চীনৰ ঐতিহাসিক লং মাৰ্চৰ শেষৰগৰাকী জীৱিত সৈনিক ৱাং কুৱানয়িঙে ১০৫ বছৰ বয়সত ভৰি দিলে। যোৱা ২৫ জুনত চিচুৱান প্ৰদেশত তেওঁৰ জন্মদিন অতি ধুমধামেৰে উদযাপন কৰা হয়। এই বছৰটো হৈছে চীনৰ লং মাৰ্চ বিজয়ৰ ৯০ সংখ্যক বৰ্ষপূৰ্তি। এই বিশেষ ক্ষণত শতায়ু গৰকা এই বীৰ সৈনিকগৰাকীক শ্ৰদ্ধা জনাবলৈ পিপলছ লিবাৰেচন আৰ্মীৰ এদল তৰুণ সেনা চিচুৱানৰ ডুজিয়াংয়ানত থকা তেওঁৰ ঘৰত উপস্থিত হয়হি।
হুইলচেয়াৰত বহি থকা অৱস্থাত তেওঁৰ গাত আছিল ৰেড আৰ্মীৰ সেই পুৰণি জলফাই ৰঙৰ পোছাক আৰু মূৰত ৰঙা তৰা থকা টুপী। ১০৫ বছৰীয়া এই বৃদ্ধাগৰাকীয়ে যেতিয়া তৰুণ সেনাসকলৰ আগত কঁপি থকা হাতেৰে কপালত হাত থৈ কুৰ্নিচ জনায়, তেতিয়া কোঠাটোৰ পৰিৱেশ অতি আৱেগিক হৈ পৰে। নিজৰ পুৰণি পোছাকযোৰত হাত বুলাই আৰু বেটেলিয়ানৰ পতাকাখনলৈ চাই শ্ৰদ্ধা জনোৱাৰ সময়ত তেওঁৰ চকুদুটা যেন প্ৰায় এশ বছৰৰ আগৰ সেই সংগ্ৰামী দিনবোৰলৈ উভতি গৈছিল।
জন্মদিন উপলক্ষে এই প্ৰবীণ যোদ্ধাগৰাকীৰ হাতত এক বিশেষ উপহাৰ তুলি দিয়া হয়। নেচনেল ইউনিভাৰ্চিটি অৱ ডিফেন্স টেকনলজি আৰু কমিউনিকেচন ইউনিভাৰ্চিটি অৱ ঝেজিয়াঙৰ শিক্ষক আৰু শিক্ষাৰ্থীসকলে মিলি কৃত্ৰিম বুদ্ধিমত্তাৰ সহায়ত ৱাঙৰ কিশোৰী বয়সৰ দুখন সুন্দৰ ছৱি তৈয়াৰ কৰিছিল। ইয়াৰে এখনত দেখা গৈছে ১৯৩৫ চনত মাত্ৰ ১৪ বছৰ বয়সত যেতিয়া তেওঁ ৰেড আৰ্মীত যোগদান কৰিছিল, সেই সময়ৰ চেহেৰা। আনখন তাৰ ঠিক দুবছৰৰ পাছৰ, যেতিয়া লং মাৰ্চৰ কঠিন পথ অতিক্ৰম কৰিবলৈ গৈ ১৬ বছৰ বয়সত তেওঁ দলৰ পৰা বিচ্ছিন্ন হৈ পৰিছিল। নিজৰ সেই হেৰাই যোৱা চিনাকি মুখ দুখন দেখি বৃদ্ধাগৰাকী আৱেগত উথলি উঠে আৰু মুখত এক নিৰ্মল হাঁহিৰে লাহেকৈ বুঢ়া আঙুলিটো দেখুৱায়।
১৯২১ চনত চিচুৱান প্ৰদেশৰ জিনচুৱান কাউণ্টিত জন্মগ্ৰহণ কৰা ৱাং কুৱানয়িঙে মাত্ৰ ১৪ বছৰ বয়সতে দেশ আৰু আদৰ্শৰ প্ৰতি আকৰ্ষিত হৈ ৰেড আৰ্মীত নামভৰ্তি কৰিছিল। তেওঁ ফোৰ্থ ফ্ৰণ্ট আৰ্মীৰ নাৰ্ছ আৰু সহায়ক হিচাপে কাম আৰম্ভ কৰে। চিয়াং কাই-শেকৰ নেতৃত্বাধীন বাহিনীৰ হাতৰ পৰা ৰক্ষা পাবলৈ কমিউনিষ্টসকলৰ সেই ঐতিহাসিক ১০ হেজাৰ কিলোমিটাৰৰ দীঘলীয়া আৰু দুৰ্গম যাত্ৰাত তেৱোঁ অংশগ্ৰহণ কৰিছিল। সেই যাত্ৰাপথত তেওঁলোকে ১৮ খন পৰ্বতমালা আৰু ২৪ খন ঢৌখেলা নদী পাৰ হ’বলগীয়া হৈছিল। বৰফেৰে আবৃত পাহাৰ পাৰ হোৱাৰ সময়ত প্ৰচণ্ড শীতৰ বাবে তেওঁৰ হাত-ভৰি বেয়াকৈ ক্ষতিগ্ৰস্ত হৈছিল। ইয়াৰ পাছত ১৯৩৬ চনত এক সামৰিক অভিযানৰ সময়ত তেওঁ নিজৰ দলৰ পৰা সম্পূৰ্ণৰূপে বিচ্ছিন্ন হৈ পৰে।
দলৰ পৰা বিচ্ছিন্ন হোৱাৰ পাছত চিচুৱানৰ ৱেনচুৱানলৈ আহি তেওঁ সাধাৰণ মানুহৰ লগত মিলি যায়। আন দহজন সাধাৰণ মানুহৰ দৰেই তেওঁৰ দিনবোৰ পাৰ হ’বলৈ ধৰে। সুদীৰ্ঘ কেইবাটাও দশক ধৰি তেওঁ কাকো জানিবলৈ দিয়া নাছিল যে তেওঁ এসময়ৰ সেই ঐতিহাসিক লং মাৰ্চৰ এগৰাকী সংগ্ৰামী সৈনিক আছিল। অৱশেষত ঘটনাৰ প্ৰায় ৪৮ বছৰৰ পাছত, ১৯৮৪ চনত চৰকাৰীভাৱে তেওঁৰ পৰিচয় প্ৰমাণ কৰা হয় আৰু তেওঁক প্ৰবীণ সৈনিকৰ ৰাষ্ট্ৰীয় স্বীকৃতি প্ৰদান কৰা হয়।
আজি যেতিয়া চীনৰ লং মাৰ্চৰ আন কোনো সাক্ষী জীৱিত নাই, তেতিয়া ১০৫ বছৰ বয়সীয়া ৱাং কুৱানয়িং এক জীৱন্ত ইতিহাস হৈ ৰৈছে। তেওঁৰ এই জন্মদিন কেৱল এটা সংখ্যাৰ উদযাপন নহয়, বৰঞ্চ এক অদম্য যুঁজ আৰু সহনশীলতাৰ ইতিহাসৰ প্ৰতি জনোৱা এক গভীৰ শ্ৰদ্ধাঞ্জলি।
