মেঘালয়ৰ বিধানসভাত আজি উত্থাপিত হ’ল জনসাধাৰণৰ বিভিন্ন অংশৰ বাবে চৰকাৰী চাকৰিত থকা সংৰক্ষণ বিষয়ক প্ৰশ্ন। প্ৰশ্নটো অধিৱেশনৰ শূন্য কালত উত্থাপন কৰে মাফলাং সমষ্টিৰ নিৰ্দলীয় বিধায়ক ছিনটাৰ ক্লাছ ছানে। তেওঁ প্ৰশ্নটো উত্থাপন কৰি ৰাজ্যৰ পদ সংৰক্ষণ ব্যৱস্থাটোত উচ্চ শিক্ষা, বিশেষকৈ কাৰিকৰী শিক্ষাৰ বাবে সংৰক্ষণ অন্তৰ্ভুক্ত আছে নে নাই জানিব বিচাৰে। তেওঁ কাৰিকৰী শিক্ষাৰ উদাহৰণ হিচাপে পলিটেকনিক, এম বি বি এছ আৰু ইঞ্জিনীয়াৰিঙৰ কথা কয়।
উল্লেখযোগ্য যে মেঘালয়ত ৰাজ্যিক আৰু জিলাৰ পৰ্য্যায়ত থকা সংৰক্ষণ নীতিয়ে চাকৰিৰ ক্ষেত্ৰত খাচি আৰু জয়ন্তীয়া জনজাতিৰ বাবে ৪০ শতাংশ আৰু গাৰো জনজাতিৰ বাবে ৪০ শতাংশ আৰু ৫ শতাংশ অন্যান্য অনুসূচিত জনজাতি আৰু অনুসূচিত জাতিৰ বাবে সংৰক্ষণৰ সুবিধা দিছে।
ৰাজ্যিক পৰ্য্যায়ত এই সংৰক্ষণ নীতিকে ৰাজ্যৰ বাহিৰত ইঞ্জিনীয়াৰিং আৰু চিকিৎসাশাস্ত্ৰ পঢ়িবলৈ যোৱা ছাত্ৰ-ছাত্ৰীৰ ক্ষেত্ৰত আৰু ৰাজ্যৰ ভিতৰত প’লিটেকনিক পঢ়িব খোজা ছাত্ৰ-ছাত্ৰীৰ ক্ষেত্ৰত প্ৰয়োগ কৰা হয়।
প্ৰশ্নটোৰ উত্তৰ দি মুখ্য মন্ত্ৰী কনৰাড চাংমাই কয় যে সংৰক্ষণ ব্যৱস্থাটো বহু বছৰ ধৰি চলি অহা নিয়মৰ ভিত্তিত সম্প্ৰসাৰিত কৰা হৈছিল।
‘এই নীতিয়েই বহু বছৰ ধৰি চলি আহিছে আৰু আমি ইয়াকে আজিলৈকে অনুসৰণ কৰি আহিছো।’ কনৰাড চাংমাই কয়।
আনহাতে প্ৰশ্নকৰ্তা চানে সংৰক্ষণ নীতিটোৰ প্ৰযোজ্যতা সন্দৰ্ভত প্ৰশ্ন তুলি যোৱা পাঁচ বছৰত কিমান ছাত্ৰ-ছাত্ৰীক তেওঁলোকে ৭৫ শতাংশ আৰু ৬৫ শতাংশ নম্বৰ পোৱাৰ পিছতো মেডিকেল আৰু ইঞ্জিনীয়াৰিং পাঠ্যক্ৰম পঢ়াৰ পৰা বঞ্চিত কৰা হৈছে সেইটো জানিব বিচাৰে।
ইয়াৰ উত্তৰত মুখ্য মন্ত্ৰীজনে কয় যে এই তালিকা বৰ দীঘল আছিল আৰু এতিয়া সেই পৰিসংখ্যা দিব পৰা অৱস্থাত নাই।
আনহাতে বিৰোধী দলপতি মুকুল চাংমাই প্ৰসংগটোত মুখ্য মন্ত্ৰীজনক তেওঁৰ উত্তৰৰ সংশোধন ঘটাবলৈ আহ্বান জনাই কয় যে বিষয়টো অতি সংবেদনশীল আৰু ই ৰাজ্যখনত নেতিবাচক প্ৰভাৱ পেলাব পাৰে।
কিন্তু তাৰ পিছতো মুখ্য মন্ত্ৰীজনে নিজৰ স্থিতিত অটল থাকি কয় যে তেওঁ লিপিবদ্ধ নথকা কোনো তথ্য দি সদনক বিপথে পৰিচালিত কৰিব নোৱাৰে।
তেওঁ পুনৰ কয় যে সংৰক্ষণ ব্যৱস্থাটো বহু বছৰ ধৰি চলি অহা নিয়মৰ ভিত্তিত সম্প্ৰসাৰিত কৰা হৈছিল।
আনহাতে ইয়াৰ পূৰ্বে কংগ্ৰেছী বিধায়ক এম্পাৰীন লিংডোৱেও ৰাজ্য চৰকাৰখনে চাকৰিৰ বাবে থকা সংৰক্ষণ ব্যৱস্থাক কিহৰ ভিত্তিত শিক্ষাৰ ক্ষেত্ৰতো প্ৰয়োগ কৰিবলৈ বিচাৰিছে জানিবলৈ বিচাৰিছিল।
