বিধানসভাৰ উপাধ্যক্ষৰ দায়িত্বৰ পৰা পদত্যাগ কৰি পত্ৰ দিয়াৰ প্ৰায় তিনি মাহৰ পিছত দিলীপ কুমাৰ পালৰ এই পত্ৰ গ্ৰহণ কৰা হৈছে বুলি জানিবলৈ দিছে অধ্যক্ষই হিতেন্দ্ৰ নাথ গোস্বামীয়ে।
উল্লেখযোগ্য যে যোৱা ৮ মে’তে দিলীপ কুমাৰ পালে তেওঁৰ পদত্যাগ পত্ৰ দাখিল কৰিছিল। ৮ মে’ৰ পূৰ্বেও কেইবাবাৰো তেওঁ দায়িত্বৰ পৰা অব্যাহতি বিচাৰি অনুৰোধ কৰি আহিছিল অধ্যক্ষক। পদত্যাগ পত্ৰত তেওঁ ব্যক্তিগত আৰু পাৰিবাৰিক জীৱনক অধিক সময় দিয়াৰ বাবে এই সিদ্ধান্ত বুলি জনালেও প্ৰকৃত কাৰণ আছিল বিধায়কজনে বিগত বিধানসভাৰ নিৰ্বাচনৰ সময়ত হিন্দু বাংলাদেশীক নাগৰিকত্ব প্ৰদানৰ হকে যুঁজ দিম বুলি সমষ্টিবাসীক দিয়া প্ৰতিশ্ৰুতি পালনৰ ব্যৰ্থতা। পিছত শিলচৰত এখন সভাত তেওঁ সেই কথা নিজ মুখে স্বীকাৰো কৰিছিল।
কিন্তু হিন্দু বাংলাদেশীক নাগৰিকত্ব দিয়া বাদ, নিজৰ পত্নীৰ নামেই নাহিল এন আৰ চিৰ চূড়ান্ত খচৰাত। যোৱা ৩০ জুলাইত প্ৰকাশিত এন আৰ চিৰ চূড়ান্ত খচৰাত দিলীপ পালৰ নাম থাকিলেও তেওঁৰ পত্নী অৰ্চনা পালৰ নাম নাই বুলি জানিব পৰা গৈছে।
আনহাতে বিধানসভাৰ অধ্যক্ষ হিতেন্দ্ৰনাথ গোস্বামীয়ে জনোৱামতে, পৰৱৰ্তী অধিৱেশনৰ পূৰ্বে এজন নতুন উপাধ্যক্ষ নিযুক্তি দিয়া হ’ব।