টাই আহোম, কোচ ৰাজবংশী, চুতীয়া, মৰাণ, মটক আৰু চাহ জনগোষ্ঠী- এই ছয় জনগোষ্ঠীৰ জনজাতিকৰণৰ বিৰোধিতা কৰি সোমবাৰে দিছপুৰ লাষ্টগেটত প্ৰতিবাদ সাৱ্যস্ত কৰে জনজাতি সংগঠনসমূহৰ সমম্বয়ৰক্ষী সমিতিয়ে।
সদৌ অসম ট্ৰাইবেল সংঘ, নিখিল বড়ো ছাত্ৰ সন্থা(এবছু), সদৌ ৰাভা ছাত্ৰ সন্থা , টাকাম মিচিং পৰিণ কেবাং, সদৌ তিৱা ছাত্ৰ সন্থা, সদৌ অসম ট্ৰাইবেল য়ুথ লীগ, সদৌ অসম দেউৰী ছাত্ৰ সন্থা, সদৌ অসম ঠেঙাল কছাৰী ছাত্ৰ সন্থা আদিকে ধৰি কেইবাটাও জনজাতীয় সংগঠনৰ দ্বাৰা গঠিত জনজাতি সংগঠনসমূহৰ সমম্বয়ৰক্ষী সমিতিয়ে এই প্ৰতিবাদী কাৰ্যসূচী ৰূপায়ন কৰে।
সমন্বয়ৰক্ষী সমিতিয়ে কোনো কাৰণতে ছয় জনগোষ্ঠীক জনজাতিকৰণৰ মৰ্যাদা দিব নোৱাৰিব বুলি চৰকাৰক কঠোৰ ভাষাৰে সকীয়াই দিয়ে।
সংযুক্ত মুক্তি বাহিনী, অসম (আলফা)ৰ আলোচনাপন্থী গোটটোৱে ছয় জনগোষ্ঠীক জনজাতিকৰণৰ মৰ্যাদা দিলেহে অসম ৰক্ষা পৰিব, অসম বিদেশী মুক্ত হ’ব আৰু অসমত খিলঞ্জীয়াৰ আধিপত্য বিস্তাৰ হ’ব বুলি কৰা মন্তব্যকো সমম্বয়ৰক্ষী সমিতিয়ে ভ্ৰান্ত ধাৰণা বুলি আখ্যা দিয়ে।
সমিতিয়ে ছয় জনগোষ্ঠীৰ জনজাতিকৰণৰ চৰকাৰী প্ৰস্তাৱ শীঘ্ৰে বাতিল কৰা, ৰাজ্য চৰকাৰৰ বিভিন্ন বিভাগত জনজাতিৰ বাবে সংৰক্ষিত ১২,১৫৫টা বেকলগ পদ অহা ৩১ মাৰ্চৰ ভিতৰত পূৰণ কৰা, ট্ৰাইবেল বেল্ট ব্লকৰ পৰা অবৈধ দখলকাৰীক উচ্ছেদ কৰা, অনুসূচিত জনজাতি আৰু অন্যান্য পৰম্পৰাগত বনবাসী (বন অধিকাৰ স্বীকৃতি) আইন ২০১৬ অনুসৰি জনজাতি বনবাসীক ভূমি পট্টা প্ৰদান কৰা, বি টি চিৰ বাহিৰত বসবাস কৰা বড়ো-কছাৰী, মেচ আৰু হাজং জনগোষ্ঠীক স্বায়ত্তশাসত প্ৰদান কৰা আৰু মিচিং, তিৱা, ৰাভা, সোণোৱাল কছাৰী, ঠেঙাল কছাৰী আৰু দেউৰী স্বায়ত্তশাসিত পৰিষদক ভাৰতীয় সংবিধানৰ ষষ্ঠ অনুসূচিত অন্তৰ্ভুক্ত কৰাৰো দাবী উহ্থাপন কৰে।
সদৌ অসম ট্ৰাইবেল সংঘৰ সাধাৰণ সম্পাদক তথা সমম্বয়ৰক্ষী সমিতিৰ মুখ্য সমম্বয়ক আদিত্য খাখলাৰী, এবছুৰ সভাপতি তথা সমিতিৰ সমম্বয়ক প্ৰমোদ বড়ো, সদৌ ৰাভা ছাত্ৰ সন্থাৰ সভাপতি তথা সমিতিৰ সমম্বয়ক ৰমেন সিং ৰাভা আদিয়ে নেতৃত্ব দিয়া প্ৰতিবাদী কাৰ্যসূচীত শতাধিক লোকে অংশ লৈ প্ৰতিবাদ সাব্যস্ত কৰে।