ৰাজ্যজুৰি নাগৰিকত্ব সংশোধনী বিধেয়ক ২০১৬ৰ বিৰুদ্ধে অব্যাহত আছে প্ৰতিবাদ- বিক্ষোভৰ জুই। ইতিমধ্যে ৰাজ্যখনৰ সৰ্বস্তৰৰ জনসাধাৰণে বিতৰ্কিত বিধেয়কখনৰ বিৰুদ্ধে মাৰবান্ধি ওলাই আহি সাব্যস্ত কৰিছে তীব্ৰ প্ৰতিবাদ।
ইয়াৰ মাজতে বিধেয়কখন সন্দৰ্ভত মন্তব্য কৰি চৰ্চাৰ মাজলৈ আহিছে অসম প্ৰদেশ বিজেপিৰ সভাপতি ৰঞ্জিত দাস।
আজি কাজিৰঙাত এই বিধেয়কখন সন্দৰ্ভত অসম প্ৰদেশ বিজেপিৰ সভাপতি ৰঞ্জিত দাসে কয়— ‘নাগৰিকত্ব সংশোধনী বিধেয়ক ২০১৬ অসমৰ ৰাইজে বুজি পোৱা নাই ৷ এই সন্দৰ্ভত যুক্তিপূৰ্ণ আলোচনা হোৱা নাই ৷ ৩০ জুনৰ পাছত ৰাজ্যিক বিজেপিয়ে নিজা মন্তব্য প্ৰকাশ কৰিব’।
বিতৰ্কিত বিষয়টো সন্দৰ্ভত ৰঞ্জিত দাসৰ মন্তব্যই ৰাজ্যত পুনৰ ৰাজনৈতিক ধুমুহাৰ সৃষ্টি কৰাৰ সম্ভাৱনা আছে। উল্লেখযোগ্য যে অহা ৩০ জুনত প্ৰকাশ পাব ৰাষ্ট্ৰীয় নাগৰিকপঞ্জীৰ অন্তিম খচৰা। তাৰ পূৰ্বে ৰঞ্জিত দাসৰ মন্তব্য যথেষ্ট তাৎপৰ্যপূৰ্ণ। আনহাতে ইন্ধনজাত সামগ্ৰীৰ মূল্যবৃদ্ধি আন্তঃৰাষ্ট্ৰীয় বজাৰত হোৱা বৃদ্ধিৰ বাবেই হৈছে বুলি মন্তব্য কৰি দাসে।
উল্লেখযোগ্য যে বিগত কিছুদিন ধৰি অসমৰ বিভিন্ন দল-সংগঠন, শিল্পী- সাহিত্যিক, বুদ্ধিজীৱী, সাংবাদিক, জ্যেষ্ঠ নাগৰিক, গায়ক, অভিনেতা- অভিনেত্ৰী, ছাত্ৰ-ছাত্ৰী ৰাজপথলৈ ওলাই আহি বিতৰ্কিত বিধেয়কখনৰ বিৰুদ্ধে প্ৰতিবাদ সাব্যস্ত কৰিছে। সম্প্ৰতি সমাজৰ সৰ্বস্তৰৰ লোক সৰৱ হৈ পৰিছে বিজেপি চৰকাৰৰ অসম ধ্বংসকাৰী সিদ্ধান্তৰ বিৰুদ্ধে৷
