যি সময়ত অসম তথা ভাৰতৰ বিভিন্ন স্থানত সাংবাদিক নিগ্ৰহৰ ঘটনা সংঘটিত হৈছে, তেনে ঘটনা ৰোধৰ বাবে জনসাধাৰণৰ মাজত সজাগতা বৃদ্ধি আৰু চৰকাৰৰ দৃষ্টি আকৰ্ষণৰ বাবে এককভাৱে চাইকেল যাত্ৰা কৰি শিৱসাগৰত উপস্থিত হৈছে বিশ্বনাথ চাৰিআলিৰ যুৱক স্নেহাংকৰ চক্ৰৱৰ্তী।
১৭ নৱেম্বৰত বিশ্বনাথৰ পৰা যাত্ৰা আৰম্ভ কৰা স্নেহাংকৰ চক্ৰৱৰ্তীয়ে লক্ষীমপুৰ, ধেমাজি, ডিব্ৰুগড়, তিনিচুকীয়া, শদিয়া হৈ পুনৰ ডিব্ৰুগড়, শিৱসাগৰ, যোৰহাট গোলাঘাট আৰু নগাঁও হৈ প্ৰায় ১০০০ কিলোমিটাৰ পথ চাইক্লিং কৰি বিশ্বনাথলৈ উভতিব।
আজি পুৱা ৭ বজাত স্নেহাংকৰ চক্ৰৱৰ্তীয়ে শিৱসাগৰৰ ঐতিহাসিক শিৱদ’লৰ সন্মুখৰ পৰা যোৰহাট অভিমুখে যাত্ৰা আৰম্ভ কৰে। যাত্ৰাৰ পূৰ্বে শিৱসাগৰ জিলা বাৰ্তাজীৱী সংঘৰ তৰফৰ পৰা সম্বৰ্দ্ধনা জনোৱাৰ লগতে তেওঁৰ এই যাত্ৰ সফল কামনা কৰা হয়।
শিৱসাগৰৰ পৰা আজি স্নেহাংকৰ চক্ৰৱৰ্তীৰ একক চাইকেল যাত্ৰাৰ ফ্লেগ অফ কৰি শুভাৰম্ভ কৰে শিৱসাগৰ বাণিজ্য মহাবিদ্যালয়ৰ অধ্যক্ষ ড০ সৌমাৰজ্যোতি মহন্ত আৰু গড়গাঁও মহাবিদ্যালয়ৰ অধ্যক্ষ ড০ সব্যসাচী মহন্তই।
অনুষ্ঠানত শিৱসাগৰ জিলা বাৰ্তাজীৱী সংঘৰ সভাপতি খলিলুৰ ৰহমান হাজৰিকা, সাধাৰণ সম্পাদক মনোজ কুমাৰ গগৈকে ধৰি বহু কেইজন সাংবাদিক আৰু বিশিষ্ট ব্যক্তি উপস্থিত থাকে।
