অসমবাসীলৈ এক সুখবৰ। সুধাকণ্ঠ ভূপেন হাজৰিকাৰ কলকাতাৰ টালিগঞ্জস্থিত গৃহ ক্ৰয় কৰাৰ বাবে আগবাঢ়িছে বিজেপি মিত্ৰজোঁটৰ ৰাজ্য চৰকাৰে। এই উদ্দেশ্যে বাসগৃহটোৰ বৰ্তমানৰ স্বত্বাধিকাৰীৰ সৈতে এক চুক্তি সম্পন্ন কৰা হৈছে বুলি জানিব পৰা গৈছে।
ৰাজ্যৰ সাংস্কৃতিক মন্ত্ৰী নৱ দলে আৰু মুখ্যমন্ত্ৰীৰ প্ৰেছ উপদেষ্টা হৃষীকেশ গোস্বামীয়ে এই সন্দৰ্ভত ইতিমধ্যে গৃহটোৰ স্বত্বাধিকাৰী সুশীল কুমাৰ দাংগীৰ সৈতে এক আলোচনাতো মিলিত হৈছে।
উল্লেখযোগ্য যে সুধাকণ্ঠৰ টালিগঞ্জস্থিত বাসগৃহটো এক সাংস্কৃতিক কেন্দ্ৰলৈ ৰূপান্তৰ কৰাৰ বাবে ৰাজ্য চৰকাৰে ঘোষণা কৰিছিল। কিন্তু সুধাকণ্ঠৰ পৰিয়ালে বাসগৃহটো এজন ব্যৱসায়ীক বিক্ৰী কৰি দিয়া বাবে বাসগৃহটো সাংস্কৃতিক কেন্দ্ৰলৈ ৰূপান্তৰ কৰাৰ ক্ষেত্ৰত জটিলতাই দেখা দিছিল।
এই বিষয়টোক লৈ চলি থকা চৰ্চাৰ মাজতে বিগত বৰ্ষৰ এক নৱেম্বৰত মুখ্যমন্ত্ৰী সৰ্বানন্দ সোণোৱালৰ নিৰ্দেশত সাংস্কৃতিক মন্ত্ৰী নৱ কুমাৰ দলে আৰু প্ৰেছ উপদেষ্টা হৃষীকেশ গোস্বামীয়ে কলকাতালৈ গৈ বাসগৃহটো পৰিদৰ্শন কৰাৰ লগতে গৃহটোৰ স্বত্বাধিকাৰী সুশীল কুমাৰ দাংগীৰ সৈতেও আলোচনাত মিলিত হৈছিল।
এই আলোচনাৰ পৰৱৰ্তী পৰ্যায়ত গৃহটোৰ স্বত্বাধিকাৰী দাংগীক গুৱাহাটীলৈ মতাই আনি নৱ দলে আৰু হৃষীকেশ গোস্বামীৰ উপস্থিতিত এক চুক্তি স্বাক্ষৰ কৰোৱা হয়। ৰাজ্য চৰকাৰে কালি প্ৰকাশ কৰা অনুসৰি উক্ত চুক্তিৰ প্ৰস্তাৱ আগন্তুক কেবিনেট বৈঠকত উত্থাপন কৰা হ’ব আৰু কেবিনেটে এই প্ৰস্তাৱ অনুমোদন জনোৱাৰ পাছতে বাসগৃহটো ক্ৰয়ৰ ক্ষেত্ৰত পৰৱৰ্তী পদক্ষেপ গ্ৰহণ কৰা হ’ব।
প্ৰসংগক্ৰমে উল্লেখযোগ্য যে টালিগঞ্জৰ সুধাকণ্ঠৰ বাসগৃহটো দীৰ্ঘদিনৰ মেৰামতিৰ অভাৱত একপ্ৰকাৰ জহি-খহি গৈছে। এনে অৱস্থাতে সুধাকণ্ঠৰ পৰিয়ালৰ পৰা ব্যৱসায়ী দাংগীয়ে যথেষ্ট কম দামত বাসগৃহটো ক্ৰয় কৰে যদিও অসম চৰকাৰে ইয়াক সংৰক্ষণ কৰাৰ বাবে চলোৱা তৎপৰতাৰ সুযোগ লৈ তিনিগুণ মূল্য লৈহে বাসগৃহটো বিক্ৰীৰ বাবে সন্মত হৈছে ব্যৱসায়ীজন।
জানিব পৰা মতে, অসম চৰকাৰে সুশীল কুমাৰ দাংগীৰ পৰা এক কোটি ৬৫ লাখ টকাত এই বাসগৃহটো ক্ৰয় কৰিব। অৱশ্যে বাসগৃহৰ মূল্য সন্দৰ্ভত ৰাজ্য চৰকাৰে এতিয়াও কোনো কথা স্পষ্ট কৰা নাই।
