বৰাক আৰু ব্ৰহ্মপুত্ৰৰ জলভাগৰ ওপৰেৰে যোগাযোগ ব্যৱস্থাক অধিক উন্নত কৰাৰ বাবে ৰাজ্য চৰকাৰে ক্ৰয় কৰিব অত্যাধুনিক প্ৰযুক্তিৰ, ফাইবাৰগ্লাছৰ ৱাটাৰ টেক্সি। ইয়াৰ বাবে অচিৰেই চৰকাৰে নিবিদা আহ্বান কৰাৰ কথা। ইতিপূৰ্বে অনলাইন টেক্সিসেৱা কোম্পানি ‘ওলা’ৰ সহযোগত এনেকুৱা টেক্সিৰ পৰীক্ষামূলক চলন সম্পন্ন কৰা হৈছে।
চৰকাৰী সূত্ৰটোৱে জনোৱা মতে অভ্যন্তৰীণ জল পৰিৱহণ বিভাগে এনেকুৱা ১৫ খন অত্যাধুনিক বাহন ক্ৰয় কৰিব। ইতিপূৰ্বে বৰাক নদীত ৪খন এনেকুৱা বাহন চলাই থকা হৈছে। যোৱা বছৰৰ নৱেম্বৰৰ পৰা এই বাহনকেইখন চলোৱা হৈছে।
বাকী ১১খন ৱাটাৰ টেক্সি সোনকালেই সাজু হৈ উঠিব আৰু এইকেইখন ব্ৰহ্মপুত্ৰত চলিব। সূত্ৰটোৱে জনোৱামতে এই ৱাটাৰ টেক্সিকেইখনে ধুবুৰী, গুৱাহাটী আৰু মাজুলীৰ মাজত সংযোগ স্থাপন কৰিব।
সূত্ৰটোৱে কয় যে কেন্দ্ৰই ইতিমধ্য অভ্যন্তৰীণ জল পৰিবহণক উচ্চ ক্ষমতাসম্পন্ন ৰো-ৰো বা ৰোল অন/ৰোল অফ জাহাজ প্ৰদান কৰিছে। এইখন ধুবুৰী আৰু হাটীশিঙামাৰীৰ মাজত চলাচল কৰি আছে। এইখন জাহাজত এটা খেওত ২০০ জন যাত্ৰী আৰু ৮খন ট্ৰাক কঢ়িয়াব পাৰি। কেন্দ্ৰই আৰু এনেকুৱা ৰো-ৰো জাহাজ প্ৰেৰণৰ নিৰ্দেশ দিছে, যিকেইখন গুৱাহাটী, মাজুলী আৰু শিলচৰৰ লগতে অন্যান্য স্থানত চলোৱা হ’ব।
আনহাতে যোৱা ৪ এপ্ৰিলত বিধানসভাৰ মজিয়াত ৰাজ্যৰ পৰিৱহণ মন্ত্ৰী চন্দ্ৰমোহন পাটোৱাৰীয়ে কৈছিল যে চৰকাৰে ৰাজ্যখনত এখন National Inland Navigation Institute স্থাপন কৰাৰ কথা চিন্তা কৰি আছে। মন্ত্ৰীজনে লগতে অভ্যন্তৰীণ জল পৰিবহণত সংস্কাৰ অনাৰ কথাও উল্লেখ কৰিছিল।
এই ক্ষেত্ৰত তেওঁ ব্যক্তিগত খণ্ডৰ নাওবোৰক নিয়ন্ত্ৰণ কৰাৰ কথা উল্লেখ কৰিছিল। অসমৰ অভ্যন্তৰীণ জল পৰিবহণ ব্যৱস্থাটোৰ উন্নীতকৰণৰ বাবে বিশ্ব বেংকে ৯৫০ কোটি টকাৰ দিয়া বুলি মন্ত্ৰীজনে সদনত তথ্য প্ৰদান কৰিছিল।