দেশৰ সাম্প্ৰতিক নিৰ্বাচনত বিধ্বস্ত হোৱা কংগ্ৰেছ দলটো এইবাৰ নিজৰ মাজত হোৱা অন্তৰ্দ্বন্দ্বৰ বাবে ৰাজ্যতো বিধ্বস্ত হোৱাৰ পথত আগবাঢ়িছে।
কামৰূপ জিলাৰ সদৰ আমিনগাঁৱত দেওবাৰে কংগ্ৰেছীৰ বিৰুদ্ধে কংগ্ৰেছীয়ে কৰা তীব্ৰ প্ৰতিবাদী কাৰ্যসূচীয়ে তাকেই প্ৰমাণ কৰিছে বুলি একাংশ লোকে মত প্ৰকাশ কৰিছে।
উল্লেখযোগ্য যে দেওবাৰে আমিনগাঁৱৰ ৰাজীৱ ভৱনত কংগ্ৰেছৰ কৰ্মীসকলে একালৰ প্ৰবল প্ৰতাপী তথা প্ৰাক্তন বন মন্ত্ৰী ৰকিবুল হুছেইনৰ বিৰুদ্ধে তীব্ৰ প্ৰতিবাদী কাৰ্যসূচী ৰূপায়ণ কৰে।
দেওবাৰে প্ৰতিবাদকাৰী কংগ্ৰেছ কৰ্মীসকলে ‘ৰকিবুল হুছেইন মুৰ্দাবাদ, ৰকিবুল হাটাও কংগ্ৰেছ বচাও’ আদি ধ্বনিৰে আমিনগাঁৱৰ আকাশ-বতাহ মুখৰিত কৰি তোলে। তাৰোপৰি প্ৰতিবাদকাৰী সকলে উক্ত প্ৰতিবাদৰ অংশ হিচাপে সমূহীয়া মুণ্ডন কাৰ্যসূচীও ৰূপায়ণ কৰে।
উল্লেখযোগ্য যে যোৱা ২৬ ফেব্ৰুৱাৰিত ৰাজীৱ ভৱনত ৰকিবুল হুছেইনৰ সমৰ্থক বাহিনীয়ে হাজোৰ একাংশ কংগ্ৰেছীক কৰা আক্ৰমণৰ প্ৰতিবাদতে দেওবাৰে শ শ কংগ্ৰেছ কৰ্মী একত্ৰিত হৈ এইদৰে ৰকিবুল হুছেইনৰ বিৰুদ্ধে তীব্ৰ প্ৰতিবাদ সাব্যস্ত কৰে।
প্ৰতিবাদী কংগ্ৰেছ কৰ্মীসকলে ৰকিবুল হুছেইনৰ বিৰুদ্ধে দলে শীঘ্ৰে ব্যৱস্থা গ্ৰহণ নকৰিলে তীব্ৰ আন্দোলন গঢ়ি তোলাৰো হুংকাৰ দিয়ে বুলি জানিব পৰা গৈছে।