সমষ্টিৰ পুনৰ নিৰ্ধাৰণ প্ৰক্ৰিয়াৰ বিৰুদ্ধে বুধবাৰে ১২ ঘণ্টীয়া লাহোৱাল বন্ধ ঘোষণাৰ ফলত জনসাধাৰণৰ মাজত মিশ্ৰিত প্ৰতিক্ৰিয়াৰ সৃষ্টি হৈছে।
লাহোৱাল বিধান সভা সমষ্টি বাতিলৰ প্ৰতিবাদত ৰাষ্ট্ৰীয় ঘাইপথত টায়াৰ জ্বলাই প্ৰতিবাদ সাব্যস্ত কৰে প্ৰতিবাদকাৰীসকলে।
ভাৰতীয় নিৰ্বাচন আয়োগৰ এই সিদ্ধান্তৰ প্ৰতিবাদত ব্যৱসায়ী সমাজে বন্ধ কৰি দিলে শ্বাটাৰ।
২০২৩ চনৰ ২০ জুনত ইচিআইয়ে জনপ্ৰতিনিধিত্ব আইন, ১৯৫০ৰ ধাৰা ৮ (ক) অনুসৰি অসমৰ বিধানসভা আৰু সংসদীয় সমষ্টিৰ সীমা নিৰ্ধাৰণৰ খচৰা প্ৰস্তাৱ প্ৰকাশ কৰে।
“আজি আমি নিৰ্বাচনী আয়োগৰ সমষ্টিৰ সীমা নিৰ্ধাৰণত লাহোৱাল বিধানসভা সমষ্টি প্ৰত্যাহাৰ কৰাৰ বাবে বন্ধ আহ্বান জনাইছো। সিদ্ধান্তৰ বাবে আমাৰ বৰ বেয়া লাগিছে। আয়োগে প্ৰথম সীমা নিৰ্ধাৰণৰ খচৰা প্ৰকাশ কৰাৰ পূৰ্বে লাহোৱালৰ ৰাইজক সুধিব লাগিছিল। এনআৰচি সম্পূৰ্ণ নোহোৱাকৈ কেনেকৈ এই সিদ্ধান্ত লোৱা হ’ল?” লাহোৱাল কলেজৰ অধ্যক্ষ জ্যোতিপ্ৰসাদ দত্তই কয়।
তেওঁ কয়, “আমি ভাৰতীয় নিৰ্বাচনী আয়োগক আবেদন জনাইছো, তেওঁলোকে লাহোৱাল কৰ্তনৰ সিদ্ধান্ত প্ৰত্যাহাৰ কৰক।”
“আমি লাহোৱাল বিধানসভা সমষ্টি বিলোপ কৰাৰ সিদ্ধান্তৰ বিৰুদ্ধে গণতান্ত্ৰিক প্ৰতিবাদ আৰম্ভ কৰিম। আমাৰ আৱেগ লাহোৱাল বিধান সভা সমষ্টিৰ সৈতে সংলগ্ন আছিল। ’- এই মন্তব্য লাহোৱালৰ এগৰাকী মহিলা কৰ্মী অন্নপূৰ্ণা নাথৰ।
উল্লেখ্য যে, সংবিধানৰ ১৭০ নং অনুচ্ছেদ আৰু ৮২ নং অনুচ্ছেদত উল্লেখ কৰা অনুসৰি ২০০১ চনৰ লোকপিয়লৰ ভিত্তিত ৰাজ্যখনৰ বিধানসভা আৰু সংসদীয় সমষ্টিসমূহৰ সীমা নিৰ্ধাৰণ কৰা হ’ব।
