ভূমি বিবাদক কেন্দ্ৰ কৰি সংঘটিত হোৱা এক হত্যাকাণ্ডৰ অভিযোগত ৫ মহিলাসহ ১৩ জন অভিযুক্তক গ্ৰেপ্তাৰ কৰিছে আৰক্ষীয়ে।
উল্লেখ্য যে যোৱা ২৭ ডিচেম্বৰত ধুবুৰী জিলাৰ গৌৰীপুৰৰ মুৰলীয়াঘাটত ভূ-সম্পত্তিক কেন্দ্ৰ কৰি দুটা ফৈদৰ মাজত হোৱা বিবাদত এক ৰক্তাক্ত সংঘৰ্ষৰ সৃষ্টি হৈছিল।
দুই ফৈদৰ মাজত সৃষ্ট উক্ত ৰক্তাক্ত সংৰ্ঘষত একেটা পৰিয়ালৰে মনতাজ আলি আৰু জেছমিন বেগম নামৰ দুগৰাকী লোকৰ মৃত্যু হোৱাৰ লগতে কেবাজনো লোক আহত হৈছিল।
এই হত্যাকাণ্ডৰ পিছতে ২৮ ডিচেম্বৰত ধুবুৰী আৰক্ষীয়ে হত্যাকাণ্ডটোৰ সৈতে জড়িত থকাৰ অভিযোগত ৫ গৰাকী মহিলাসহ ১৩ জন অভিযুক্তক গ্ৰেপ্তাৰ কৰিবলৈ সক্ষম হৈছে।
আৰক্ষীয়ে গ্ৰেপ্তাৰ কৰা অভিযুক্তকেইজন হৈছে গেৰামাৰী গাঁৱৰ বাসিন্দা ক্ৰমে বাবুল হুছেইন(৪৫), তাহেৰ উদ্দিন(৪২), হাজিফুৰ ৰহমান(২২) ফক্ৰামুল হক(৫০), হাইদৰ আলি(৪৫), মনঞ্জুফা বেগম(২১), মানেকা খাতুন(৩২), গুলেনুৰ খাতুন(২৭), মাজিদা বিবি(৪০) আলিফুল ইছলাম(২৪) আৰু তাজমিৰা খাতুন(৩৬)।
আনহাতে গৌৰীপুৰ আৰক্ষী থানাৰ অন্তৰ্গত ফুলকুমাৰী গাঁৱৰ পৰা গ্ৰেপ্তাৰ কৰা হৈছে ক্ৰমে চামচুল হক(৫৮) আৰু আছমা বিবিক(৪৮)।
ইফালে আৰক্ষী কেবাজনো পলাতক অভিযুক্তৰ বিৰুদ্ধে তালাচী অভিযানো অব্যাহত ৰখা বুলি জানিবলৈ দিছে।
আৰক্ষীয়ে গ্ৰেপ্তাৰ কৰা আটাইকেইজন অভিযুক্তৰ বিৰুদ্ধে গোচৰ নং ১৫৮৭/২০ৰ ভাৰতীয় দণ্ডবিধি আইনৰ ১৪৭/১৪৮/১৪৯/৪৪৭/৩০৭/৩২৫/৩২৬/১১৯/৩০২ ধাৰাত গোচৰ ৰুজু কৰিছে।
