এজন পশু চিকিৎসক আৰু পশুধনৰ অবৈধ সৰবৰাহৰ বিৰুদ্ধে মাত মতা ব্যক্তি হিচাপে চিহ্নিত এজন লোককে ধৰি মুঠ ১২জন লোকক চোৰাং গৰুৰ ট্ৰাকৰ সৈতে আটক কৰিছে কোকৰাঝাৰ আৰক্ষীয়ে।
দলটো অসম-বংগ সীমান্তইদি বাংলাদেশলৈ গৰুৰ চোৰাং সৰবৰাহৰ চেষ্টা কৰাৰ সময়তে আৰক্ষীৰ জালত পৰে।
বাংলাদেশলৈ চালান দিবলৈ নিয়া ১৬টা গৰু ভৰ্তি ট্ৰাকৰ সৈতে ধৰা পৰা দলটোৰ মূল কাণ্ডাৰী অৰুণ লিংডো এজন পশু চিকিৎসক আৰু আনজন মুন্না শইকীয়া পশুধনৰ অবৈধ সৰবৰাহৰ বিৰুদ্ধে সততে সৰৱ হৈ অহা সদৌ ভাৰত পশুধন ব্যৱসায়ী আৰু পৰিবহণকাৰী সংস্থাৰ সম্পাদক।
অসম আৰু মেঘালয় হৈ বাংলাদেশলৈ গৰু চোৰাংকৈ পাৰ কৰি থকা নৈমিত্তিক ঘটনাবোৰৰ আঁত ধৰি যোৱা দুদিনত কোকৰাঝাৰ আৰক্ষীয়ে অসম-বংগ সীমান্ত এলেকাত নিশাৰ ভাগত অভিযান চলাইছিল। এই অভিযানৰ সময়তে দুয়োজনকে আন আন সহযোগীৰ সৈতে জালত পেলাবলৈ আৰক্ষী সক্ষম হয়।
আৰক্ষীয়ে দিয়া তথ্য হ’ল- ৫ ছেপ্টেম্বৰত পশ্চিম বংগৰ পৰা অসম আৰু মেঘালয় হৈ বাংলাদেশলৈ চোৰাংকৈ গৰু পাৰ কৰিবলৈ অসমত প্ৰৱেশ কৰিবৰ বাবে ১৬টা গৰু সহ এখন ট্ৰাক (এ এছ ০১ জি চি/৩৮৩৭) নিশ্ছিদ্ৰ নিৰাপত্তা বেষ্টনীৰ মাজেৰে পাৰ কৰাই আনি আছিল সৰ্ব ভাৰতীয় পশু ব্যাৱসায়ী আৰু পৰিবহণ সন্থাৰ স্বয়ং সভাপতি অৰুণ লিংডো আৰু সম্পাদক মুন্না শইকীয়াই।
আৰক্ষীৰ মতে, এ এছ ০১ এ কে/৭৩৬৩ নম্বৰৰ এখন ইন’ভা গাড়ীত বহি এওঁলোক দুজনে সুৰক্ষাৰ দায়িত্ব পালন কৰি আহিছিল।
ইপিনে ডব্লিউ বি ৭০ বি/৮৫৩৯ নম্বৰৰ এখন অ’লটো গাড়ী সহ আৰক্ষীয়ে যোৱা দুদিনত আন আঠগৰাকী গৰুৰ চোৰাং ব্যৱসায়ীক কৰায়ত্ত কৰিছে৷ এই সকলৰ ভিতৰত গুৱাহাটী হাতীগাঁৱৰ খুঁটিৰাম শইকীয়াৰ পুত্ৰ ডাঃ কিশ্বৰুড শইকীয়াও (৪৮) আছে।
আটক হোৱা বাকী চোৰাং ব্যৱসায়ীসকল পশ্চিম বংগৰ এমবোলকাৰ শিবু বৰ্মনৰ পুত্ৰ বিশ্বজিৎ ৰায়(৩০), বৰাইপাৰাৰ শৈলেন্দ্ৰ বৰ্মনৰ পুত্ৰ প্ৰদেপ বৰ্মন(৩২), উত্তৰ দিনাজপুৰ জিলাৰ ধাইঘাটৰ দাশোৰুদ্দিনৰ পুত্ৰ আব্দুল আলম(২৬), দেৰাজ উদ্দিনৰ পুত্ৰ মজিবৰ ৰহমান(৩০), গোপাল মণ্ডলৰ পুত্ৰ মানিক মণ্ডল(৩১), মালিক ফিৰোজ(৪৬) আৰু ৰচিদ আলী(৪০)৷
