এগৰাকী ১২ বছৰীয়া ছোৱালীৰ এটা প্ৰশ্নই ভাবগধুৰ কৰি তুলিলে মুখ্যমন্ত্ৰী সোণোৱালক, কি সুধিছিল তুতছিয়ে?

এগৰাকী ১২ বছৰীয়া কিশোৰী। আন দহ গৰাকী কিশোৰীৰ দৰেই ৰং মনেৰে পখিলা খেদি ফুৰাৰ বয়স তেওঁৰ।

কিন্তু জীৱনৰ কেতবোৰ বিশেষ ঘটনাকলৈ বিৰক্ত কিশোৰী গৰাকী।

নাম তেওঁৰ তুতছি ৰামচিয়াৰী। UNICEF Assam ৰ এগৰাকী সদস্যা তুতছিৰ কেতবোৰ প্ৰশ্নই আজি ভাব গধুৰ কৰি তুলিলে মুখ্যমন্ত্ৰী সৰ্বানন্দ সোণোৱালক।

বিশ্ব শিশু দিৱসৰ কাৰ্যসূচীৰ সৈতে সংগতি ৰাখি  মুখ্যমন্ত্ৰী সৰ্বানন্দ সোণোৱালে আজি তেওঁৰ চৰকাৰী বাসভৱনত ইউনিচেফ ইণ্ডিয়াৰ বিষয়াবৰ্গৰ উপৰি ইউনিচেফ  অসমৰ সদস্য একাংশৰ সৈতে মত বিনিময় কৰে।

উক্ত অনুষ্ঠানতে তুতছি ৰামচিয়াৰী নামৰ ১২ বছৰীয়া কিশোৰী গৰাকীয়ে তেওঁৰ জীৱনৰ দুখৰ অধ্যায় বৰ্ণনা কৰি কয় যে তেওঁৰ জন্মৰ পিছতে তেওঁৰ মাকৰ মৃত্যু ঘটিছিল।

As part of #WorldChildrensDay celebrations, a delegation comprising of @UNICEFIndia officials and children called on CM Shri @sarbanandsonwal at his official residence in Guwahati.

The children presented a Children’s Manifesto to the CM and shared recommendations with him. pic.twitter.com/aoZHh8S52e

— Chief Minister Assam (@CMOfficeAssam) November 21, 2020

মাকৰ মৃত্যুৰ বাবে  তেওঁৰ পিতৃয়ে তুতছিয়েই দায়ী বুলি ধৰি লৈছিল আৰু সেয়ে তুতছিক পৰিত্যাগ কৰিছিল।এনেদৰে নিজৰ জীৱনৰ দুখৰ কথা বৰ্ণনা কৰি তুতছিয়ে মুখ্যমন্ত্ৰী সোণোৱালক সুধিছিল—‘মই যদি ল’ৰা হ’লোহেঁতেন তেন্তে দেউতাই মোক পৰিত্যাগ কৰিলেহেঁতেন নে’?

১২ বছৰীয়া ছোৱালীজনীৰ প্ৰশ্নই ক্ষন্তেকৰ বাবে হ’লেও ভাবগধুৰ কৰি তুলিছিল মুখ্যমন্ত্ৰী সৰ্বানন্দ সোণোৱালক।

তুতছি ৰামচিয়াৰীয়ে তেওঁ ভোগ কৰা সমস্যা যাতে আন কোনেও ভোগ কৰিব নালাগে তাৰ বাবে লিংগ বৈষম্য দূৰ কৰাৰ ব্যৱস্থা গ্ৰহণ কৰিবলৈ মুখ্যমন্ত্ৰী সোণোৱালক অনুৰোধ জনায়।

অনুষ্ঠানত চেলিব্ৰেল পালচি ৰোগত আক্ৰান্ত ১১ বছৰীয়া ৰিমঝিম শইকীয়াই তেওঁৰ দৰে শিশুসকলে নাচ-গান কৰিব পৰাকৈ ৰাজ্যৰ প্ৰতি খন জিলাতে বিশেষ বিদ্যালয় স্থাপন কৰাৰ বাবে আহ্বান জনায়।