ৰঙালী বিহুৰ মাত্ৰ এদিন পূৰ্বে ঘৰখনৰ মূল মানুহজনেই আত্মহত্যা কৰিছে, তেওঁৰ চাৰিটি সন্তান আৰু পত্নীক অথাই সাগৰত পেলাই থৈ। এটা পৰিয়ালৰ বাবে ইয়াতকৈ কিবা দুৰ্ভাগ্য আৰু মৰ্মান্তিক কথা থাকিব পাৰে নে? চৰম দাৰিদ্ৰ্যই হতাশাৰ অতল গভীৰলৈ ঠেলি দিয়াত আত্মহত্যাৰ পথ বাছি লোৱা এই সৎ, সৰলমতীয়া এই ব্যক্তিজন হ’ল মৰিগাওঁ জিলাৰ লাহৰীঘাট উন্নয়ন খণ্ডৰ অন্তৰ্গত কাঠনি গাওঁ পঞ্চায়তৰ সভাপতি কিৰণ বসুমতাৰী। বসুমতাৰীয়ে ১২ এপ্ৰিলৰ নিশা গাধোৱা ঘৰত সোমাই বিষপাণ কৰি আত্মহত্যা কৰে। সংকটজনক অৱস্থাত বসুমতাৰীক প্ৰথমে মৰিগাওঁ অসামৰিক চিকিৎসালয়লৈ আৰু তাৰ পাছত গুৱাহাটী চিকিৎসা মহাবিদ্যালয় আৰু চিকিৎসালয়লৈ নিয়া হৈছিল যদিও নাবাচিল।
জানিব পৰামতে বসুমতাৰীয়ে আনবোৰ পঞ্চায়ত প্ৰতিনিধিৰ দৰেই যোৱা ৪৩ মাহে দৰমহা পোৱা নাছিল। তেওঁ চাৰিটা সন্তানৰ সৈতে মথাউৰিত বাস কৰে। নিজৰ ঘৰ কাহানিবাৰ পৰাই নাছিল। গৰাখহনীয়াত ৪ বাৰকৈ তেওঁ ভেটি হেৰুৱাইছিল। ভেটি হেৰুওৱা বাবে তেওঁ চাৰিটা সন্তান, পত্নীৰ সৈতে বহু দিনৰ পৰাই মথাউৰিতে বাস কৰিছিল। নিজে পঞ্চায়তৰ সভাপতি যদিও অত্যন্ত সৎ কিৰণ বসুমতাৰীয়ে নিজৰ ভেটিৰ মাটি টুকুৰাও যোগাৰ কৰিব পৰা নাছিল। কাৰণ পঞ্চায়তৰ সভাপতি হিচাপে তেওঁ পায় মাত্ৰ ৫ হাজাৰমান টকাৰ পাৰিতোষিক।
কিন্তু সেইকেইটা টকাও আজি বিগত ৪৩ মাহ ধৰি পোৱা নাছিল। ফলত তীব্ৰ আৰ্থিক সংকটত তেওঁ মানসিকভাৱে ভাগি পৰিছিল। অৱশেষত ৰঙালী বিহুৰ সময়ত নিজৰ সন্তান আৰু পত্নীৰ আগত মুখ উলিয়াবলৈ নিবিচাৰিলে কিৰণ বসুমতাৰীয়ে। এই ৰূঢ় বাস্তৱক তেওঁ চিৰবিদায় দিলে, লগতে বিদায় জনালে সকলো দায়-দায়িত্বক। নিঠৰুৱা হ’ল এটা শতদাৰিদ্ৰ্য পীড়িত পৰিয়াল।
কিৰণ বসুমতাৰীৰ আত্মহত্যাই জোকাৰি গৈছে স্থানীয় অঞ্চলটোক। কিন্তু ৰাইজে প্ৰশ্ন কৰিছে- কিৰণ বসুমতাৰীৰ আত্মহত্যাই জোকাৰিব পাৰিব নে চৰকাৰৰ অন্তৰ? জোকাৰিব পাৰিব নে নিজৰ দৰমহা ৫০ শতাংশ বঢ়াই লোৱা মন্ত্ৰী-বিধায়কসকলৰ? নিজৰ দৰমহা বঢ়াই লওঁতে সামান্য পৰিমাণৰ পাৰিতোষিক পোৱা পঞ্চায়তৰ প্ৰতিনিধিসকলৰ কথা মনত নপৰিল কিয় এইসকল জনপ্ৰতিনিধিৰ?
মন কৰিব লগীয়া কথাটো হ’ল কিৰণ বসুমতাৰী অত্যন্ত সৎ জন প্ৰতিনিধি হিচাপে অঞ্চলটোত জনাজাত আছিল। তেওঁ বিভিন্ন সামাজিক কামতো আগ ৰণুৱা আছিল। তেওঁ কাৰো পৰা এপইচাও লোৱাৰ কথা ভাবিব নোৱাৰিছিল। অত্যন্ত অভাৱত দিন পাৰ কৰিলেও চৰকাৰী ধনৰ সামান্য অংশ এটাও তেওঁ চান নাকাঢ়িছিল। যি সময়ত ৰাজ্যৰ বিয়াগোম বিয়াগোম নেতা-পালিনেতা, বিষয়াই চৰকাৰী ধনৰ সিংহভাগ কুক্ষিগত কৰি বিলাসী জীৱন কটাইছে, সেই সময়ত কিৰণ বসুমতাৰীৰ দৰে এজন সৎ জন প্ৰতিনিধিয়ে নিজৰ প্ৰাপ্যখিনিও নাপাই আত্মহত্যা কৰিব লগীয়া হোৱাটো দুৰ্ভাগ্যজনক।