বিশ্বনাথৰ পানীভঁড়ালত পত্নী, পুত্ৰ আৰু দুই জীয়ৰীয়ে মিলি পূৰ্ণকান্ত বৰা (৭৬ বছৰীয়া) নামৰ লোক এজনক ৩ মাহ পূৰ্বে হত্যা কৰি ঘৰৰ বাৰীত গাঁত খান্দি পুতি থোৱাৰ এক ৰোমহৰ্ষক ঘটনা আজি ২২ মে’ত পোহৰলৈ অহাত তীব্ৰ চাঞ্চল্যৰ সৃষ্টি হৈছে।
বিশ্বনাথ আৰক্ষী থানাত লোকজনৰ জীয়েক দীপশিখা বৰাই আজি লোমহৰ্ষক হত্যাকাণ্ডটোৰ কথা স্বীকাৰ কৰিছে। আৰক্ষীয়ে মৃতদেহ উদ্ধাৰৰ বাবে মৃতদেহ পুতি থোৱা ১২ ফুট দ গাঁতটো পুনৰ খান্দিবলৈ আৰম্ভ কৰিছে। দণ্ডাধীশৰ উপস্থিতিত এই খনন আৰম্ভ হোৱাৰ লগে লগে লোকে লোকাৰণ্য হৈ পৰিছে ঘৰখন।
উল্লেখযোগ্য যে লোকজনক হত্যা কৰি উঠি পৰিয়ালৰ লোকেই লোকজন ‘সন্ধানহীন’ হোৱা বুলি তিনিমাহ পূৰ্বে বিশ্বনাথ থানাত এজাহাৰ দাখিল কৰিছিল।
গাঁৱৰ একাংশ লোকে লোকজনক পৰিয়ালৰ লোকেই মাৰি পুতি থোৱা বুলি সন্দেহ কৰি আজি আৰক্ষীক জনোৱাৰ পিছত লোকজনৰ জী দীপশিখা বৰা আৰু পুত্ৰ দিব্যজ্যোতি বৰাক আটক কৰি জেৰা চলোৱাত তেওঁলোকে হত্যাকাণ্ডৰ কথা স্বীকাৰ কৰে। পিছত আৰক্ষীয়ে পৰিয়ালৰ সকলোকে আটক কৰি সোধ-পোচ চলায়।
আনহাতে লোকজনক হত্যাৰ কাৰণক লৈ স্থানীয় ৰাইজ আৰু হত্যাকাৰী জীয়েক বৰাই দিছে বেলেগ বেলেগ ভাষ্য। দীপশিখা বৰাৰ মতে পিতৃ পূৰ্ণকান্ত বৰাই প্ৰায় তিনিমাহ পূৰ্বে ৩ মাৰ্চত তেওঁক পিছফালৰ পৰা গবা মাৰি ধৰি ধৰ্ষণৰ চেষ্টা কৰোতে গোৰ মাৰি দিয়াত বেয়া ঠাইত লগাত পৰি যায় আৰু তাৰ পিছতে এখন কুঠাৰেৰে মূৰত মৰাত পূৰ্ণকান্তৰ মৃত্যু হয়। পিছত পৰিয়ালৰ লোকসকল মিলি তেওঁৰ মৃতদেহ গাঁত খান্দি পুতি থয়।
কিন্তু স্থানীয় ৰাইজৰ মতে বিশ্বনাথ ঘাটৰ ধেনুখনাত থকা পৰিয়ালটোৰ প্ৰায় এককোটি টকা মূল্যৰ মাটি বিক্ৰী কৰিবলৈ মৃত বৰাই গ্ৰাহক থিক কৰিছিল। কিন্তু পুত্ৰ দিব্যজ্যোতি আৰু পৰিয়ালে এই কথাত মান্তি নহৈ লোকজনক হত্যা কৰে।
