“বিদেশীক ৱৰ্ক পাৰ্মিট দিয়াৰ বিৰুদ্ধে অসমত যিধৰণে প্ৰতিবাদ হ’ব লাগিছিল, সেইটো হোৱা নাই। চাৰিওফালে নাগৰিকত্ব সংশোধনী বিধেয়কৰ বিৰুদ্ধে যি ধৰণে প্ৰতিবাদ হৈছে, সেই ধৰণে এই ৱৰ্ক পাৰ্মিটৰ বিৰোধিতাত প্ৰতিবাদ হোৱা দেখা নাই।”
মঙলবাৰে কইনাধৰাস্থিত বাসগৃহত এখন সংবাদমেল আয়োজন কৰি এই মন্তব্য কৰে প্ৰাক্তন মুখ্য মন্ত্ৰী তৰুণ গগৈয়ে।
উল্লেখযোগ্য যে কিছুদিনৰ আগত এন আৰ চি উন্নীতকৰণ প্ৰক্ৰিয়াটো বিষয়ত দিল্লীত হোৱা এখন আলোচনাচক্ৰত প্ৰাক্তন গৃহ সচিব জে কে পিল্লায়ে প্ৰস্তাৱ দিছিল যে বিদেশীসকলক ৱৰ্ক পাৰ্মিট দিব লাগে।
পিল্লাইৰ মন্তব্যৰ প্ৰসংগত গগৈয়ে কয় “তেওঁ সাধাৰণ মানুহ নহয়, গৃহ বিভাগৰ প্ৰাক্তন মুখ্য সচিব।”
আনহাতে, অতলবিহাৰী বাজপেয়ীয়ে যেতিয়া বিদেশীবিলাকক ৱৰ্ক পাৰ্মিট দিয়াৰ বাবে প্ৰস্তাৱ দিছিল, তেওঁ সেই প্ৰস্তাৱত সমৰ্থন দিয়া নাছিল বুলি গগৈয়ে সংবাদমেলত জানিবলৈ দিয়ে।
তদুপৰি বিজেপি চৰকাৰে এই ক্ষেত্ৰত দুতলীয়া ভূমিকা লোৱা বুলি উল্লেখ কৰি গগৈয়ে কয় “এতিয়া বিজেপি চৰকাৰে এফালে কংগ্ৰেছে ভোটৰ আশাত বিদেশীক আশ্ৰয় দিলে বুলি কয়, আনফালে আকৌ বিদেশীক ৱৰ্ক পাৰ্মিট দিব লাগে বুলি কয়।”
তাৎপৰ্য্যপূৰ্ণভাৱে গগৈয়ে অসম গণ পৰিষদেও বিষয়টোত আওকাণ কৰিছে বুলি কটাক্ষ কৰি কয়, “অসম গণ পৰিষদেও ৱৰ্ক পাৰ্মিট দিব নালাগে বুলিতো কোৱা নাই। লগতে তেওঁলোকে বিৰোধিত কৰাও দেখা নাই।”
“ৱৰ্ক পাৰ্মিট দিয়াৰ যি প্ৰস্তাৱ আহিছে, তাৰ আমি বিৰোধিতা কৰিছো। নাগৰিকত্ব সংশোধনী বিধেয়কে যিধৰণে বিপদত পেলাব ৱৰ্ক পাৰ্মিট প্ৰদান কৰিলেও সেই একেটাই ক্ষতি হ’ব।” গগৈয়ে সংবাদমেলত কয়।
গগৈয়ে বিষয়টো গুৰুত্বসহকাৰে লৈ সৰ্বানন্দ সোণোৱালক এই সন্দৰ্ভত স্থিতি স্পষ্ট কৰিবৰ বাবে আহ্বান জনায়।
