অল ইণ্ডিয়া ইউনাইটেড ডেম’ক্ৰেটিক ফ্ৰন্ট (এআইইউডিএফ)ৰ মুৰব্বী বদৰুদ্দিন আজমলে মন্তৱ্য কৰিছে যে হিন্দু বাংলাদেশীৰ ক্ষেত্ৰত কংগ্ৰেছ আৰু বিজেপিৰ স্থিতি ‘’একেটা মুদ্ৰাৰে দুই পিঠি’’ ৰ দৰে।
‘’কংগ্ৰেছ আৰু বিজেপি একেটা মুদ্ৰাৰে দই পিঠি। দুয়োটা দলেই অসমত হিন্দু বাংলাদেশীসকল অসমত থকাটো বিচাৰে,’’-এআইইউডিএফৰ সভাপতি তথা লোকসভাৰ সাংসদ আজমলে এনেদৰে কয়।
তেওঁ কয় যে ২০১১ চনৰ বিধানসভাৰ নিৰ্বাচনত তেতিয়াৰ মুখ্যমন্ত্ৰী তথা জ্যেষ্ঠ কংগ্ৰেছী নেতা তৰুণ গগৈয়ে কৰিমগঞ্জৰ এখন নিৰ্বাচনী সভাত হিন্দু বাংলাদেশীক নাগৰিকত্ব দিয়াৰ সমৰ্থনত ভাষণ দিছিল।
আজমলে কয় যে প্ৰাক্তন মুখ্যমন্ত্ৰী গগৈৰ বক্তৱ্যই ২০১১ চনত বৰাক উপত্যকাত ১৪ টা বিধানসভা সমষ্টিত বিজয়ী হোৱাত সহায় কৰিছিল।
তেওঁ কয় যে বিজেপিয়ে গগৈৰ পদাংক অনুসৰণ কৰিছিল আৰু ২০১৬ চনত হিন্দু বাংলাদেশীসকলক নাগৰিকত্ব দিয়াৰ সমৰ্থন কৰিছিল।
‘’সেয়ে, এনেকুৱা পৰিস্থিতিত কংগ্ৰেছ আৰু বিজেপিৰ মাজত পাৰ্থক্য ক’ত? ইয়াৰ বিপৰীতে আমাৰ দলে সদায়েই স্থিতি প্ৰকাশ কৰি আহিছে যে ১৯৭১ চনৰ ২৫ মাৰ্চৰ পিছত অসমত অবৈধভাৱে প্ৰৱেশ কৰা যিকোনো ধৰ্মৰ ব্যক্তিকে ইয়াত থাকিবলৈ দিয়া উচিত নহয়’’, -প্ৰসিদ্ধ আগৰ ব্যৱসায়ীগৰাকীয়ে কয়।
আজমলে লগতে কয় যে কংগ্ৰেছে ‘’এআইইউডিএফৰ জনপ্ৰিয়তা বৃদ্ধিৰ বাবে হতাশ হৈ পৰিছে।‘’
উল্লেখযোগ্য যে কংগ্ৰেছৰ বিগত পোন্ধৰ বছৰীয়া শাসনকালত তদানীত্বন মুখ্যমন্ত্ৰী তৰুণ গগৈ আৰু এআইইউএফৰ নেতাগৰাকীৰ মাজত তীব্ৰ বাক্ যুদ্ধ চলিছিল।
অসমৰ ধৰ্মীয় সংখ্যালঘু ভোটাৰক লৈ কংগ্ৰেছ আৰু এআইইউডিএফৰ মাজত সংঘাত দীৰ্ঘদিনীয়া। দুয়োটা দলেই ধৰ্মীয় সংখ্যালঘুসকলৰ ত্ৰাণকৰ্তা হিচাপে নিজকে দাবী কৰি আহিছে যদিও এআইইউডিএফৰ উত্থানৰ পিছত কংগ্ৰেছৰ স্থিতি ধৰ্মীয় সংখ্যালঘু অঞ্চলত যথেষ্ট হ্ৰাস পাইছে।
