ৰাষ্ট্ৰীয় নাগৰিকপঞ্জী উন্নীতকৰণকলৈ বৃহস্পতিবাৰে নগাঁও জিলা উপায়ুক্তৰ কক্ষত উপায়ুক্তৰ সৈতে নগাঁও জিলা আছু আৰু নগাঁও জিলা কৰ্মচাৰী পৰিষদে এক আলোচনাত মিলিত হয়।
আলোচনা কালত দুয়োটা সংগঠনৰ প্ৰতিনিধি বৰ্গই জিলা উপায়ুক্ত বিশ্বজিত পেগুক বিশেষকৈ ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াৰ সম্পূৰ্ণ খচৰাত যাতে ১৯৭১ চনৰ ২৪ মাৰ্চৰ পিছত অহা কোনো বিদেশী লোকৰ নাম অন্তৰ্ভূক্ত নহয় তাৰ বাবে কটকটীয়া ব্যৱস্থা গ্ৰহণ কৰাৰ আহ্বান জনায়।
তদুপৰি, প্ৰতিনিধ দলটোৱে উপায়ুক্ত গৰাকীৰ আগত ব্যক্ত কৰে যে এই ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াত কৰ্মচাৰীসকলে গুৰুত্বপূৰ্ণ ভূমিকা পালন কৰি আহিছে। ইয়াৰে কিছু সংখ্যক কৰ্মচাৰীয়ে জীৱনৰ শংকা লৈ কাম কৰি আহিছে। জীৱনৰ প্ৰতি ভাবুকি অহা এই কৰ্মচাৰীসকলক চৰকাৰে সুৰক্ষা দিব লাগে।
আলোচনা কালত আছুৰ উপ-সভাপতি মণিমাধৱ মহন্ত, জিলা উপদেষ্টা মৃদুল হাজৰিকা, জিলা সভাপতি অভিজিৎ দাস, কৰ্মচাৰী পৰিষদৰ সহকাৰী সাধাৰণ সম্পাদক সীমান্ত দাস, জিলা সভাপতি কাতিবৰ চেঙা প্ৰমুখ্যে আছু-কৰ্মচাৰী পৰিষদৰ কেবাজনো প্ৰতিনিধি উপস্থিত থাকে।
