অসমৰ অন্যান্য প্ৰান্তৰ লগতে যোৰহাট আৰু ওদালগুৰিতো প্ৰথমগৰাকী ভাৰতীয় ব্যৱসায়িক চাহ খেতিয়ক তথা অসমৰ এগৰাকী মহান মুক্তিযোদ্ধা মণিৰাম দেৱানক তেওঁৰ ১৬০ তম মৃত্যু বাৰ্ষিকীত স্মৰণ কৰা হয়।
যোৰহাটত আছাম চেম্বাৰ্ছ অব কমাৰ্চ (এচিচি)ৰ যোৰহাট জিলা সমিতিয়ে মুক্তি যুঁজাৰু ভৱনত মণিৰাম দেৱানৰ মৃত্যু বাৰ্ষিকী অনুষ্ঠানৰ আয়োজন কৰে।
এচিচি’ৰ কেন্দ্ৰীয় সমিতিৰ মুৰব্বী ৰূপম গোস্বামী উপস্থিত থকা এই কাৰ্যসূচীত মুখ্য বক্তা হিচাপে উপস্থিত থাকে চাহ গৱেষক তথা টোকলাই চাহ গৱেষণা প্ৰতিষ্ঠানৰ জ্যেষ্ঠ পৰামৰ্শদাতা বিষয়া ড০ প্ৰদীপ বৰুৱা। ড০ বৰুৱাই চহিদ, প্ৰথমগৰাকী ভাৰতীয় ব্যৱসায়িক চাহ খেতিয়ক তথা অসমৰ উদ্যোগী মণিৰাম দেৱানৰ মৃত্যু বাৰ্ষিকীটো উদ্যোগ দিৱস হিচাপে পালন কৰাৰ বাবে আহ্বান জনায়।
নিজৰ টুইটাৰত ড০ বৰুৱাই প্ৰকাশ কৰিছে,’’… উদ্যোগ দিৱস হিচাপে দিনটো পালন কৰাৰ আহ্বানটো গ্ৰহণ কৰা হৈছিল।‘’
ওদালগুৰিত মণিৰাম দেৱানৰ ১৬০ তম মৃত্যু দিৱসটো সোমবাৰে ওদালগুৰিৰ ভাৰত-ভূটান সীমান্তৰ ৰাজগড় চহিদ আদৰ্শ এম ই স্কুলৰ খেলপথাৰত অনুষ্ঠিত কাৰ্যসূচীৰে পালন কৰা হয়।
ৰাজগড় জাতীয় জাগৰণ ঐক্য মঞ্চৰ সহযোগত অনুষ্ঠানটো আয়োজন কৰা হয়। দুদিনীয়া এই কাৰ্যসূচীত পতাকা উত্তোলন, চহিদ গৰাকীলৈ শ্ৰদ্ধাঞ্জলি, গছপুলি ৰোপণ আৰু সাহিত্য-সাংস্কৃতিক প্ৰতিযোগিতাৰ আয়োজন কৰা হয়। বিয়লি অৱসৰপ্ৰাপ্ত শিক্ষক ছান্থো হাজৰিকাৰ সভাপতিত্বত এখন মুকলি সভা অনুষ্ঠিত হয়।
অনুষ্ঠানত টংলা কলেজৰ ৰাজনীতি বিজ্ঞান বিভাগৰ প্ৰাক্তন মুৰব্বী বিনয় কুমাৰ মেধিয়ে নিৰ্দিষ্ট বক্তা হিচাপে উপস্থিত থাকে। নিজৰ ভাষণত মেধিয়ে মণিৰাম দেৱানৰ জীৱন আৰু দেশপ্ৰেমৰ ওপৰত আলোকপাত কৰে। ‘’দেৱান স্বাধীনতা সংগ্ৰমাত ৰাজ্যখনৰ ইতিহাসৰ এক অবিচ্ছেদ্য অংগ আছিল,’’-তেওঁ কয়।
আন এগৰাকী বক্তা, ৰঙিয়া শিক্ষক প্ৰশিক্ষণ মহাবিদ্যালয়ৰ অধ্যক্ষ ড০ পাৰ্থ ফুকন মহন্তই কয়, ‘’মণিৰাম দেৱানেই অসমত চিংফৌসকলে চাহ খেতি কৰাৰ কথা ব্ৰিটিছক জনাইছিল, যিটো বিশ্বৰ বাকী কোনোৱে জনা নাছিল।‘’ তেওঁ চহিদ গৰাকীৰ জীৱন আৰু কৃতিৰ বিষয়ে গৱেষণা আৰু অধ্যয়ন কৰাৰ আহ্বান জনায়। অনুষ্ঠানত চাহ খেতিয়ক বিকন ডেকা, পানেৰী সমষ্টিৰ বিধায়ক কমলী বসুমতাৰী, সাহিত্যিক জয়ন্ত ৰাজবংশীৰ লগতে আন বিশিষ্ট ব্যক্তি উপস্থিত আছিল।
ব্ৰিটিছ বিৰোধী পৰিকল্পনা কৰাৰ অপৰাধত ১৮৫৮ চনৰ ২৬ ফেব্ৰুৱাৰিত যোৰহাট কাৰাগাৰত মণিৰাম বৰুৱা হিচাপে জনপ্ৰিয় মণিৰাম দত্ত বৰুৱাক ৰাজহুৱাকৈ ফাঁচি দিয়া হৈছিল।