যোৱা বৰ্ষৰ মে মাহত ভাৰতে চলোৱা অপাৰেচন সিন্দুৰ অভিযানে দক্ষিণ এছিয়াৰ আকাশী যুদ্ধৰ ভাৰসাম্য সম্পূৰ্ণৰূপে সলনি কৰি দিছিল। চুইজাৰলেণ্ডৰ এটা আগশাৰীৰ সামৰিক ইতিহাস আৰু কৌশল গৱেষণা সংস্থা চিএইচপিএমে নিজৰ শেহতীয়া প্ৰতিবেদনত এই চাঞ্চল্যকৰ দাবী কৰিছে।
তেওঁলোকৰ বিশ্লেষণ অনুসৰি চাৰিদিনীয়া তীব্ৰ সংঘাতৰ অন্তত আকাশমাৰ্গত ভাৰতে ১০০ শতাংশ নিয়ন্ত্ৰণ সাব্যস্ত কৰিছিল যাৰ ফলত পাকিস্তান যুদ্ধবিৰতিৰ বাবে বাধ্য হৈছিল। সামৰিক ইতিহাসবিদ আদ্ৰিয়ান ফঁতানেল্লাজে লিখা এই প্ৰতিবেদনখনত ২০২৫ চনৰ ৭ মে’ৰ পৰা ১০ মে’লৈ চলি থকা ৮৮ ঘণ্টাৰ ভাৰত-পাকিস্তান আকাশী যুদ্ধৰ এক বিতং আৰু নিৰপেক্ষ বিশ্লেষণ আগবঢ়োৱা হৈছে।
পহেলগামত পৰ্যটকৰ ওপৰত হোৱা ভয়ংকৰ সন্ত্ৰাসবাদী আক্ৰমণৰ পাছতেই ভাৰতে অপাৰেচন সিন্দুৰ আৰম্ভ কৰিছিল। নতুন দিল্লীৰ মতে এই আক্ৰমণৰ আঁৰত পাকিস্তান ভিত্তিক সন্ত্ৰাসবাদী সংগঠনৰ হাত আছিল। ইয়াৰ প্ৰত্যুত্তৰত ভাৰতীয় বায়ুসেনাই ৭ মে’ৰ পুৱতি নিশা জইশ-ই-মহম্মদ আৰু লস্কৰ-ই-তইবাৰ বাহাৱালপুৰ আৰু মুৰিডকেত থকা গুৰুত্বপূৰ্ণ ঘাটিত আক্ৰমণ চলায়। দীৰ্ঘ দূৰত্বৰ লক্ষ্যভেদী অস্ত্ৰৰে চলোৱা এই আক্ৰমণত সন্ত্ৰাসবাদীৰ কেইবাটাও ভৱন সম্পূৰ্ণৰূপে ধ্বংস হৈছিল। যদিও আৰম্ভণিতে ভাৰতৰ এটা ৰাফেল যুদ্ধবিমান ক্ষতিগ্ৰস্ত হোৱাৰ খবৰ চৰ্চালৈ আহিছিল আৰু পাকিস্তানে সেইটোক লৈ প্ৰচাৰ চলাইছিল কিন্তু চুইচ প্ৰতিবেদনৰ মতে সেইটোৱে অভিযানৰ প্ৰকৃত ফলাফলক লুকুৱাব পৰা নাছিল।
প্ৰতিবেদনত উল্লেখ কৰা হৈছে যে প্ৰথম পৰ্যায়ৰ পাছতেই ভাৰতে অতি সুপৰিকল্পিতভাৱে পাকিস্তানৰ আকাশী প্ৰতিৰক্ষা ব্যৱস্থা অকামিলা কৰাৰ অভিযান আৰম্ভ কৰে। ভাৰতে ব্ৰহ্মোচ আৰু স্কাল্পৰ দৰে শক্তিশালী মিছাইল ব্যৱহাৰ কৰি পাকিস্তানৰ ৰাডাৰ আৰু চাৰ্ফেচ-টু-এয়াৰ মিছাইল নেটৱৰ্কসমূহ এটা এটাকৈ ধ্বংস কৰি দিয়ে। পাকিস্তানৰ আকাশী সুৰক্ষা দুৰ্বল হোৱাৰ পাছত ভাৰতে তেওঁলোকৰ মুখ্য বিমানঘাটিসমূহৰ ৰানৱে আৰু অন্যান্য আন্তঃগাঁথনিত ধাৰাবাহিক আক্ৰমণ চলায়। ইয়াৰ ফলত পাকিস্তানৰ বায়ুসেনাৰ যুঁজাৰু ক্ষমতা একেবাৰে হ্ৰাস পায় আৰু তেওঁলোক আকাশত তিষ্ঠি থকাটো অসম্ভৱ হৈ পৰে।
ভাৰতৰ এই সফলতাৰ অন্যতম গুৰুত্বপূৰ্ণ কাৰণ আছিল আকাশত থকা প্ৰতিৰক্ষা আৰু কমাণ্ড ব্যৱস্থাৰ সঠিক সমন্বয়। ভাৰতৰ এছ-৪০০, আকাশ আৰু বাৰাক-৮ মিছাইল ব্যৱস্থাই পাকিস্তানৰ প্ৰতিটো প্ৰত্যাক্ৰমণক বিফল কৰি দিছিল। ১০ মে’ৰ ভিতৰত পৰিস্থিতি এনেকুৱা হৈছিল যে আকাশমাৰ্গত ভাৰতে একছত্ৰী আধিপত্য বিস্তাৰ কৰিছিল আৰু ভাৰতে নিজৰ চৰ্ত অনুসৰি যুদ্ধ বন্ধ কৰিবলৈ ইছলামাবাদক বাধ্য কৰিছিল।
চুইচ বিশ্লেষকসকলৰ মতে এই অভিযানে প্ৰমাণ কৰি দিলে যে ভাৰতে এতিয়া সন্ত্ৰাসবাদী আক্ৰমণক কেৱল এটা বিচ্ছিন্ন ঘটনা হিচাপে নলৈ ইয়াৰ আঁৰত থকা শক্তিৰ বিৰুদ্ধে অধিক তীব্ৰ আৰু কঠোৰ পদক্ষেপ গ্ৰহণ কৰিবলৈ সাজু।
সামৰিক সফলতাৰ উপৰিও অপাৰেচন সিন্দুৰ ভাৰতৰ কৌশলগত নীতিত এক ডাঙৰ পৰিৱৰ্তনৰ সংকেত। এতিয়াৰ পৰা পাকিস্তান ভিত্তিক যিকোনো আক্ৰমণক ৰাষ্ট্ৰীয় কাঠামৰ সৈতে জড়িত বুলি গণ্য কৰা হ’ব আৰু ইয়াৰ প্ৰতিক্ৰিয়াও হ’ব অতি দ্ৰুত আৰু ভয়াৱহ। সৰ্বমুঠ চাবলৈ গ’লে যদিও প্ৰথম নিশা পাকিস্তানে কিছু সফলতা পোৱা বুলি দাবী কৰিছিল কিন্তু শেষত আকাশী যুদ্ধৰ বিজয়ী হিচাপে ভাৰতহে আত্মপ্ৰকাশ কৰিলে বুলি চুইচ গৱেষণা সংস্থাটোৱে মত পোষণ কৰিছে।
