বিভিন্ন দাবীৰ সমৰ্থনত অহা আঠ মাৰ্চত ৰাজ্যৰ কেইবা হেজাৰ গৃহৰক্ষী জোৱানে ধৰ্ণা দিব দিছপুৰত। সদৌ অসম প্ৰশিক্ষণপ্ৰাপ্ত গৃহৰক্ষী সন্থাৰ সভাপতি অনন্ত দাসে সোমবাৰে গোৱালপাৰাত এই কথা ঘোষণা কৰে।
ৰাজ্যৰ প্ৰশিক্ষণপ্ৰাপ্ত ২৬,৬৬২ গৃহৰক্ষী জোৱানৰ জীৱনক লৈ চৰকাৰে হেতালি খেলা বুলি অভিযোগ কৰি তেওঁ এই ধৰ্ণা কাৰ্যসূচীৰ কথা ঘোষণা কৰে।
সোমবাৰে গোৱালপাৰা জিলা গৃহৰক্ষী সন্থাৰ উদ্যোগত গোৱালপাৰা চহৰৰ গান্ধী ভৱনত অনুষ্ঠিত অষ্টম বাৰ্ষিক জিলা সন্মিলনীৰ সাধাৰণ সভাত উপস্থিত থাকি সদৌ অসম প্ৰশিক্ষণপ্ৰাপ্ত গৃহৰক্ষী সন্থাৰ সভাপতিজনে তীব্ৰ ক্ষোভ প্ৰকাশ কৰে।
সভাত তেওঁ কয় যে গৃহৰক্ষীসকলে সন্মুখীন হোৱা জ্বলন্ত সমস্যাসমূহ সমাধান কৰিবলৈ দীৰ্ঘদিন ধৰি চৰকাৰক দাবী জনাই অহাৰ পিছতো চৰকাৰে এই বিষয়ত কোনোধৰণৰ গুৰুত্ব প্ৰদান নকৰাৰ প্ৰতিবাদত অহা ৮ মাৰ্চত দিছপুৰত ধৰ্ণা কাৰ্যসূচী ৰূপায়ণ কৰা হ’ব।
এই প্ৰতিবাদীত কাৰ্যসূচীত ৰাজ্যৰ বিভিন্ন প্ৰান্তত থকা গৃহৰক্ষী জোৱানসকলক অংশগ্ৰহণ কৰিবলৈ তেওঁ আহ্বান জনায়।
সন্থাৰ গোৱালপাৰা জিলা সমিতিৰ সভাপতি প্ৰভাত দাসে সভাপতিত্ব কৰে মুকলি সভাখনত। আনহাতে সদৌ অসম প্ৰশিক্ষণপ্ৰাপ্ত গৃহৰক্ষী সন্থাৰ সভাপতি অনন্ত দাসে আৰু কয় যে সম্প্ৰতি ৰাজ্যখনত থকা ২৬,৬৬২ গৰাকী গৃহৰক্ষী জোৱানৰ ভিতৰত অসমৰ বিভিন্ন জিলাৰ থানাসমূহত ১১,২০০ গৰাকী আৰু অন্যান্য চৰকাৰী-বেচৰকাৰী কাৰ্যালয়ত ৬,৩৩২ গৰাকীয়ে কাম কৰি থকাৰ বিপৰীতে ৯,১৩০ গৰাকী জোৱানে ঘৰতে বহি দিন অতিবাহিত কৰিব লগা হৈছে।
জোৱানসকলে দিনে-নিশাই কাম কৰি থাকে যদিও মাত্ৰ ৭৫০০ টকাহে দৰমহা পায় ক্ষোভ উজাৰে।
আনহাতে স্থায়ী নিযুক্তিৰ ক্ষেত্ৰত গুৱাহাটী উচ্চ ন্যায়্যলয়ে দিয়া ৰায়দানো আজিলৈকে কাৰ্যকৰী কৰা নাই বুলি অভিযোগ উত্থাপন কৰি দাসে চৰকাৰক সকীয়াই দি কয় যে গৃহৰক্ষীসকলৰ জীৱনক লৈ হেতালি খেলা চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰা হ’ব।
সভাখনত লগতে গোৱালপাৰা পূব সমষ্টিৰ বিধায়ক এ কে ৰছিদ আলমৰ উপৰি গৃহৰক্ষী সন্থাৰ গোৱালপাৰা জিলা সমিতিৰ সম্পাদক আব্দুল হাকিম, গৃহৰক্ষী সন্থাৰ ৰাজ্যিক মুখ্য পৃষ্ঠপোষক বাবুল হুছেইন, সম্পাদক কামাখ্যা দাস, কাৰ্যকৰী সভাপতি ছুদু আলী, ৰাজ্যিক উপ-সভাপতি দীনেশ দাস, নলবাৰী জিলা সমিতিৰ সভাপতি ৰেজ্জাক আলী, বৰপেটা জিলা সমিতিৰ সভাপতি অচ্যুত পাঠক, ধুবুৰী জিলা সমিতিৰ সভাপতি মিজানুৰ ৰহমান আৰু জিলা সাংবাদিক সন্থাৰ সম্পাদক ৰছিদুল হুছেইনও ভাষণ আগবঢ়ায়।
