মহাৰাষ্ট্ৰৰ এখন হাস্পাতলত সংঘটিত এক ভয়ংকৰ অগ্নিকাণ্ডত ১০টি নৱজাত দেৱশিশুৰ মৃত্যু ঘটিছে। শিশুকেইটিৰ বয়স এক মাহৰ পৰা তিনিমাহৰ ভিতৰত আছিল।
হাস্পাতলৰ সূত্ৰই জানিবলৈ দিয়া মতে সাতটি শিশুক উদ্ধাৰ কৰা হৈছে।
বিদৰ্ভ অঞ্চলৰ ভাণ্ডাৰাৰ চিভিল চাৰ্জনগৰাকীয়ে জানিবলৈ দিছে যে যোৱা নিশা ভাণ্ডাৰাৰ জিলা হাস্পাতলৰ শিশু বিভাগ (ছিক নিউব’ৰ্ণ কেয়াৰ য়ুনিট)ত অগ্নিকাণ্ডটো সংঘটিত হয়।
ইয়াত ১৭টি শিশুৰ চিকিৎসা চলি আছিল। নিশা ডেৰ বজাত এগৰাকী নাৰ্চে প্ৰথমতে সেই বিভাগটোৰ পৰা ধোঁৱা ওলোৱা দেখা পায়।
নাৰ্চগৰাকীয়ে শীঘ্ৰেই হাস্পাতলৰ কৰ্মী তথা চিকিৎসকসকলক খৱৰ দিয়ে। তাৎক্ষণিকভাৱে হাস্পাতলৰ কৰ্মীসকলে অগ্নিনিৰ্বাপক যন্ত্ৰৰে জুই নুমুৱাবৰ চেষ্টা কৰে যদিও ব্যৰ্থ হয়।
বিভাগটোৰ পৰা ওলোৱা ক’লা ধোঁৱাই ছানি ধৰে। ইতিমধ্যে খৱৰ লাভ কৰি অগ্নিনিৰ্বাপক বাহিনী আহি ঘটনাস্থলীত উপস্থিত হৈ উদ্ধাৰ কাৰ্য আৰম্ভ কৰে।
তেওঁলোকে সাতটি শিশুক উদ্ধাৰ কৰে যদিও বাকীকেইটি শিশুক উদ্ধাৰ কৰিব পৰা নাই। মুঠতে ১০টি শিশুৰ মৃত্যু ঘটিছে।
মৃত শিশুকেইটিৰ অভিভাৱকসকলক অগ্নিকাণ্ডৰ বিষয়ে জনোৱা হৈছে। যি সাতটি শিশুক উদ্ধাৰ কৰা হৈছে সেইকেইটিক আন ৱাৰ্ডলৈ স্থানান্তৰিত কৰা হৈছে।
সুৰক্ষাৰ বাবে আইচিয়ু ৱাৰ্ড, ডায়েলেছিছ উইং আৰু লেবাৰ ৱাৰ্ডৰ ৰোগীসকলকো আনা স্থানলৈ লৈ যোৱা হৈছে।
অগ্নিকাণ্ডটোৰ প্ৰকৃত কাৰণ এতিয়াও জানিব পৰা হোৱা নাই যদিও শ্বট ছাৰ্কিটৰ বাবেই জুঁই লগাৰ সন্দেহ কৰা হৈছে। ঘটনাৰ তদন্ত অব্যাহত ৰখা হৈছে।
