ডিমা হাচাও জিলাৰ মাইবাং মহকুমাৰ অন্তৰ্গত খেজুৰবন্দ-খেপ্ৰে পথৰ মেৰামতি আৰু জিলাখনৰ গাঁও অঞ্চলত বিদ্যুৎ সেৱা প্ৰদান কৰাৰ দাবীত আমৰণ অনশনত বহা ডিমাচা এপেক্স বডি জাদিখে নাইশ্ব হচ’মৰ প্ৰতিষ্ঠাপক সভাপতি বহিমচন্দ্ৰ লাংঠাছাই মাইবাং মহকুমা প্ৰশাসনৰ পৰা আশ্বাস পাই অনশন কাৰ্যসূচী উঠাই লয়।
মাইবাং মহকুমা প্ৰশাসনৰ ফালৰ পৰা সহকাৰী আয়ুক্ত গৌৰবকুমাৰ দাস উপস্থিত হৈ লাংঠাছাৰ দাবীৰ প্ৰতি সহাঁৰি জনাই অনশন উঠাই ল’বলৈ অনুৰোধ জনোৱাত বহিমচন্দ্ৰ লাংঠাছাই চৰ্ত সাপেক্ষে অনশন কাৰ্যসূচী প্ৰত্যাহাৰ কৰে।
অনশন কাৰ্যসূচী উঠাই লৈ বিশিষ্ট নাগৰীক গৰাকীয়ে তেওঁ তোলা দাবীসমূহ পূৰণ কৰিবলৈ চৰকাৰক এমাহৰ সময়সীমা বান্ধি দিয়ে। এমাহৰ ভিতৰত যদি চৰকাৰে কোনো ব্যৱস্থা গ্ৰহণ নকৰে তেন্তে তেওঁ পুনৰ হাফলং জিলা উপায়ুক্ত কাৰ্যালয় চৌহদত অনশনত বহিব বুলিও হুংকাৰ দিয়ে।
লাংঠাছাই ড০ হিমন্ত বিশ্ব শৰ্মাৰ উদ্দেশ্যে লিখা বিভিন্ন দাবী সম্বলিত এখন স্মাৰকপত্ৰ মাইবাং মহকুমা প্ৰশাসনৰ ফালৰ পৰা সহকাৰী আয়ুক্ত গৌৰবকুমাৰ দাসৰ হাতত অৰ্পণ কৰে।