আজি এটা গোচৰৰ ভিত্তিত আৰক্ষীয়ে আজাৰাস্থিত এছ অ’ এছ শিশুগাৱঁৰ ৩গৰাকী নাবালিকাক যৌন নিৰ্যাতন চলোৱাৰ অভিযোগত ইয়াৰ সহকাৰী সঞ্চালকক গ্ৰেপ্তাৰ কৰিছে।
আৰক্ষীৰ সূত্ৰই জনোৱা মতে, এই ঘটনাটো ঘটিছিল কেইদিনমানৰ পূৰ্বে ৰটাৰেক্ট ক্লাবে আয়োজন কৰা ছদিনীয়া এটা শিবিৰৰ শেষৰ দিনটোত। ৰক্ষকৰ ৰূপত থাকি এই নিৰ্লজ্জ কাণ্ড কৰা ৪৪ বছৰীয়া মণিপুৰী ব্যক্তিজনক ফাওখা লুন ভেইফেই বুলি চিনাক্ত কৰা হৈছে।
উৎসাহ (UTSAH) নামৰ এটা শিশুৰ অধিকাৰ সম্পৰ্কত কাম কৰা বেচৰকাৰী সংস্থাৰ কাৰ্য্যবাহী সঞ্চালক মিগুৱেল কুৱেহে কয় যে তেওঁক লাভলি সৰকাৰ নামৰ এজন সাংবাদিকে ১ আগষ্টত ঘটা এই ঘটনাটোৰ বিষয়ে ইমেইল যোগে অৱগত কৰিছিল। মেইলটোত জনোৱামতে, সহকাৰী সঞ্চালক ভেইফেয়ে এছ অ’ এছ শিশুগাৱঁৰ বিভাগীয় গাড়ীৰ ভিতৰত নাবালিকা ছোৱালীকেইজনীক সহকাৰী সঞ্চালকজনে আপত্তিজনকভাৱে স্পৰ্শ কৰিছিল।
লাভলি সৰকাৰক এই ঘটনাটোৰ বিশয়ে ৰটাৰেক্ট ক্লাবৰ এজন কৰ্মকৰ্তাই জানিবলৈ দিয়ে।
কুৱেহে তাৰ পাছতে আৰক্ষী আয়ুক্ত হীৰেন নাথক এই বিষয়ে লিখিতভাৱে অৱগত কৰে। তেতিয়া আৰক্ষী আয়ুক্ত হীৰেন নাথে আজাৰাৰ আৰক্ষীক ঘটনাটোৰ কথা জনায় আৰু লগতে কুৱেহকো আজাৰা আৰক্ষীৰ ওচৰত এজাহাৰ দাখিল কৰিবলৈ কয়।
সেইমতে তেওঁ আগষ্ট ২ তাৰিখে আজাৰা আৰক্ষী থানাত এখন এজাহাৰ দিয়ে। তেওঁক এই কামত সহযোগ কৰি চাইল্ড লাইন গুৱাহাটীৰ কৰ্মকৰ্তাৰ লগতে ডিষ্ট্ৰিক্ট চাইল্ড প্ৰটেকশ্যন য়ুনিটৰ কাউন্সিলৰো লগত যায়। তেওঁলোকৰ এজাহাৰৰ ভিত্তিত আৰক্ষীয়ে অভিযুক্তজনৰ বিৰুদ্ধে ৪৮৬/১৮ নম্বৰৰ এটা গোচৰ ৰুজু কৰে। তাৰ পিছত ৩ আগষ্টত আৰক্ষীয়ে ফাওখা লুন ভেইফেইক গ্ৰেপ্তাৰ কৰি কামৰূপ মহানগৰৰ ছেছন ক’ৰ্টত হাজিৰ কৰায়। আদালতে অভিযুক্ত ভেইফেইক কাৰাগাৰলৈ প্ৰেৰণ কৰিছে।