱ পৰিষদ আৰু টাই আহোম মহিলা পৰিষদৰ তিনিচুকীয়া জিলা সমিতিয়ে।
সংগঠন দুটাৰ আহ্বানত আজি বহু সংখ্যক লোক তিনিচুকীয়া জিলা উপায়ুক্তৰ কাৰ্যালয়ৰ সন্মুখত সমৱেত হৈ নাগৰিকত্ব সংশোধনী বিধেয়কখনৰ তীব্ৰ বিৰোধিতা কৰে।
প্ৰতিবাদকাৰীসকলে কেন্দ্ৰীয় চৰকাৰ হায় হায়, ৭১ৰ পাছত অহা বাংলাদেশীৰ বোজা অসমে কেতিয়াও গ্ৰহণ নকৰে, হিন্দু বাংলাদেশীৰ সংস্থাপনক মানি লোৱা নহ’ব, ৰাজ্য চৰকাৰ হায় হায় আদি ধ্বনি দি উপায়ুক্তৰ কাৰ্যালয় চৌহদ উত্তপ্ত কৰি তোলে।
উল্লেখযোগ্য যে প্ৰধানমন্ত্ৰী নৰেন্দ্ৰ মোডীয়ে বিগত লোকসভা নিৰ্বাচনৰ প্ৰচাৰ সভাত অংশগ্ৰহণ কৰাৰ সময়ত ১৬ মে’ৰ পাছত অসমৰ পৰা বাংলাদেশীয়ে টালি টোপোলা বান্ধি পলাব লাগিব বুলি ঘোষণা কৰিছিল।
কিন্তু ৰাজ্য আৰু কেন্দ্ৰত বিজেপিৰ চৰকাৰ চলি থকাৰ সময়তে নাগৰিকত্ব সংশোধনী বিধেয়ক ২০১৬ৰ অচিলাৰে অসমত হিন্দু বাংলাদেশী সংস্থাপনৰ যি কুচকাৱাজ আৰম্ভ কৰিছে সেয়া চিন্তনীয়।
সেয়েহে ৰাজ্যৰ প্ৰায়বোৰ দল- সংগঠনে জাতিধ্বংসী বিধেয়কখনৰ বিৰোধিতা কৰি ৰাজপথলৈ ওলাই আহিবলৈ বাধ্য হৈ পৰিছে। ইয়াৰ সৈতে সংগতি ৰাখি আজি তিনিচুকীয়া জিলাত টাই আহোম যুৱ পৰিষদ আৰু টাই আহোম মহিলা পৰিষদে অৱস্থান ধৰ্মঘট পালন কৰাটো যথেষ্ট তাৎপৰ্যপূৰ্ণ।
