চৰকাৰে নাগৰিকত্ব সংশোধনী বিধেয়ক ২০১৬ বাতিল নকৰিলে মাজুলীৰ পৰা ৰক্তাক্ত আন্দোলনৰ আৰম্ভ হ’ব বুলি হুংকাৰ দিছে মাজুলী জিলা ছাত্ৰ সন্থাই।
মাজুলী জিলা ছাত্ৰ সন্থাৰ আহ্বানত যুৱ ছাত্ৰ পৰিষদ, মাজুলী মহিলা সমিতি, টি এম পি কে, চুতীয়া ছাত্ৰ সন্থা, মাজুলী জিলা সাহিত্য সভা, জ্যেষ্ঠ নাগৰিক সন্থা তথা মাজুলীবাসীয়ে আজি মাজুলী গড়মূৰ মিনি ষ্টেডিয়ামৰ পৰা গড়মূৰৰ মাজেৰে এক বিশাল প্ৰতিবাদী সমদল উলিয়ায়।
নাগৰিকত্ব সংশোধনী বিধেয়ক ২০১৬ বাতিলৰ দাবীত উলিওৱা এই প্রতিবাদী সমদলকাৰীয়ে হাতে হাতে প্লেকাৰ্ড লৈ বিজেপি চৰকাৰ হুচিয়াৰ, মুখ্যমন্ত্ৰী মিছলীয়া আদি শ্লগানেৰে আকাশ বতাহ উত্তাল কৰি তোলে।
প্ৰতিবাদী সমদলৰ পিছত গড়মূৰত আৰম্ভ হয় প্ৰতিবাদী সভা । এই সভাতে ছাত্ৰ সন্থাৰ যোৰহাট জিলাৰ সভাপতি গৰাকীয়ে হুংকাৰ দিয়ে যে এই নাগৰিকত্ব সংশোধনী বিধেয়ক ২০১৬ বাতিল নকৰিলে মাজুলীৰ পৰাই আৰম্ভ হব ৰক্তাক্ত আন্দোলনৰ।
সম্প্ৰতি অসমৰ তিনি কোটি জনসাধাৰণক প্ৰভাৱিত কৰা এই বিধেয়ক এক জ্বলন্ত সমস্যাত পৰিণত হৈছে। ৰাজ্য তথা দেশৰ সকলো ৰাজনৈতিক দল আৰু বিভিন্ন ছাত্ৰ সংগঠন, যুৱ সংগঠন তথা ৰাজহুৱা অনুষ্ঠান – প্ৰতিষ্ঠানে এই বিধায়কখনৰ তীব্ৰ বিৰোধিতা কৰিছে।
নাগৰিকত্ব আইন সংশোধনী বিধেয়ক ২০১৬ ই এনআৰচি উন্নীতকৰণৰ মূল উদ্দেশ্যটোকেই বাধাগ্ৰস্ত কৰিব আৰু ই হ’ব ১৯৮৫ চনৰ ঐতিহাসিক অসম চুক্তিৰ চূড়ান্ত উলংঘন।
অসম চুক্তিৰ পিছত জাতি ধৰ্ম বৰ্ণ নিৰ্বিশেষে অসমৰ সকলো শ্ৰেণীৰ লোকে শান্তি আৰু সম্প্ৰীতিৰে বসবাস কৰি আহিছে। এই নাগৰিকত্ব আইন সংশোধনী বিধেয়ক ২০১৬ খন ভাৰতবৰ্ষৰ সংবিধানৰ মূল আদৰ্শৰ পৰিপন্থী। লগতে এই নাগৰিকত্ব আইন সংশোধনী বিধেয়ক ২০১৬ খনে ৰাজ্য পুনৰ গঠন আইন, ১৯৫৬ ৰ মূল আদৰ্শক ধ্বংস কৰিব।
নাগৰিকত্ব আইন সংশোধনী বিধেয়ক ২০১৬ ই সমাজৰ সকলো শ্ৰেণীৰ লোকৰ মাজত উদ্বিগ্নতা আৰু ক্ষোভ, অসন্তষ্টিৰ সৃষ্টি কৰিছে । যিহেতু ১৯৭১ চনৰ ২৫ মাৰ্চৰ আগলৈকে অসমলৈ অহা প্ৰব্ৰজনকাৰী সকলক সকলো পক্ষই গ্ৰহণ কৰিছে, গতিকে এতিয়া কোনো কাৰণতে অসমে নতুন প্ৰব্ৰজনকাৰীৰ বোজা বহন কৰিবলৈ প্ৰস্তুত নহয়। কিয়নো অসমে নতুন প্ৰব্ৰজনকাৰীৰ বোজা গ্ৰহণ কৰিলে ইয়াৰ জনসাধাৰণৰ সামাজিক, সাংস্কৃতিক আৰু ৰাজনৈতিক পৰিচয় গুৰুতৰভাৱে ক্ষতিগ্ৰস্ত কৰিব।
অসমবাসীৰ স্বাৰ্থত যিকোনো মূল্যৰ বিনিময়ত ১৯৮৫ চনৰ ঐতিহাসিক অসম চুক্তিৰ দফাসমূহ অক্ষুণ্ণ ৰাখিবলৈ তথা চুক্তিখন কোনো কাৰণতে উলংঘন নকৰিবলৈ সংগঠনসমূহে কেন্দ্ৰীয় চৰকাৰক আহ্বান জনায়। আনহাতে চৰকাৰখনে অসমত হিন্দু বাংলাদেশী জাপি দিয়াৰ যি চক্ৰান্ত কৰিছে তাক তীব্ৰ ভাষাৰে গৰিহণা দিয়ে।
