মাৰাত্মক ভাইৰাছ কৰ’নাৰ বিৰুদ্ধে জীৱন যুঁজত জয়ী হৈ ঘৰলৈ উভতিল এগৰাকী ১০০বছৰীয়া বৃদ্ধা।
মধ্য প্ৰদেশৰ ইন্দোৰৰ চন্দ্ৰ বাই নামৰ শতায়ু গৰকা বৃদ্ধাৰ এই জীৱন যুঁজৰ কাহিনীয়ে সকলোকে আচৰিত কৰি তুলিছে।
কেইদিনমান পূৰ্বে কৰ’না ভাইৰাছৰ দ্বাৰা আক্ৰান্ত হৈ তেওঁৰ পুত্ৰৰ মৃত্যু হৈছিল।
জানিব পৰা মতে, যোৱা ৪মে’ত ইন্দোৰৰ নেহৰু নগৰত বাস কৰা চন্দ্ৰা বাইৰ মাজু ল’ৰা কৰ’না আক্ৰান্ত হোৱাৰ পাছত মৃত্যু মুখত পৰে।
ইয়াৰ পাছতে তেওঁলোকৰ পৰিয়ালৰ ১৬গৰাকী সদস্যৰ কৰ’না পৰীক্ষা কৰা হয়।
যোৱা ১০ মে’ত পৰীক্ষাৰ প্ৰতিবেদনত চন্দ্ৰা বাই, তেওঁৰ সৰু পুত্ৰ, নাতিয়েক তথা নাতিয়েকৰ পত্নী আৰু তেওঁলোকৰ দুটা সন্তানৰ দেহত কোভিড-১৯ পজিটিভ ধৰা পৰে।
ইয়াৰ পাছতে তেওঁলোক ছয়জনক ইন্দোৰৰ শ্ৰী অৰবিন্দ ইনষ্টিটিউট মেডিকেল ছায়েন্সেছ হাস্পাতলত ভৰ্তি কৰা হয়।
বিগত ১১ দিন ধৰি মাৰাত্মক ভাইৰাছ কৰ’নাৰ সৈতে যুঁজ দিয়াৰ পাছত সুস্থ হৈ ঘৰলৈ উভতিল চন্দ্ৰা বাই।
বৃহস্পতিবাৰে সন্ধিয়া তেওঁক হাস্পাতলৰ পৰা ঘৰলৈ যাব দিয়া হয়। ঘৰ পোৱাৰ সময়ত প্ৰতিবেশীসকলে তেওঁক হাত চাপৰি বজাই উষ্ণ আদৰণি জনায়।
হাস্পাতলখনৰ এগৰাকী জ্যেষ্ঠ চিকিৎসক ডাৰ্বি দোশীয়ে কয় যে বৃদ্ধাগৰাকীয়ে হাস্পাতলত ভৰ্তি হোৱাৰ সময়ত তেওঁৰ গাত অলপ জ্বৰৰ বাহিৰে আন কোনো লক্ষণ নাছিল। য’ত কৰ’না আক্ৰান্ত বয়সস্থ লোকসকলক দীৰ্ঘসময়ৰ বাবে অক্সিজেন দিবলগীয়া হৈছে তাত তেওঁক কেইদিনমানৰ বাবেহে অক্সিজেন দিবলগীয়া হৈছে।
তেওঁ লগতে কয় যে হয়তো পৰিয়ালৰ সৈতে সময় কটোৱাৰ দূৰন্ত বাসনাই তেওঁক মাৰাত্মক ভাইৰাছৰ বিৰুদ্ধে যুঁজাত শক্তি যোগাইছে।
চিকিৎসক দোশীয়ে কয়,’’আনকি আমি যেতিয়া আন ৰোগীসকলক লৈ হতাশ হৈ পৰিছিলো তেতিয়া তেওঁলেই আমাক অনুপ্ৰাণিত কৰাৰ চেষ্টা কৰিছিল।‘’
পুত্ৰক হেৰুৱাৰ পাছতো কৰ’নাৰ বিৰুদ্ধে যুঁজ দি জীৱন যুদ্ধত জয়ী হোৱা ১০০ বছৰীয়া এই বৃদ্ধাৰ কাহিনী বহুতৰ বাবে মানসিক শক্তি তথা প্ৰেৰণাৰ উৎস হৈ ৰ’ব।
