মধ্যপ্ৰদেশৰ শিৱপুৰী জিলাত ছ’চিয়েল মিডিয়াত নিজৰ ধন-সম্পত্তি প্ৰদৰ্শন কৰাটো এগৰাকী ইউটিউবাৰৰ বাবে বিপদৰ কাৰণ হৈ পৰিল। ৰচনা গুৰ্জৰ নামৰ এগৰাকী গৃহিণী তথা ইউটিউবাৰৰ ঘৰত নিশা চোৰে প্ৰৱেশ কৰি প্ৰায় ১০ লাখ টকাৰ সামগ্ৰী লুটি লৈ যায়। তেওঁ নিজৰ ইউটিউব চেনেলত ঘৰৰ বিলাসী জীৱন আৰু সোণৰ অলংকাৰ দেখুৱাই ভিডিঅ’ আপলোড কৰিছিল, যিয়েই হয়তো চোৰক এই অপৰাধ কৰিবলৈ বাট দেখুৱালে।
শনিবাৰে পুৱতি নিশা প্ৰায় ২ বজাত এই চুৰিকাণ্ড সংঘটিত হয়। পৰিয়ালৰ লোকসকল শুই থকা অৱস্থাত চোৰৰ দলটোৱে তেওঁলোকক এটা কোঠাত বাহিৰৰ পৰা তলা মাৰি আৱদ্ধ কৰি ৰাখে। তাৰ পিছত চোৰে ঘৰৰ পৰা সোণ আৰু ৰূপৰ আ-অলংকাৰ, নগদ ধন আৰু আনকি এবাকচ এনাৰ্জি ড্ৰিংকছ লৈ যায়। চুৰি হোৱা সামগ্ৰীখিনিৰ মূল্য প্ৰায় ৮ ৰ পৰা ১০ লাখ টকা হ’ব বুলি অনুমান কৰা হৈছে। নিজৰ পৰিচয় লুকুৱাবলৈ চোৰে এডাল লাঠীৰে চিচিটিভি কেমেৰাৰ দিশ সলনি কৰি দিছিল। পুৱা ৪ বজাত সাৰ পাই পৰিয়ালটোৱে নিজকে আৱদ্ধ অৱস্থাত দেখি আত্মীয়ক খবৰ দিয়ে আৰু আত্মীয়ই আহি দুৱাৰ খুলি তেওঁলোকক উদ্ধাৰ কৰে।
আৰক্ষীয়ে বৰ্তমান চিচিটিভিৰ ফুটেজ পৰীক্ষা কৰি এই ঘটনাৰ তদন্ত আৰম্ভ কৰিছে। আৰক্ষীৰ মতে, চোৰ হয়তো একেখন গাঁৱৰ বা ওচৰৰ কোনো লোক হ’ব পাৰে, যি পৰিয়ালটোৰ বিষয়ে আগৰ পৰাই অৱগত আছিল। ৰচনাৰ ছ’চিয়েল মিডিয়াত এক লাখতকৈ অধিক ফ’ল’ৱাৰ আছে। শেহতীয়াকৈ তেওঁ নিজৰ ঘৰ, আ-অলংকাৰ আৰু নগদ ধন মেজৰ ওপৰত সজাই এটা ভিডিঅ’ আপলোড কৰিছিল, য’ত ঘৰৰ প্ৰৱেশদ্বাৰৰ পৰা আৰম্ভ কৰি কোঠালৈকে সকলো দেখুওৱা হৈছিল।
আৰক্ষীয়ে সন্দেহ কৰিছে যে চোৰে এই ভিডিঅ’বোৰ চাই ঘৰৰ ভিতৰৰ অৱস্থা, সম্পত্তি আৰু নিৰাপত্তাৰ বিষয়ে তথ্য সংগ্ৰহ কৰিছিল। ছ’চিয়েল মিডিয়াত নিজৰ সম্পত্তি আৰু ঘৰৰ ভিতৰৰ দৃশ্য প্ৰদৰ্শন কৰাটোৱে কেনেদৰে বিপদ মাতিব পাৰে, এই ঘটনাই সকলোৰে বাবে এক ডাঙৰ সতৰ্কবাণী কঢ়িয়াই আনিছে।
